HEADLINES

Kabilang ang 17 menor de edad sa mga tinamaan ng COVID-19 sa Mandaluyong City.

Batay sa datos ng Mandaluyong City Health Department nitong Setyembre 26, sa 163 na mga bagong kaso, nabatid na 53 ang hindi pa nababakunahan kontra COVID-19 kabilang ang 17 kabataan.

Habang 31 sa mga ito ay asymptomatic, 19 ang nakararanas ng mild symptoms, at tatlo naman ang moderate symptomatic.

Kaugnay nito,  102 sa new COVID patients ay fully vaccinated at walo naman ang nakatanggap ng first dose ng bakuna kung saan karamihan sa mga ito ay asymptomatic at mild cases.

Sa ngayon, mayroong 1,042 COVID-19 active cases sa Mandaluyong City.—sa panulat ni Hyacinth Ludivico

Planong isailalim sa Enhanced Community Quarantine o ECQ ang San Fernando City, La Union simula Oktubre 1-14, upang mapigilan ang patuloy na pagtaas ng mga kaso ng COVID-19.

Ayon sa City Inter-Agency Task Force against COVID-19, ipatutupad ang nasabing quarantine status sa Biyernes, sa sandaling aprubahan na ito ng provincial government at ng regional IATF.

Paliwanag ni City Health Office Medical Officer Dr. Joseph Alves, mayroon ng kaso ng delta variant sa lugar, mahigit 100 frontliners na ang tinatamaan ng covid-19 at umabot na sa 100% ang utilization rate ng mga ospital at isolation facilities.

Maliban dito, sinabi pa ni Alves na maraming residente ang lumalabas ng bahay at tila walang pakialam sa virus.

Kaugnay nito, inatasan na ang lahat ng miyembro ng City COVID-19 Technical Working Group na madaliin na ang pagsasaayos at paghahanda ng kakailanganin para sa ipatutupad na lockdown.

Batay sa pinakahuling datos, umabot na sa 1,101 ang active cases ng COVID-19 sa San Fernando City, La Union.—sa panulat ni Hyacinth Ludivico

Sumampa na sa 36,029 ang kabuuang bilang ng COVID-19 cases sa Bicol matapos itong madagdagan ng 274 mga bagong kaso.

Pinakamaraming naitalang kaso sa Camarines Sur habang zero case naman sa Camarines Norte at Catanduanes.

Nadagdagan naman ng 99 ang mga gumaling sa sakit kung kaya’t umabot na sa 23,653 ang total recoveries.

Umakyat naman sa 1,086 ang death toll matapos makapagtala ng anim na panibagong nasawi sa virus kung saan lima ay mula sa Sorsogon at isa sa Camarines Sur.

Patuloy ang paalala ng Department Of Health  o DOH-Bicol sa mga residente na sundin ang health protocols kontra COVID-19.—sa panulat ni Hyacinth Ludivico

Kinumpirma ni Davao City Mayor Inday Sara Duterte-Carpio na nagpositibo sa Coronavirus Disease o COVID-19 si Davao City Representative Paolo “Pulong” Duterte.

Ayon kay Sara, hindi pa niya nakakausap ang kaniyang kapatid dahil nito lamang linggo nagpositibo sa Reverse Transcription-Polymerase Chain Reaction o RT-PCR test ang kaniyang kapatid.

Dasal naman ni sara ang agarang paggaling ni Pulong na ngayon ay nakaisolate sa isang ospital habang naka-under home quarantine naman ang kaniyang pamilya.— sa panulat ni Angelica Doctolero

Nagsasagawa na ng imbestigasyon ang mga tauhan ng MPD station 10 sa nangyaring panghohold-up ng isang suspek sa isang bangko sa Maynila.

Sa nakuhang impormasyon ng mga otoridad, gumamit ng motorsiklo bilang getaway vehicle ang suspek sa isang chinabank na sakop ng Paco, Maynila.

Wala namang nasaktan o nasugatan sa naganap na insidente at patuloy pang inaalam ng mga otoridad kung magkano ang halaga ng nakuha ng suspek.

Sa ngayon patuloy pang pinaghahanap ng mga otoridad ang salarin sa nagyaring panghohold up.— sa panulat ni Angelica Doctolero

Arestadong Quezon City Police District o QCPD ang apat na indibidwal kabilang na ang tatlong lolo sa ikinasang drug buy-bust operation ng pinagsanib pwersa ng Batasan Police Station 6 at District Drug Enforcement Unit sa bahagi ng no. 24-B Baesa Road, Brgy. Baesa, Quezon City.

Kinilala ang mga suspek na sina, Armando Enriquez, 60 years old,  Larry Maesa, 63 years old,  Valiant Rallos, 62 years old at Agnes Omorog, 46 years old.

Ayon sa mga otoridad, agad silang nagkasa ng surveillance matapos makatanggap ng report mula sa isang concerned citizen.

Nakuha sa mga suspek ang mahigit P350k na halaga ng iligal na droga kasama ang buy-bust money.

Sa ngayon, nakakulong na ang mga suspek na nahaharap sa kasong paglabag sa Republic Act 9165 o ang Comprehensive Dangerous Drugs Act of 2002.— sa panulat ni Angelica Doctolero

Arestado ang dalawang indibidwal matapos makumpiska ng mga tauhan ng Philippine Drug Enforcement Agency o PDEA ang nasa mahigit P2-M halaga ng shabu sa San Jose, Del Monte, Bulacan.

Kinilala ang mga suspek na sina Ton-Ton Kudarat, 31-anyos at Zanaira Ibra, 26-anyos.

Aon sa mga otoridad, aabot sa tatlong daang gramo ng shabu packed kasama ng marked money ang nakuha sa isang honda beat motorcycle.

Nahaharap ngayon sa kasong paglabag sa section 5 o sale of dangerous drugs, section 26 paragraph o ang conspiracy to sell ng Republic Act 9165 o Comprehensive Dangerous Drugs Act of 2002.— sa panulat ni Angelica Doctolero

Inihayag ni Transportation Secretary, Arthur Tugade na magbubukas ng direct at indirect jobs ang Philippine National Railways o PNR Bicol para sa mga kababayan nating apektado ng krisis bunsod ng COVID-19 pandemic.

Ayon kay Tugade, aabot sa 3,749 direct jobs at 25,000 indirect jobs ang mabibigyan ng trabaho sakaling matapos na ang proyekto ng PNR Bicol – Lucena station.

Dagdag pa ni Tugade, sa susunod na taon ay mas marami pang matutulungan ang pagsasagawa ng mga proyekto ng kanilang ahensya.

Bukod pa dito, lalago rin ang turismo at ekonomiya ng bansa partikular na ang Southern Luzon.— sa panulat ni Angelica Doctolero

Target ng Department Of Transportation o DOTr na maging partially operable na ang PNR station sa bahagi ng San Pablo, Candelaria, Lucena at pagbilao sa Quezon Province bago matapos ang termino ni Pangulong Rodrigo Duterte.

Ayon kay DOTr Secretary, Arthur Tugade, kaniyang ininspeksiyon ang mga nabanggit na lugar upang alamin ang mga kakulangan sa isinasagawang proyekto.

Aniya, nais ng pamahalaan na mapaikli ang oras sa biyahe ng mga pasahero mula Manila hanggang Bicol gamit ang regular trains.

Mula sa dating 14 hanggang 18 oras na biyahe ay magiging apat hanggang anim na oras nalang mananatili sa biyahe ang mga pasahero sa tulong ng PNR Bicol-Lucena station.— sa panulat ni Angelica Doctolero

Sisimulan na sa Abril 2022 ang operasyon ng Metro Rail Transit Line 7 o MRT-7 na ginastusan ng 63 bilyong pondo ng pamahalaan.

Nabatid na dumating sa bansa ang dalawang train set mula sa South Korea.

Ayon kay Department Of Transportation, o DOTR Secretary, Arthur Tugade, tuloy-tuloy na ang operasyon ng mga tren sa susunod na taon.

Kunektado ang naturang tren sa North Avenue  sa  Quezon City hanggang San Jose Del Monte sa Bulacan.— sa panulat ni Angelica Doctolero