HEADLINES

Sumirit ang presyo ng ilang uri ng isdang dagat matapos ang pananalasa ng magkasunod na bagyo.

Sa Litex market sa Quezon City, nasa P160 hanggang P200 na ang kada kilo ng bangus mula sa dating P140 habang ang tilapya ay P110 mula sa dating P90 kada kilo.

Sumampa naman sa P240 ang kada kilo ng galunggong mula sa dating P160 kada kilo sa Muñoz Market habang tumaas din ang presyo ng ilang gulay gaya ng siling labuyo na P600 mula sa dating P100 at sibuyas, P140 mula sa dating P120 kada kilo.

Ayon sa Department of Agriculture, nagsimula na ang closed-fishing season kaya’t kaunti ang suplay ng isda sa mga pamilihan.

Samantala, bumaba naman ang presyo ng ilang highland vegetable tulad ng bell pepper na nasa P200 mula sa dating P300 kada kilo; cauliflower, P250 mula sa dating P300 kada kilo; repolyo at pechay baguio, P160 mula sa dating P120 kada kilo.

Sa kabila nito tiniyak ng DA na mayroon pa namang ibang lugar na mapagkukunan ng suplay ng isda at gulay partikular ang mga rehiyong hindi naapektuhan ng bagyong Jolina at Kiko.—sa panulat ni Drew Nacino

Nakatakdang ilabas ngayong araw o bukas ang guidelines para sa bagong COVID-19 alert level system na magiging batayan sa ipatutupad na granular lockdown sa Metro Manila.

Ayon kay Interior Undersecretary at spokesman Jonathan Malaya, bagaman plantsado na, may ilan pang probisyon sa alert level system ang pinag-dedebatehan sa IATF.

Sa ilalim ng sistema, ang alert level 4 ang pinaka-mataas na risk classification kung saan bawal ang dine-in, personal services at mass gatherings.

Pagbabawalan din aniya ang paglabas ng bahay ng mga authorized persons outside residence kabilang ang mga essential worker.

Hindi rin papayagang lumabas maging ang mga may vaccination schedule kaya’t kailangang maghintay muna ang mga itong matapos ang quarantine period.—sa panulat ni Drew Nacino

Nasa labas na ng Philippine Area of Responsibility ang bagyong Kiko na may international name na Chanthu.

Huling namataan ng Pagasa ang bagyo sa layong 525 kilometers, Hilaga ng Itbayat, Batanes.

Bahagya itong humina taglay ang lakas ng hanging aabot sa 165 kilometers per hour at pagbugso na hanggang 205 kilometers per hour.

Kumikilos ang bagyo pa-Hilaga sa bilis na 25 kilometers per hour o patungong Mainland China.

Samantala, bagaman humina na ang Habagat, makaaapekto pa rin ito at magdadala ng mahina hanggang katamtamang pag-ulan sa Ilocos Region, Batanes, Babuyan Group of Islands, Abra, Benguet, Zambales at Bataan.—sa panulat ni Drew Nacino

Asahan na rin bukas ang panibagong price increase sa mga oil product.

Ayon sa DOE, 0.30 hanggang 0.40 sentimos ang posibleng dagdag sa kada litro ng gasolina; 0.25 hanggang 0.30 sentimos sa diesel habang 0.10 hanggang 0.20 sentimos sa kerosene.

Ito na ang ikatlong sunod na linggong price hike ng mga kumpanya ng langis.

Bukod sa mga produktong petrolyo, una nang inanusyo ng Meralco ang dagdag-singil naman sa kuryente ngayong buwan.—sa panulat ni Drew Nacino

Sumampa na sa 17 ang bilang ng nasawi sa pananalasa ng bagyong Jolina.

Kinilala ang dalawa sa mga biktimang sina Almario Mingueto, 63 anyos at bobby villavicencio, 46 anyos, kapwa mangingisda at residente ng barangay Tungib, Buenavista, Marinduque na nalunod sa kasagsagan ng bagyo.

Tinaya naman ng NDRRMC sa 81,000 pamilya o higit 313,000 katao ang naapektuhan sa regions 3, 4-A, 4-B, 5, 6, 8, 12 at Metro Manila.

Aabot na sa P613-M ang halaga ng pinsala ng bagyo sa sektor ng agrikultura.

Samantala, umabot na sa mahigit 2,700 pamilya o 11,100 katao na ang naapektuhan ng bagyong Kiko sa Ilocos, Cagayan Valley, Central at Cordillera Administrative Regions.—sa panulat ni Drew Nacino

Posible pa ring makapagtala ang Pilipinas ng 30,000 na bagong kaso ng COVID-19 sa isang araw sa mismong katapusan o bago matapos ang buwan.

Ayon sa OCTA research group, nasa 14% na ang average growth rate o bilis ng pagdami ng mga kaso, indikasyon na tumataas nang 14% ang COVID cases kada linggo.

Sa tantsa ni Dr. Guido David ng OCTA, nasa 20,000 ang average cases ng mga nagkakasakit kada araw ngayon.

Ito’y makaraang pumalo sa 26,303 ang bagong kaso noong Setyembre 11 na pinakamataas na bilang ng mga COVID-19 cases sa isang araw mula nang mag-umpisa ang pandemya.

Sumampa rin sa all-time high na 9,061 ang bagong kaso sa NCR batay sa datos ng Department of Health o 34% ng kabuuang 26,303 cases noong Sabado.—sa panulat ni Drew Nacino

Pansamantalang sinuspinde ng Department of Foreign Affairs o DFA ang operasyon ng consular office sa Santiago City sa Isabella province, at Tagum City sa Davao Del Norte matapos magpositibo sa COVID-19 ang ilang mga tauhan nito.

Ang operayon ng DFA Consular Office sa Tagum City, na matatagpuan sa Gmall ng Tagum shopping center ay suspendido mula Setyembre 10 hanggang 14, habang suspendido naman ang DFA office sa Robinsons place Santiago sa Isabela simula Setyembre 13 hanggang 17.

Ang mga apektadong aplikante na may appointment o schedule sa Santiago office ay makakatanggap ng email na may detalye ng kanilang alternative passport appointment.

Habang ang mga aplikante na may appointment sa Tagum City ay bibigyan naman ng bagong schedule na mula Setyembre 15 hanggang 24.

Magpapatuloy naman ang regular operations ng DFA Tagum office sa Miyerkules, Setyembre 15.—sa panulat ni Hya Ludivico

Aabot na sa 5.6B doses ng COVID-19 vaccine ang itinurok simula nang sumiklab ang pandemya sa China.

Sa datos ng World Health Organization, ang nabanggit na bilang ay katumbas ng 41.7% na ng populasyon ng mundo.

Mula sa 214 na bansa, nasa 142^nd rank ang Pilipinas pagdating sa COVID-19 vaccinations per 100 people o 33.97 doses na itinuturok kada 100 tao.

Nanguna ang Gibraltar sa mga territory o bansang may pinaka-mataas na vaccination rate na sinundan ng Seychelles, Pitcairn islands, United Arab Emirates, Uruguay, Israel, Chile, Malta, Qatar at Iceland.—sa panulat ni Drew Nacino

Nanindigan ang isang grupo ng mga doktor na hindi lockdown ang solusyon sa pandemya.

Ayon sa Philippine Society of General Internal Medicine o PSGIM, pansamantalang solusyon lamang ang lockdown at dapat na pagtuunang pansin ang ligtas na pagbubukas ng ekonomiya ng bansa.

Nawagan din ang grupo sa pamahalaan na bumuo ng isang lipunan na kayang mamuhay kasama ang virus.

Nagpahayag naman ng suporta ang PSGIM kay Philippine College of Physicians President Dr. Maricar Limpin at iba pang mga doktor na na nananawagang isailalim muli sa dalawang linggong ECQ ang NCR dahil sa pagtaas ng mga kaso ng COVID-19.—sa panulat ni Hya Ludivico

Nakapagtala ng panibagong record high single day COVID-19 cases ang Bicol region.

Ito ay matapos na makapagtala ng 455 bagong mga kaso ng COVID-19 sa lalawigan dahilan para umabot na sa 28,914 ang kabuuang bilang ng mga kaso sa rehiyon.

Pinakamaraming naitala na mga bagong kaso sa Camarines Sur na may 287 new cases.

Samantala, umabot naman sa 21,488 ang kabuuang bilang ng mga gumaling sa sakit matapos makapagtala ng 171 new recoveries.

Habang pumalo na sa 992 ang death toll sa rehiyon matapos na madagdagan ito ng lima kung saan dalawa dito ay mula sa Albay at tatlo naman sa Sorsogon.—sa panulat ni Hya Ludivico