HEADLINES

Target ng gobyerno na makapagbakuna ng 55-M COVID-19 vaccine doses pagsapit ng Oktubre.

Sinabi ni Vaccine Czar Carlito Galvez Jr. na maaari pa tiong madagdagan kung sakaling tataas ang storage capacity ng mga lokal na pamahalaan.

Sa kasalukuyan, aabot na sa 44-M doses ang na-administer na ng pamahalaan at inaasahang aakyat pa ito sa 45-M sa pagtatapos ng Setyembre.

“Manila Baywalk Dolomite Beach”.

Ito ang pormal na pangalan ng Dolomite Sand Beach sa Manila Bay.

Nilagyan na rin muna ng arko ang lugar nitong weekend na may nakasulat na pangalan ng pasyalan.

Makikita rin ang puting bakod sa kahabaan ng Baywalk.

Sa ngayon dahil nasa alert level 4 pa ang NCR, bawal muna ang pumasok sa beach area.

Ibinasura ng Korte Suprema ang petisyon ng Writ of Kalikasan na inihain ng isang grupo laban sa ginagawang pagsunog ng pamahalaan sa mga nakumpiskang Mighty cigarettes na may pekeng tax stamps noong 2017.

Batay sa desisyon ng SC, bigong mapatunayan na ang naturang aktibidad ay paglabag sa Environmental Laws ng Department of Environment and Natural Resources.

Binabatikos kasi ng grupong alyansa ng mga grupong haligi ng agham at teknolohiya para sa mamamayan ang ginagawang co-processing ng pamahalaan na pamamaraan na ginagamit para sirain ang mga nasabat na sigarilyo.

Sa co-processing, ginagamit ang mga waste bilang raw material o source ng enerhiya para palitan ang mineral resources at fossil fuel sa industrial process.

Tiniyak ng Malakaniyang na hindi kikilingan ni Pangulong Rodrigo Duterte ang Pharmally Pharmaceutical Corporation kapag napatunayang totoo ang sinasabing “nakaugalian” nang pagpapalit ng expiration date ng medical grade face shields.

Ayon kay Presidential Spokesperson Harry Roque, kailangan lang patunayan na pawang katotohanan ang mga sinasabing pandaraya sa manufacturing date at tiyak hindi ito kukunsintihin ng  Pangulo.

Dagdag pa ni Roque, mahalagang aniyang makapag prisinta ng mga patunay o ebidensya para suportahan ang mga sinasabi ni Pharmally Official Krizle Grace Mago upang makita kung titindig sa argumento ang mga sinabi nito.

Magugunitang kamakailan ay inamin ni Mago sa Senate Blue Ribbon Committee Hearing na pinapalitan  nila ang expiration dates para sa face shields na binili ng pamahalaan para sa mga medical frontliner.

Umakyat na sa tatlo ang kumpirmadong patay sa flash flood sa Tinubdan Falls sa Catmon, Cebu.

Ito’y matapos matagpuan ang bangkay ng isang babae na palutang-lutang sa karagatan ng Barangay Luyang, Carmen.

Ayon kay Police Senior Sergeant Ben Naveles, nakatanggap sila ng ulat mula sa isang mangingisda na nakakita sa naturang bangkay ng isang babae.

Sinabi ng Catmon Police na narekober na nila ang tatlong biktima sa naturang malagim na insidente.

Kinilala ang mga biktima na sina Jude Monterola, Jacel Alastra at ang anak nito na si Princess Alastra.

Kasama ng mga biktima ang iba pa nilang kaanak na nagpicnic sa isang waterfalls nang bigla na lamang rumagasa ang tubig baha sa nasabing talon.

Ikinukunsidera ng Department of Science and Technology – Food and Nutrition Research Institute (DOST-FNRI) ang Virgin Coconut Oil (VCO) bilang posibleng pandagdag lunas sa mga pasyenteng may COVID-19.

Ayon kay Dr. Imelda Agdeppa, Director ng DOST-FNRI, sakaling mayroon nang existing na gamot na naibigay sa pasyente ay maaari pa rin itong bigyan ng VCO na inaasahang makakatulong sa paggaling ng pasyente.

Ani Agdeppa, tapos na ang pag-aaral sa VCO na isinagawa sa Sta. Rosa, Laguna at nagawa na rin itong ipahayag sa isang international journal.

Naobserbahan umano sa pag-aaral na ang mga pasyenteng nakakainom ng VCO ay nakakarekober sa COVID-19 sa loob ng dalawang araw lamang, habang ang mga hindi naman nakakainom ng VCO ay karaniwang gumagaling matapos ang lima hanggang anim na araw.

Pormal nang ipinagharap ng kasong kriminal sa Cavite Prosecutor’s Office ang kadete ng Philippine National Police Academy (PNPA) na itinuturong nasa likod ng pagkamatay ng kaniyang underclassman.

Kasong paglabag sa Republic Act 11053 o Anti Hazing Law resulting to Homicide ang isinampa laban kay Cadet 2nd Class Steven Maingat sa pamamagitan ng electronic inquest dulot ng umiiral na protocol sa COVID-19.

Ayon kay PNPA Spokesperson P/LtC. Audie Gonzaga, humarap sa pagsasampa ng kaso ang ina ni Cadet 3rd Class George Carl Magsayo na si Ginang Carolina at ang kanilang abogado na si Atty. Leo Angelo Sagario.

Humarap naman sa panig ni Maingat ang abogado nito na si Atty. JG Udarbe.

Batay sa resulta ng imbestigasyon, Cardio – Respiratory Arrest ang sanhi ng pagkamatay ni Cadet Magsayo.

Maliban sa kasong kriminal, sinabi ni Gonzaga na tiyak na rin ang dissmissal ni Maingat sa PNPA batay naman sa kasong Administratibo na isinampa laban sa kaniya. —sa ulat ni Jaymark Dagala (Patrol 9)