HEADLINES

Umarangkada na ang school year 2021-2022 para sa mga estudyante ngayong ikalawang taon ng distance learning dahil sa COVID-19 pandemic.

Kanina, pormal na idineklara ni Department of Education (DepEd) Sec. Leonor Briones ang pagbubukas ng klase para sa taong ito.

“Last year, we opened classes and we successfully ended those classes. Now, we are opening another school year, isn’t that success worthy of celebration in the light of all our challenges.”

Sa panayam naman ng DWIZ kay DepEd Usec. Nepomuceno Malaluan, sinabi niyang umabot ng 24.6-M ang bilang ng mga enrollee ngayong taon.

Katumbas aniya ito ng 93% ng kabuuang enrollment na kanilang naitala noong isang taon.

“Pero nakita natin dito na may mga ilan na tayong mga rehiyon na lampas na doon sa kanilang enrollment last year, so this is an indication that all our learners last year are continuing and those that opted to skip last year are coming back.”

Ang magkasunurang tinig nila DepEd Sec. Leonor Briones at Usec. Nepomuceno Malaluan.

Dalawang babae ang patay habang dalawang lalaki ang sugatan matapos salpukin ang kanilang kotse ng isang truck sa barangay Ugong, Pasig City.

Ayon sa MMDA, dakong alas-2 ng madaling araw nang maganap ang aksidente malapit sa C5-Ortigas Flyover sa bahagi ng Tiendesitas.

Wasak na wasak ang Mitsubishi Mirage na kulay orange kaya’t inabot ng halos apat na oras ang mga rescuer bago nahugot ang dalawang naipit na babae.

Hinintay muna ng MMDA at Pasig rescue team ang deklarasyon ng mga doktor na patay na ang mga naipit na biktima bago tuluyang inalis ang mga ito sa nadurog na sasakyan.

Samantala, tinutugis na ang driver ng truck ng yelo na nakadisgrasya sa mga biktima.—sa panulat ni Drew Nacino

Papayagan pa rin ang food delivery sa mga lugar na nakasailalim sa granular lockdown.

Ito ayon kay Department of the Interior and Local Government (DILG) Spokesperson Usec. Jonathan Malaya kung saan hanggang sa border lamang ng isinarang lugar papayagang maghatid ng pagkain ang mga food delivery rider.

Tiniyak naman ni Malaya na makakatanggap ng food packs ang mga maaapektuhan ng granular lockdown.

Samantala, hindi naman papayagang makalabas ang may mga schedule ng bakuna sa mga lugar na isasailalim sa granular lockdown.

Ayon kay Malaya, dapat na matapos muna ang ipinapatupad na granular lockdown para makapagbakuna kontra COVID-19. —sa panulat ni Hyacinth Ludivico

Bahagyang umangat ang reproduction number o hawahan ng COVID-19 sa NCR sa 1.42 kung saan sumirit din sa 19% ang bilang ng kaso ng virus.

Ipinabatid ito ni Prof. Guido David, Fellow ng OCTA Research Group matapos ihayag na nasa halos 9,000 ang daily average ng COVID-19 cases sa Metro Manila.

Nangunguna ang Metro Manila sa nakapagtala ng pinakamataas na bagong kaso ng COVID-19 na nasa 9,061 na ayon kay David ay seryoso at maituturing na record.

Sinabi ni David na kabilang sa sampung lugar na nakapagtala ng pinakamataas na bagong kaso ng COVID-19 nung Sabado, Setyembre 11 ang Quezon City – 1449, Maynila – 892, Caloocan City – 869, Pasig City – 748, Taguig City – 642, Paranaque City – 547, Makati City – 534, Valenzuela City – 439, Davao City – 409 at Iloilo City – 402.

Kasabay nito, ipinakita ni David ang Average Daily Attack Rate (ADAR) ng ilang asian countries hanggang Setyembre 10, base sa data ng John Hopkins University kung ang Pilipinas ay may orange mark na nangangahulugang nasa high risk ito sa 19,986 new cases. —sa panulat ni Hyacunth Ludivico

Isinulong ng mga miyembro ng House Appropriations Committee na ibalik ang tinapyas na pondo mula sa panukalang 2022 Budget ng Commission on Elections.

Ito’y sa gitna ng preparasyon ng Comelec para sa 2022 national elections kahit may COVID-19 pandemic.

Mula sa hirit na P41-B ng Comelec, sumadsad ito sa P26-B matapos tapyasan ng Department of Budget and Management ng P15-B.

Ayon kay committee chairman at Surigao Del Norte Rep. Francisco Matugas, dapat lang ibalik ang kinaltas na pondo lalo’t malaking hamon ang pagsasagawa ng halalan ngayong may pandemya.

Nagkaisa ang mga committee member na mas makabubuting ibalik ang pondo upang madagdagan ang pambili ng mga makina upang mabawasan ng 800 botante ang bawat cluster precinct at maiwasan ang hawaan.

Dagdag pondo rin ang kailangan para sa pag-hire ng karagdagang gurong magsisilbing election board officer bukod pa sa hiling nilang dagdag hazard pay at honorarium. —sa panulat ni Drew Nacino

Inihayag ni Department of Education Secretary Leonor Briones na bumuti ang edukasyon sa bansa sa ilalim ng administrasyong Duterte.

Aniya, nakapagpatayo ang kagawaran ng mas maraming imprastraktura at pasilidad at nagkaroon ng mga modernong paraan ng pagtuturo sa nakalipas na limang taon.

Maliban dito, sinabi pa ng kalihim na mula nang maupo sa puwesto ang Pangulo ay tumaas ang pondong inilalaan para sa edukasyon.

Tumaas din aniya ang sahod ng mga guro kung saan ang may pinakamababang level position ay tumatanggap na ng P23,877 kada buwan kumpara sa dating P19,077 na sweldo kada buwan. —sa panulat ni Hyacinth Ludivico

Papayagan pa ring manatili sa  bansa ang mga “overstaying” na dayuhan matapos suspindihin ng Bureau of Immigration (BI) ang Order to Leave (OTL).

Ayon kay Immigration Commissioner Jaime Morente, ang suspension order ay dahil sa epekto ng COVID-19 sa mga lokal at internasyunal na biyahe.

Saklaw nito ang mga may hawak ng temporary visitor’s visa na umabot na ng 24 na buwan na maximum stay sa mga ‘visa required’ nationals at 36 na buwan sa mga “non-visa required” mula noong Marso 1, 2020.

Ipatutupad rin ito sa mga foreign national na dati nang overstaying sa bansa bago pa sumapit ang nasabing petsa.

Gayunman, sinabi ng BI na kailangan pa rin ng mga dayuhan na magpa-assess at bayaran ang immigration fees at penalties. —sa panulat ni Hyacinth Ludivico

Tiwala si Metropolitan Manila Development Authority (MMDA) Chairman Benhur Abalos na makakamit ng Metro Manila ang ‘herd immunity’ pagdating ng buwan ng Disyembre.

Aniya, ito ay dahil sa inaasahang 87.5% ng kabuuang populasyon ng rehiyon ang mababakunahan pagsapit ng nasabing buwan.

Ibinahagi ni Abalos na nasa 5,649,928 residente o 57.65% ng populasyon ng Metro Manila ang nakakumpleto ng bakuna hanggang nitong Setyembre 9.

Kaugnay nito, hiniling ni Abalos kay Pangulong Duterte ang posibilidad na bigyang-luwag na ang mga bakunado sa NCR. —sa panulat ni Hyacinth Ludivico

Aabot na sa 98.39% ang naipamahaging cash aid sa mga residenteng naapektuhan ng Enhanced Community Quarantine sa National Capital Region.

Ayon kay Interior Secretary Eduardo Año, tinatayang P11 bilyon na ang halagang ipinamahagi sa mga benepisyaryo.

Karamihan din anya sa mga LGU ay naka-kumpleto na ng kanilang distribusyon.

Una nang namahagi ang gobyerno ng tig-isanlibo hanggang P4K tulong pinansiyal para sa mga low-income individuals at families na apektado ng ECQ na ipinairal sa Metro Manila mula Agosto 6 hanggang 20.—sa panulat ni Drew Nacino