HEADLINES

Aarangkada na bukas ang unang araw ng pasukan para sa school year 2021-2022.

Ayon kay Education Undersecretary Nepomuceno Malaluan, inaasahan nilang mas magiging maayos ang pagbubukas ng klase dahil ito na ang ikalawang taon ng implementasyon ng distance learning.

Sa ilalim ng kasalukuyang education scheme, mag-aaral ang mga estudyante gamit ang mga printed at digital modules, video conferencing, social media, telebisyon, at radyo.

Batay naman sa datos mula sa Department of Education (DepEd), halos 22 milyong estudyante na ang rehistrado para sa basic education sa mga pampubliko at pribadong paaralan na mas mababa kumpara sa 26.2 million students noong nakaraang taon.

Mabilis nang natutugunan ng Philippine Overseas Employment Administration (POEA) ang mga concerns ng mga Overseas Filipino Workers (OFWs).

Ito’y bunsod ng inilunsad nitong mobile application “Abizo OFW” na ginawa para sa mas mabilis na pagtanggap ng reklamo ng mga kababayan natin sa ibayong dagat.

Ayon kay Jeffrie Busog, Implementation Officer ng mobile app, may emergency red button ang kanilang app kung saan maaaring makipag-usap ang mga OFWs sa 24/7 support.

Ang “Abizo OFW app” ay maaaring i-download mula sa Google Playstore at App Store.

Isiniwalat ni Chief Presidential Legal Counsel Salvador Panelo na puwedeng dumulog sa korte ang administrasyong Duterte para obligahin ang Philippine Red Cross (PRC) na magsumite ng kanilang financial records.

Ginawa ni Panelo ang pahayag kasunod ng paulit-ulit na panawagan ni Pangulong Rodrigo Duterte kay PRC Chair at Sen. Richard Gordon na isapubliko ang kalagayang pinansiyal ng organisasyon.

Kasabay nito, kinuwestiyon naman ni Panelo ang aniya’y kawalan ng diskwento sa mga serbisyo ng PRC tulad ng COVID-19 testing.

Hinamon ni Executive Secretary Salvador Medialdea ang mga senador na magsampa ng kaukulang kaso laban sa gobyerno ukol sa umano’y overpriced na medical supplies.

Ayon kay Medialdea, mas maiging ipaubaya ng mga mambabatas sa mga eskperto ang pag-iimbestiga sa usapin upang magampanan din nila ang kanilang trabaho.

Giit ng kalihim, hindi magagampanan ng mga resources persons ang kanilang trabaho sa COVID-19 response kung aabalahin pa ang mga ito ng mga senador habang tumataas ang bilang ng mga dinadapuan ng virus.

Bukod sa pambu-bully na inaabot ng mga iniimbitahang government officials, sinabi ni Medialdea na pawang mga espekulasyon lamang ang nakikita mala-circus na mga pagdinig sa senado.

Sumirit na sa mahigit 2 milyon ang bilang ng mga gumaling sa Coronavirus disease 2019 o COVID-19 sa bansa.

Ito’y makaraang makapagtala ang Department of Health (DOH) ng nasa 25,000 na bagong recoveries.

Sa kasalukuyan, lampas 181,000 na ang bilang ng aktibong kaso.

Sumampa naman sa 2.2 milyon ang mga tinamaan ng virus dahil sa higit 21,000 na bagong kaso.

Samantala, halos 70 ang nasawi sa nakalipas na 24 na oras kaya’t umakyat na sa higit 35,000 ang death toll sa buong kapuluan.

Nakalabas na ng Philippine Area Of Responsibility (PAR) ang bagyong Kiko.

Gayunman, nakataas pa rin ang tropical cyclone wind signal no. 1 sa lalawigan ng Batanes.

Ayon sa Pagasa, pasado 1 ng hapon kanina ay nakalabas na ng bansa si Kiko.

Taglay pa rin ng bagyo ang lakas ng hanging aabot sa 175 kilometers per hour at pagbugsong aabot sa 215 kilometers per hour.

Makakaranas pa rin ng epekto ng bagyo ang Batanes tulad ng hangin at pulo-pulong pag-ulan at maging ang iba pang bahagi ng Luzon, kabilang ang Metro Manila.

Siyam na beses na mas mataas ang kontrata ng DOH sa Pharmally Pharmaceutical Corporation para sa medical supplies, kaysa budget ng Office of the Vice President (OVP) ngayong taon

Ayon kay Vice President Leni  Robredo, nasa halos P909-M lamang ang budget ng OVP na ginagamit pa nito sa COVID-19 response kumpara sa halos P9-B na kontrata ng DOH at Pharmally.

Sinabi ni Robredo na nakakagulat ang halaga ng nasabing kontrata na sobrang laki at pauna pa lamang ito dahil may dagdag pang lampas.

Binatikos ni Robredo ang pagbili ng mga naturang medical supplies at tila lumala pa ang mga alegasyon ng katiwalian ngayong pandemic.

Binakbakan ni Vice President Leni Robredo si Presidential Spokesman Harry Roque.

Sinabihan ni Robredo si Roque na wala itong karapatang i-bully ang medical frontliners na aniya’y nagbubuwis ng kanilang buhay para sagipin ang mga may sakit ng COVID-19.

Hindi aniya deserve ng mga doktor ang pag trato ni Roque sa kanila dahil marami na rin sa mga ito ang nawalan ng kasamahan dahil sa COVID-19.

Ayon kay Robredo, itinatag ang IATF para pakinggan ang concerns ng lahat ng sektor at kung hindi sang ayon si Roque, puwede namang sabihin ng maayos at hindi kailangang mambastos dahil ang mga opisyal ng gobyerno na tulad niya ay para katawanin ang taumbayan.

Binigyang diin ni Robredo na may karapatan ang medical frontliners na ilabas ang mga hinaing nito dahil kinatawan naman sila ng kanilang sektor.

Napanatili ng bagyong Kiko ang lakas nito habang kumikilos patungo sa karagatan, silangan ng Northern Taiwan.

Ang sentro ng bagyong Kiko ay pinakahuling namataan sa layong 395km. hilaga ng Itbayat, Batanes.

Taglay ng bagyong Kiko ang pinakamalakas na hanging umaabot sa 175km/hr sa gitna at may pagbugso na umaabot sa 215km/hr.

Ang bagyong Kiko ay kumikilos pa hilaga hilagang kanluran sa bilis na 20km/hr.

Inalis na ang iba pang storm signal dulot ng bagyong Kiko bagamat nasa Signal number 1 ang lalawigan ng Batanes.

Ang bagyong Kiko ay inaasahang lalabas ng Philippine Area of Responsibility (PAR) ngayong hapon.