HEADLINES

Pansamantalang isinara ang Philippine Red Cross logistics multi-purpose center Mandaluyong swab and saliva sample collection center makaraang mag-positibo sa COVID-19 ang mahigit 30 kawani nito.

Ayon sa PRC, nagsagawa ng disinfection sa nasabing pasilidad kahapon at tinugunan ang pagtaas ng kaso sa sample collection units and molecular laboratories.

Karamihan sa mga kawaning nagpositibo ay sample collectors na lantad araw-araw sa virus na dala ng kanilang mga kliyente.

Inabisuhan naman ng red cross ang mga naka-book sa Mandaluyong na magtungo sa ibang swab at saliva collection centers sa port area sa Maynila o  red cross chapter offices.

Kailangan lamang ipakita ang proof of payment o magtungo sa PLMC-Mandaluyong ngayong araw mula alas-8 ng umaga.—sa panulat ni Drew Nacino

Nilinaw ng Meralco na hindi kasama sa puputulan ng kuryente ang lahat ng consumer na nasa ilalim ng granular lockdowns sa Metro Manila.

Ito’y sa oras na magbalik ang disconnection activities ng Meralco sa mga consumer na may unpaid bills makaraan ang Setyembre 15.

Sa nabanggit na petsa magtatapos ang implementasyon ng modified enhanced community quarantine at papalitan na ng bagong quarantine protocol sa NCR.

Sa sandaling isailalim ang Metro Manila sa general community quarantine ay balik na sa pamumutol ng kuryente ang naturang power distributor.

Una nang inanunsyo ni Meralco spokesman Joe Zaldarriaga na may taas-singil sila ngayong buwan na aabot sa 0.10 sentimos kada kilowatt hour o dagdag P21 sa mga kumokonsumo ng 200 kilowatt hour.—sa panulat ni Drew Nacino

Pinayuhan ng Philippine College of Physicians (PCP) ang Department of Health na ayusin ang kanilang reporting system dahil sa hindi tugmang datos sa kapasidad ng COVID-19 beds sa tunay na sitwasyon ng mga ospital

Partikular na tinukoy ni PCP President, Dr. Maricar Limpin ang ulat ng DOH na naglalaro sa 70% ang kapasidad ng COVID-19 Intensive Care Unit, regular wards at emergency rooms.

Ayon kay Limpin, iba ang sinasabing naturang ulat sa nakikita nila sa ospital na punung-puno ng mga pasyente.

Bukod sa mga pagamutan sa Metro Manila, marami na rin aniyang ospital sa Calabarzon maging sa Cebu ang nag-uulat sa kanila ng parehong sitwasyon at kakapusan sa mga respirator at oxygen.—sa panulat ni Drew Nacino

Nagsalita na ang Philippine Red Cross sa pahayag ni Pangulong Rodrigo Duterte na dapat i-audit ang pondo ng PRC partikular ang mga donasyong nagmumula sa gobyerno.

Ayon sa red cross, sila ay tumatanggap ng mga donasyon mula sa ahensya ng pamahalaan bilang isang humanitarian organization.

Ang paggamit anila sa nasabing pondo ay alinsunod sa mga likidasyon ng mga ahensya ng donor at mga pag-uulat o reportorial requirements.

Nilinaw ng PRC na ang mga ahensyang ito ay isinasailalim sa taunang pag-audit ng Commission On Audit.—sa panulat ni Drew Nacino

Nasabat ng Bureau Of Customs ang nasa 7k bundle ng ukay-ukay mula South Korea.

Naharang ng BOC sa port of cebu ang naturang kontrabando na nagkakahalaga ng P2.3 milyon.

Magugunitang nakasabat din ang BOC – Cebu ng ng P4.5 milyon na halaga ng ukay-ukay mula naman sa Thailand.

Bagaman talamak ang bentahan ng mga used clothes sa Pilipinas, ipinagbabawal naman ang importasyon ng ganitong mga uri ng produkto at katulad na textiles sa ilalim ng RA 4653. —sa panulat ni Drew Nacino

Ibabalik na ng Department of Transportation (DOTr) ang libreng sakay para sa medical frontliners, essential workers at Authorized Persons Outside Of Residence simula na bukas.

Ayon kay Transportation Secretary Arthur Tugade, palalawigin ang naturang serbisyo sa labas ng Metro Manila sa ilalim ng ikalawang phase ng kanilang Service Contracting program.

Nasa 31.6 na milyong Pilipino anya ang tumangkilik ng libreng sakay sa unang bugso nito.

Alinsunod sa programa, susuwelduhan ang mga public utility vehicle operators at driver depende sa kanilang biyahe kada linggo.

Magugunitang naglaan na ang gobyerno ng P3 bilyon para sa libreng sakay sa General Appropriations Act para sa taong 2021.—sa panulat ni Drew Nacino

Sa halip na bukas, Setyembre 13, inanunsiyo ng Dagupan City Local Government Unit (LGU) na sa Oktubre 4 pa magbubukas ang klase sa pribado at pampublikong paaralan sa lungsod.

Batay sa executive order o EO no. 29, binanggit ng LGU na kasama sa postponement ang lahat ng school activities na nangangailangan ng face-to-face interaction at mass gatherings gaya ng pamamahagi ng self-learning modules at iba pang mga aktibidad na maituturing na health risk.

Sa kasalukuyan, mayroon nang halos 1,000 kaso ng COVID-19 sa lungsod ng Dagupan.

Isinailalim sa granular lockdown ang anim na barangay sa Bayugan City sa Agusan del Sur dulot ng dumaraming bilang ng mga kaso ng COVID-19.

Ayon sa Bayugan LGU, kabilang sa mga apektado ay ang Barangay Maygatasan, apat na sub-communities sa Poblacion, at tig-iisang sub-community naman sa mga barangay ng Taglatawan, Salvacion, Cagbas, at Calaitan.

Ang granular lockdown ay nagsimula ngayon, Setyembre 12, at magpapatuloy ang implementasyon nito hangga’t hindi inaalis ng lokal na pamahalaan.