HEADLINES

Naniniwala ang mayorya ng mga Pilipino na labag sa saligang batas ang pagkandidato sa pagka-Bise Presidente sa 2022 elections ni Pangulong Rodrigo Duterte, batay sa Social Weather Stations survey.

Sa Hunyo 23 to 26 survey o bago kumpirmahin ng pangulo  ang kanyang kandidatura, 60% ng respondents ang nagsabing labag ito sa batas at dapat anila munang amyendahan ang konstitusyon bago tumakbo sa pagka-Bise Presidente.

Nasa 39% naman ang sang-ayon sa pagtakbo sa pagka-Bise Presidente ni Pangulong Duterte dahil nais nilang magpatuloy ang pamamalakad nito sa gobyerno habang 1% ang undecided.

Isinagawa ang survey sa pamamagitan ng face-to-face interviews sa 1,200 adult respondents sa Metro Manila, Balance Luzon, Visayas at Mindanao.

Pinaka-maraming nagsabi na labag sa batas ang kandidatura ni Pangulong Duterte sa pagka-Bise Presidente ay mula sa balance Luzon, 65% ; Visayas, 59%; Metro Manila, 56 % at Mindanao, 53%.—sa panulat ni Drew Nacino

Posibleng manatili sa ilalim ng alert level 4 ang Metro Manila sa kabila ng unti-unting pagbaba ng COVID-19 cases.

Ito ang inihayag ng Department Of Health sa gitna ng pag-iingat nito sa interpretasyon sa datos dahil na rin sa mababang output ng testing laboratories.

Ayon kay DOH Epidemiological Bureau Director, Dr. Alethea De Guzman, nakapagtala ang NCR ng biglang pagbaba ng trend kung saan ang average daily reported cases ay bumaba ng 16% o 4,347 noong Setyembre 20 mula sa 5,145 noong Setyembre 13.

Sumadsad rin anya sa 0.8555 ang reproduction rate sa Metro Manila as of Setyembre 13.

Gayunman, 76% ng Intensive Care Unit beds ng NCR ay okupado as of Setyembre 24, na maituturing na high riskhabang ang bed utilization rate ay 63% o moderate risk at 59% sa mechanical ventilators.

Ipinunto ni De Guzman na kung pagbabatayan ang mga numerong ito ay posibleng manatili sa ilalim ng alert level 4 ang Metro Manila.—sa panulat ni Drew Nacino

Nasa ilalim na ng “moderate-risk” classification sa COVID-19 ang Pilipinas.

Ito, ayon kay DOH-Epidemiology Bureau Director, Dr. Alethea De Guzman, ay dahil nakapagtala na ang bansa ng two-week negative growth rate sa average ng bagong kaso ng COVID.

Nakapagtala anya ang bansa ng negative 4% sa nakalipas na isa hanggang dalawa linggo kumpara sa 27% noong unang linggo ng Setyembre.

Batay din sa datos ng  DOH, naabot ng bansaang peak noong ikalawang linggo ng setyembre na average daily reported cases na 20,946.—sa panulat ni Drew Nacino

Iimbestigahan na ng Department of Agriculture ang pagdagsa ng smuggled carrots sa mga pamilihan.

Ayon kay DA Spokesman Noel Reyes, makikipag-ugnayan sila sa Department of Trade and Industry, Bureau of Customs at Bureau of Internal Revenue upang maglunsad ng imbestigasyon.

Kabilang anya sa kanilang tinututukan ang Divisoria, Maynila kung saan napaulat na ilan umanong warehouse ang naglalabas ng puslit na gulay tulad ng carrots na ibinabagsak sa ilan pang palengke.

Binigyang-diin ng DA official na ang pagpasok ng mga sariwang gulay mula sa ibang bansa ay ipinagbabawal at tanging binibigyan ng permit ng bureau of plant industry ay frozen mixed at processed vegetables.

Samantala, binalaan naman ni Reyes ang publiko sa pagbili ng puslit na sariwang gulaylalo’t hindi dumaan ang mga ito sa food safety regulations.—sa panulat ni Drew Nacino

Nag-alok ng tulong si Pangulong Rodrigo Duterte sa naiwang pamilya ng nasawing painter na si Bree Jonson matapos matagpuang wala nang buhay sa loob ng banyo sa isang hotel room sa La Union.

Ayon sa lawyer ng pamilya Jonson na si Atty. Ma. Moreni Salandanan, si Pangulong Duterte din ang nakipag-ugnayan sa National Bureau of Investigation o NBI para tumulong sa pag-iimbestiga sa naturang kaso.

Isinasagawa na ng NBI ang second autopsy at isang parallel investigation sa nangyaring insidente.

Una nang sinabi ng pnp na ang 30-year old artist ay namatay dahil sa asphyxia at nagpositibo sa paggamit ng cocaine pero naniniwala pa rin ang ina ni Bree na may iba pang dahilan sa pagkamatay ng kaniyang anak.

Sa ngayon patuloy paring umaasa ang pamilya Jonson na makakamit nila ang katotohanan sa nangyaring krimen.—sa panulat ni Angelica Doctolero

Sang-ayon ang World Health Organization o WHO sa muling pagsasagawa ng face-to-face classes sa bansa.

Paliwanag ni WHO Country Representative Dr. Rabindra Abeyasinghe, kailangan ang face-to-face classes upang matugunan ang pangmatagalang pangangailangan sa edukasyon at kalusugan ng mga bata.

Importante rin aniya ito para sa kanilang mental development at psychosocial health.

Sinabi pa ni Abeyasinghe na may mga hakbang na rin naman upang maprotektahan ang mga bata laban sa COVID-19 gaya na lamang ng pagbabakuna sa mga guro.—sa panulat ni Hyacinth Ludivico

Isasailalim sa 14-days granular lockdown ang Villa Herzon Mental Health Center sa Antipolo City.

Ayon sa Anitpolo City Government, hindi muna tatanggap ng bisita at hindi magpapalabas ng staff at pasyente, maliban na lang kung kakailangan ng mga ito ng atensyong medikal.

Ito’y makaraang makapagtala ng kaso ng COVID-19 sa nasabing mental care facility na posibleng ikinahawa na rin ng iba pang mga empleyado nito.

Batay sa inilabas na ulat ni Antipolo City Mayor Andeng Ynares, 10 sa 31 na mga tauhan nito ay kinakitaan ng mga sintomas ng COVID-19 tulad ng ubo, sipon, pananakit ng lalamunan at katawan.

Agad na nagsagawa ng swab tests at contact tracing ang Local City health department sa lahat ng mga manggagawa at posibleng nakasalamuha ng mga ito.

Patuloy naman ang monitoring ng lokal na pamahalaan sa mga pasyente.—sa panulat ni Hyacinth Ludivico

Punuan na ang mga isolation facility sa Ilagan City, Isabela dahil sa patuloy na pagtaas ng mga kaso ng COVID-19 sa lungsod.

Ayon kay City Information Officer Paul Bacungan, puno na ang 10 isolation facilities at mga pagamutan sa lungsod at aniya’y karamihan sa mga nagpopositibo sa virus ay mga magkakapamilya na at hirap tukuyin ang source kung saan nahawa ang mga ito.

Aniya, halos mas marami pa ang mga bagong naitatalang kaso araw-araw kaysa sa mga nakakarekober sa sakit.

Kaugnay nito, nagtatayo na aniya ang lokal na pamahalaan ng mga karagdagang pasilidad na pagdadalhan sa COVID-19 patients at nagpatupad na rin ng lockdown ang LGU sa 35 Barangay.

Sa datos nitong Setyembre 27, mayroong 243 active cases ng COVID-19 sa Ilagan City, Isabela.—sa panulat ni Hyacinth Ludivico

Nadagdagan ng 121 ang bilang ng mga Pilipinong tinamaan ng COVID-19 sa ibang bansa.

Sa tala ng Department of Foreign Affairs o DFA, umabot na sa 23,277 ang kabuuang kaso ng COVID-19 na naitala mula sa 103 na bansa at rehiyon.

Nasa 13,465 naman ang mga Pinoy na gumaling na sa virus habang 1,387 ang namatay sa nasabing sakit.

Nananatiling may pinakamataas na confirmed COVID-19 cases sa mga Pilipino ang Middle East at Africa na may  13,101 infections, 926 deaths at 5,565 recoveries.

Mayroon namang 3,651 cases sa Europa, 5,489 cases sa Asia Pacific Region at 1,036 sa America.—sa panulat ni Hyacinth Ludivico