HEADLINES

Sumampa na sa 6,315 pamilya o katumbas ng 23, 702 indibiduwal ang apektado ng bagyong kiko sa mga lalawigan ng Ilocos, Cagayan, Gitnang Luzon at Cordillera.

Ayon sa National Disaster Risk Reduction And Management Council (NDRRMC), nasa 508 na pamilya o katumbas ng 1,789 na indibiduwal ang kasalukuyang nanunuluyan sa 62 evacuation centers.

Nasa 11 kalsada ang hindi madaanan habang nananatiling stranded sa mga pantalan ang may 93 pasahero sa Ilocos, Cagayan, Central Luzon, Calabarzon, Soccsksargen at Cordillera.

Batay sa pinakahuling datos ng Pagasa, tuluyan nang nakalabas ng Philippine Area of Responsibility (PAR) ang Bagyong Kiko kahapon.

Nabalitaan po natin doon mismo sa mga kasama natin doon sa ground sa Batanes, nung dumaan po ‘yong mata ng bagyo, marami pong mga nilipad na bubong, nagtumbahang mga poste at tsaka puno kaya may ilang taoyng mga kababayan na na-injured because of that but so far wala pa po tayong official na report patungkol po dito as well as casualty.

Ang tinig ni NDRRMC Spokesman Mark Timbal sa panayam ng DWIZ…

Nahaharap sa patumpatong na asunto ang isang tulak ng iligal na droga makaraang makuhanan ng shabu at baril sa buy-bust operations sa Lucena City.

Kinilala ang suspek sa alyas na Jojo na naaresto matapos pagbilhan ng poseur buyer na pulis ng P12,000 halaga ng shabu.

Matapos masukol, nakuha pa kay Jojo ang mahigit 37 gramo ng shabu na nagkakahalaga ng humigit kumulang P700,000.

Maliban sa iligal na droga, nakuha rin mula kay Jojo ang isang perang nagkakahalaga ng P700 at kalibre 39 na revolver.

Nanindigan ang kumpaniyang Pharmally Pharmaceutical Corporation na malinis at walang anomalya ang naging transaksyon nila sa pamahalaan.

Ito ang inihayag ni Pharmally President Huang Tzu sa pagpapatuloy ng pagdinig ng Senate Blue Ribbon Committee ngayong araw.

Giit ni Huang, nakasunod naman sila sa lahat ng mga hinihinging requirements ng pamahalaan at itinangging paborito sila ng procurement service ng Department of Budget and Management (DBM).

Paliwanag ni Huang, sadyang mataas talaga ang presyo ng mga PPE’s nuong isang taon tulad ng facemask at face shield dahil kaunti lang ang suplay nito subalit mataas ang demand. —sa ulat ni Cely Ortega Bueno (Patrol 19)

Bantay sarado ng mga tauhan ng senado ang bahay ni Pharmally Director Lincon Ong matapos magpositibo sa COVID-19.

Kaya naman dumalo na lamang si Ong via online sa pagpapatuloy ng pagdinig ng Senate Blue Ribbon Committee ngayong araw.

Si Ong ay kasalukuyang naka-house arrest matapos ipadakip ng komite para sagutin ang mga alegasyon ng katiwalian sa pagbili ng pamahalaan ng mga PPE’s.

Samantala, nabigo naman ang senado na ihatid ang warrant of arrest laban kay dating presidential economic adviser at negosyanteng si Michael Yang.

Ito’y matapos igiit ng caretaker ng bahay kung saan naka-address ang warrant na hindi ruon nakatira si Yang. —sa ulat ni Cely Ortega Bueno (Patrol 19)

Hindi sumipot sa pagpapatuloy ng pagdinig ng Senate Blue Ribbon Committee ang dating Presidential Economic Adviser at negosyanteng si Michael Yang.

Ayon kay Atty. Raymund Fortun, abogado ni Yang, tumaas ang blood pressure ni Yang kaya’t pinayuhan ito ng kaniyang mga doktor na magpahinga na lang muna.

Suportado aniya iyon ng medical certificate na siyang isinumite naman nila sa Senate Blue Ribbon Committee na nasa ilalim ng tanggapan ni Sen. Richard Gordon.

Pero ayon kay Gordon, duda siya sa palusot ni Yang dahil sa palagay nito na nasa maayos siyang kalagayan at kinakailangan niyang humarap sa pagdinig. —sa ulat ni Cely Ortega Bueno (Patrol 19) 

Inatasan ng pamunuan ng Philippine National Police (PNP) sa mga Chief of Police sa buong bansa na i-update ang kanilang priority target list.

Ito’y kasunod ng kautusan ni Pangulong Rodrigo Duterte na paigtingin pa ang laban kontra iligal na droga sa bansa matapos ang pagkakasabat ng mga iligal na droga sa mga naging operasyon sa Zambales, Bataan at Cavite nuong isang linggo.

Ayon kay Eleazar, ang mga ikinasang operasyon aniya ay patunay lamang na may ilan pa ring sindikato ng iligal na droga ang patuloy na nakakukuha ng suporta mula sa mga tulak nito sa mga komunidad.

“Sa panig ng PNP, we assure our kababayan that we will not tolerate abuses and wrong doings in our gangs. In our agrressive campaign against illegal drugs, just like what we have shown in the last 5 years when hundreds of our personnel were dismissed from the service for illegal drugs involvement,” pahayag ni PNP Chief P/Gen. Guillermo Eleazar.

Inihatid na sa cold storage facility ng Pharmaserv sa Marikina City ang dalawang milyong doses ng anti-COVID 19 vaccine na Sinovac.

Ito’y makaraang dumating na sa bansa kaninang umaga ang mga naturang bakuna na binili ng pamahalaan sa bansang Tsina.

Personal na sinalubong ni National Task Force Against COVID-19 Chief Implementer at Vaccine Czar Carlito Galvez ang mga dumating na bakuna.

Kasama ang iba pang mga opisyal ng task force tulad ni Dr. Teodoro Herbosa Jr at Dir. Ariel Valencia ng Department of Health.

Pasado ala siete kaninang umaga nang lumapag ang Philippine Airlines Flight PR-361 sa Ninoy Aquino International Airport (NAIA) Terminal 2. —sa ulat ni Raoul Esperas (Patrol 45)

Pinakilos na ang Criminal Investigation and Detection Group (CIDG) para imbestigahan ang mga napaulat na bentahan ng loose firearms gamit ang online platform.

Ito’y matapos masabat ng mga awtoridad kamakailan ang mga kalas-kalas na armas sa isang bodega sa Bulacan noong isang linggo.

Ayon kay PNP Chief P/Gen. Guillermo Eleazar, ang mga armas na ito aniya ay mga lumang service firearm ng pulis at sundalo na hindi nadispatsa ng maayos.

Subalit ibinebenta aniya ang mga ito sa mga private armed group na posibleng gamitin sa pagpapalaganap ng karahasan ngayong nalalapit na ang halalan.

“Guns are the common instruments in committing crimes that is why we have to step our pre-emptive campaign through agrressive operations against those who ascended illegally. Lalo na’t palapit na ang election kung saan, maaaring magamit ang mga loose firearms na ito sa pananabotahe at paghahasik ng karahasan,” pahayag ni PNP Chief P/Gen. Guillermo Eleazar.

Sinalubong pa rin ng mga reklamo ang unang araw ng pagsisimula ng klase sa mga paaralan sa ikalawang taon ng distance learning system.

Batay sa datos ng Oplan Balik Eskuwela – Public Assitance Command Center ng Department of Education (DepEd), aabot sa mahigit dalawang 2,000 ang mga usaping kanilang tinanggap.

Ayon kay Education Usec. Revsee Escobedo, pinakamarami sa kanilang mga natanggap na reklamo ay may kinalaman sa enrollment habang maliit na porsyento lamang ang sa iba pang bagay.

Kabilang sa mga tinanggap na reklamo ng DepEd ay ang tungkol sa school at policy operations, tauhan ng paaralan, learning continuity plan, senior highschool concerns, program and projects at iba pa.

Pinalawig pa ng Department of Education (DepEd) ang enrollment period para sa school year 2021-2022.

Ito’y ayon kay Education Usec. Nepomuceno Malaluan ay alinsunod na rin sa inilabas na kautusan ni Sec. Leonor Briones.

Bagama’t hanggang ngayong araw na lamang dapat ang enrollment para sa taong ito, sinabi ni Malaluan na layon ng kautusan na maihabol ang mga kabataang nagnanais pang mag-aral sa gitna ng pandemiya.

Dagdag pa ni Malaluan, marami silang natutunan sa pagpapatupad ng distance learning noong isang taon kaya’t asahan na marami silang ipinatupad na pagbabago.

“Yung directive ni Secretary na i-maximize yuong other modalities para mabawasan yung dependents natin sa printed modules yan ang mga pagbabagong makikita natin ngayong taong ito,” pahayag ni DepEd Usec. Nepomuceno Malaluan sa panayam ng DWIZ.