HEADLINES

Kinundena ng China ang pagtawid ng isang British warship sa Taiwan Strait.

Patungong Vietnam ang H.M.S. Richmond nang mapadaan ito sa karagatan ng Taiwan matapos ang deployment sa East China sea bilang bahagi ng enforcement operations ng United Nations laban sa North Korea.

Ayon sa People’s Liberation Army, ang pagdaan ng nabanggit na barkong pandigma ay indikasyon ng masamang intensyon ng Britanya sa teritoryo ng China.

Agad namang nagdeploy ng air at naval assets ang China upang buntutan at balaan ang British warship.

Simula pa noong isang taon ay lumamig na ang relasyon ng Tsina at Britanya dahil sa iba’t ibang issue gaya ng pagpapasaklolo ng Hongkong sa U.K.—sa panulat ni Drew Nacino

Lusot na sa ikatlo at huling pagbasa sa Kamara ang house bill 10272 na layuning gawing standard ang retirement benefits, salary at privileges ng mga hukom at iba pang opisyal ng hudikatura.

Layunin din ng panukala na kilalanin ang kahalagahan ng papel ng iba pang Judiciary Officials.

Sa ilalim ng bill, entitled ang Judiciary Officials na may judicial rank sa lahat ng retirement benefits tulad ng tinatanggap ng mga hukom alinsunod sa Republic Act 910 na inamyendahan bilang R.A. 9946.

Kabilang sa house bill ang pagkakaloob ng benepisyo sa mga nagtatrabaho sa hudikatura na nagretiro na bago ang effectivity ng panukalang batas, kasama ang mga Judiciary Official na ginawaran ng judicial rank na nagretiro sa edad na 65.

Binura naman sa panukala ang probisyon na nag-di-disqualify sa mga retiree na tumanggap ng benepisyo sa oras na umupo bilang halal na opisyal.

Nakatakda namang isumite ng mababang kapulungan ng kongreso ang nabanggit na bill sa senado. —sa panulat ni Drew Nacino

Inilarga na ng mga kumpanya ng langis ang panibagong dagdag-presyo sa kanilang mga produkto, epektibo, simula ngayong araw.

Alas dose uno kaninang hatinggabi nang ipatupad ng Caltex ang dagdag 55 sentimos sa gasolina, 90 sentimos sa diesel habang 95 sentimos sa kada litro ng kerosene.

Epektibo naman kaninang ala sais ang kahalintulad na price increase ng mga kumpaniyang Petro Gazz, Shell, Seaoil, Petron, Phoenix petroleum at PTT Philippines.

Alas kuwatro naman mamayang hapon magpapatupad ng kanilang dagdag presyo ang kumpaniyang Cleanfuel.

Ito na ang ikalimang sunod na linggong nagpatupad ng price hike sa oil products.—sa panulat ni Drew Nacino

Nagtataka si Pangulong Rodrigo Duterte sa panibagong issue na inungkat ng senado hinggil sa sinasabing expired na face shields na binili ng Department Of Health sa Pharmally Pharmaceuticals Corporation.

Sa kanyang talk to the people kagabi, inihayag ni Pangulong Duterte na nalilito na ang mga Senador sa hindi matapos-tapos na imbestigasyon ng Senate Blue Ribbon Committee sa pangunguna ni Senator Richard Gordon.

Wala na anyang maungkat na issue ang mga Senador kaya’t pati ang faceshield ay pinagdidiskitahan.

Itong sila Gordon, obvious na wala ng ibang mahanap na pepwedeng ibato na issue against the Official of the Executives. Kaya ako, I am not bothered at all. Sabi ni Gordon… Gordon kung alam mo lang ang buhay ko, yours must be a gift with life kasi anak ka ng mayaman. He cannot differentiate the quality if you allegedly tampered with the certificate of production for the certificate of expiration. —sa panulat ni Drew Nacino

Inaprubahan na sa Senado ang batas sa pagpapaliban ng eleksiyon sa Bangsamoro Autonomous Region o BARMM sa susunod na taon.

Ang naturang panukala ay inaprubahan ng 21 Senador matapos humiling ang BARMM officials na iurong ang araw ng halalan sa kanilang lugar at huwag isabay sa araw ng 2022 national election.

Dahil dito, magkakaroon ng 3 year postponement ang BARMM election na gaganapin naman sa 2025.

Sa ngayon, hinihintay nalang ng BARMM officials ang pirma ni Pangulong Duterte sa naturang panukala.— sa panulat ni Angelica Doctolero

Muling hinimok ni Pangulong Rodrigo Duterte ang publiko na magpabakuna na kontra COVID-19, na isa anyang hakbang patungo sa pagbabalik-normal ng sitwasyon.

Ibinabala ng Pangulo na kung magmamatigas pa rin ang karamihan ay maaaring mapilitan ang gobyerno na gumamit ng police power upang puwersahin ang mga mamamayan na magpaturok.

Para naman sa mga kawani ng pamahalaan na tatangging magpabakuna, dapat anyang lumayas na lamang ang mga ito sa gobyerno.

Samantala, bagaman aabot na sa 20.3 milyon ang mga bakunadong Pilipino, aminado si Pangulong Duterte na maaaring abutin pa ng ilang taon bago bumalik sa normal ang pamumuhay ng mga tao.—sa panulat ni Drew Nacino

Isinailalim na sa State of Calamity ang lalawigan ng Samar matapos ang pananalasa ng bagyong Jolina noong Setyembre 6 hanggang 7.

Ayon sa Provincial Government, aabot sa kabuuang P294 milyon ang halaga ng pinsala na binubuo ng P199 milyon sa sektor ng agrikultura at P95 milyon sa non-government infrastructure.

Tinaya naman sa P13,100 kabahayan ang napinsala ng bagyo.

Magugunitang nag-landfall ang bagyong Jolina sa bayan ng Sto.Niño.—sa panulat ni Drew Nacino

Dalawa na ang patay habang isa ang nawawala makaraang tangayin ng flashfloods habang naliligo sa Tinubdan falls sa bayan ng Catmon, Cebu.

Kinilala ang mga nasawing biktimang sina Kent Jude Monterola, 17 taong gulang at Princess Alastra, 7 taong gulang habang pinaghahanap pa ang ina nitong si Jacel, 32 taon.

Nagkakatuwaan ang mga biktima habang lumalangoy sa Barangay Tabili pasado ala una ng hapon noong linggo nang biglang rumagasa ang tubig mula sa talon dahilan upang tangayin ang tatlo.

Ayon kay Patrolman Renmark Bantisil ng Catmon Municipal Police, unang natagpuan si monterola sa isang sewage sa Sitio Kansija, Barangay Flores, mag-a-alas 10 ng gabi noong linggo.

Mag-tatanghali naman kahapon nang marekober ang katawan ni Princess sa Sitio Kulo, Barangay Duyan.

Samantala, pinaalalahanan ni Bantisil ang publiko na mag-doble-ingat sa pagligo sa talon lalo’t posible ang flashfoods pagtapos ng malakas na ulan.—sa panulat ni Drew Nacino