HEADLINES

Sumampa na sa 1.42% ang reproduction rate ng COVID-19 sa Metro Manila.

Ayon kay Prof. Guido David ng OCTA research group, sumirit din sa 19% ang bilang ng kaso o nasa 9,000 na ang daily average cases.

Nangunguna ang NCR sa nakapagtala ng pinakamataas na bagong kaso ng COVID-19 na seryoso na aniya at maituturing na record-breaking.

Kabilang sa nakapagtala ng pinakamataas na kaso noong Sabado ang mga lungsod ng Quezon, 1,449; Maynila, 892; Caloocan, 869; Pasig, 748; Taguig, 642; Parañaque City, 547 at Makati, 534;

Base naman sa datos ng Johns Hopkins University, nasa orange mark na ang Pilipinas na nangangahulugang nasa high risk na ang bansa.—sa panulat ni Drew Nacino

Okupado na ang 77% ng Intensive Care Unit o ICU beds sa bansa.

Ayon sa Department Of Health, 78% ng kabuuang 1,400 ICU beds sa NCR ang nagamit na kung kaya’t inilagay na ito sa high-risk category.

Samantala, 73% naman ng 16,000 ward beds sa buong bansa ang okupado na rin, habang ang 72% ng kabuuang 4,400 ward beds san NCR ang kasalukuyang ginagamit.

Maliban dito, 57% ng 3,300 mechanical ventilators sa mga ospital ang nagamit na, habang 61% ng 1,200 ventilators sa metro manila ay ginagamit na rin.—sa panulat ni Hya Ludivico

Nagpa-panic na umano si Pangulong Rodrigo Duterte.

Ito, ayon kay senate blue ribbon committee chairman Richard Gordon, kaya’t inuupakan siya habang nagsasagawa ng imbestigasyon sa COVID-19 response fund ng DOH.

Matagal na aniyang ugali ni Pangulong Duterte na resbakan ang mga inaakala nitong kaaway ng administrasyon.

Nagpa-panic siya(Pangulong Duterte) ngayon, talagang…ugali niya ‘yan eh. Hindi ko maintindihan, dapat may dignidad ang Pangulo, mayroon kang programa mister President, nag-uulat ka sa taong bayan. Ang ginagawa mo naninira ka tinitira mo lahat ang akala mo kalaban mo at maaanghang ang sinasabi mo. Dapat mag-ulat ka nalang. Ang totoo niyan hirap na hirap na ang tao, nagugutom ang tao, walang trabaho ang tao at nagkakasakit ang tao…hindi mo pinag-uusapan ‘yun. Ang sinasabi mo magaling ako nagbabakuna ako, tumutulong kami dyan…bakit ‘di niyo i-unite ang tao?

Umapela naman ang senador sa punong ehekutibo na huwag pag-initan ang mga ahensyang tumatalima sa kanilang tungkulin tulad ng COA na nagbunyag ng mga katiwalian umano sa gobyerno.

Bakit niyo pinag-iinitan ‘yung mga taong nag-iimbestiga…kaya tuloy lumalabas na talagang may tinatago kayo, hindi naman namin sinasabi na guilty kayo pero lumalabas na napapaso kami d’un sa mga tao ninyo na hindi nagsasabi ng totoo at nahuhuling nagsisinungaling at hindi lang limpak, bulto-bultong kwarta ang nakukuha na hindi alam ng taong bayan…kaya pala walang ayuda, kaya pala walang hanap-buhay, kaya pala yung mga doktor, nag-aaklas na yung mga nurses, yung mga SRA hindi nila nakukuha, kaya pala nagugutom ang tao. So masama bang gawin namin ang tungkulin namin?

Si Senador Richard Gordon sa panayam ng DWIZ.—sa panulat ni Drew Nacino

Bahagyang humupa ang sitwasyon sa Cebu City sa gitna ng patuloy na pagbaba ng bilang ng dinadapuan ng COVID-19.

Sa datos ng Cebu City emergency operations center, nasa 1,700 na lamang ang aktibong kaso hanggang nitong Sabado kumpara sa 3,000 noong Agosto.

Walong ospital naman ang nasa safe zone o hanggang 60% ; dalawa ang nasa moderate; dalawa ang nasa high risk habang tatlo ang nasa critical zone.

Gayunman, umaabot pa rin sa tatlong three digits ang average daily rate at nasa critical level pa rin ang occupancy rate sa ibang ospital habang nananatiling mataas ang death rate.

Samantala, nasa 10.80% ang daily positivity rate sa Cebu City kumpara sa ideal positivity rate na 5% na itinakda ng World Health Organization.—sa panulat ni Drew Nacino

Nagpapatuloy ang negosasyon ng gobyerno para sa  pagbili ng reformulated booster jabs na inirekomenda kontra sa nagsusulputang COVID-19 variants.

Ayon kay National Task Force against COVID-19 chief implementer, secretary Carlito Galvez, palalakasin ng next-generation vaccine boosters ang efficacy ng mga bakuna.

Nakikipag-usap na aniya si finance secretary Carlos Dominguez sa apat na manufacturers para sa procurement ng booster shots.

Una nang inihayag ni Galvez na pina-plantsa na ng pamahalaan kasama ang multilateral partners nitong World Bank, Asian Development Bank at Asian Infrastructure Investment Bank ang ikalawang bugso ng vaccine procurement.

Naglaan na ang gobyerno ng P2.2-B sa pagbili ng suplay ng booster shots sa susunod na taon. —sa panulat ni Drew Nacino

Muling umapela si Trade Secretary Ramon Lopez na payagan na sa dine-in at personal care services ang mga edad 65 pababa na fully-vaccinated sa oras na ilabas ang guidelines para sa COVID-19 restrictions.

Ipinaliwanag ni Lopez kay Pangulong Rodrigo Duterte na panahon na para subukan ang ibang paraan upang tugunan ang problema na dala ng COVID-19.

Gayunman, delikado pa rin aniya sa mga edad 65 pababa kapag tinamaan sila ng COVID-19 dahil puwedeng maging severe at critical, kaya’t nasa health experts ang pasya kung maglalagay ng age cap.

Ipinunto ng kalihim na mahalagang mabuksang muli nang ligtas ang dine-in at personal care services para sa mga nakakumpleto na ng bakuna dahil maraming manggagawa sa mga naturang industriya na aabot sa dalawang milyon.

Maaari namang simulan ang pilot-testing nito sa National Capital Region.—sa panulat ni Drew Nacino

Isinailalim muli sa mas maluwag na modified enhanced community quarantine ang Tugeguarao City, Cagayan, simula ngayong araw hanggang Setyembre 22.

Gayunman, nilinaw ni Mayor Jefferson Soriano na mananatili ang mahigpit na health protocols sa lungsod.

Ayon kay Soriano, kailangan pa ring gumamit ng quarantine pass sa paglabas ng bahay at pagpunta sa mga establisimyento habang 10% capacity lamang ang pinapayagan sa restaurants.

Pinapayagan na ang pagbili ng alak, subalit ipinagbabawal ang pag-inom sa labas habang alas-10 ng gabi hanggang alas-4 ng madaling araw ang curfew.

Una nang isinailalim ang Tuguegarao sa ECQ noong Agosto 12.

Aabot na sa 900 ang active cases sa lungsod kabilang ang anim na namatay noong Sabado. —sa panulat ni Drew Nacino

Hinimok ng Philippine Pediatric Society (PDS) at Pediatric Infectious Disease Society of the Philippines (PIDSP) ang gobyerno na tapusin muna ang vaccination ng adult population bago bakunahan ang mga menor-de-edad.

Ayon sa PPS at PIDSP, dapat ding ikonsidera ang suplay ng bakuna at grupo ng mga may comorbidities.

Bago anila ikonsidera ang pagbabakuna sa mga edad 12 pataas ay dapat munang makamit ang sapat na bilang ng mga bakunado sa mga priority adult group.

Maaari namang simulan ang vaccine rollout sa mga lugar na may mataas na transmission rate sa mga batang nasa ilalim ng A3 o may comorbidities at A1 category o mga anak ng mga frontliner.—sa panulat ni Drew Nacino

Hindi iaanunsyo ang ipapatupad na granular lockdown sa mga lugar na may mataas na COVID-19 cases.

Ito ang inihayag ni DILG Undersecretary Jonathan Malaya dahil aniya kung aabisuhan ang mga residente ay mag-aalisan ang mga ito sa kanilang lugar.

Una nang sinabi ni Interior Undersecretary Epimaco Densing III na aabisuhan ang mga residente 24 oras bago ang pagpapatupad ng  lockdown.

Tiniyak naman ng dilg na bakunado ang lahat ng pulis na itatalaga sa mga lugar na isasailalim sa granular lockdown—sa panulat ni Hya Ludivico