HEADLINES

Namahagi ng tulong pinansyal sa mga medical frontliner, operator at driver ang pamahalaang lokal ng San Juan City.

Aabot sa 1,300 indibidwal ang nakatanggap ng tig-3K cash aid bilang tulong sa mga apektado ng banta ng COVID-19.

Ayon kay San Juan City Mayor, Francis Zamora, ginawa nila ang distribusyon bilang  pagkilala at pasasalamat sa katapangan at patuloy na pagbibigay serbisyo sa COVID-19 response at iba pang programa ng lungsod para labanan ang corona virus.— sa panulat ni Angelica Doctolero

Wala pang nakikitang datos ang gobyerno upang suportahan ang panawagan na ibaba na sa level 3 ang COVID-19 alert status sa National Capital Region, ngayong linggo.

Ayon kay Presidential Spokesman Harry Roque, maaari namang magbago ang alert level pero kailangan pa ng karagdagang batayan upang ibaba ito.

Sa kasalukuyan ay nasa ilalim ng alert 4 ang NCR hanggang Huwebes, Setyembre 30.

Noong isang linggo ay nakapag-ulat ang DOH ng 4,347 coronavirus infections sa metro manila sa isang araw kumpara sa peak na 5,714 daily cases mula Setyembre 5 hanggang 11,

Gayunman, bumaba ng 37,000 hanggang 248,000 ang output ng testing laboratories noong nakaraang linggo kaya’t nakikipag-ugnayan na ang DOH  sa local government units upang mabatid ang dahilan nito. —sa panulat ni Drew Nacino

Posibleng makamit ng NCR ang target na pagbabakuna ng 90% ng populasyon sa Disyembre 26.

Sa laging handa public briefing, inihayag ni MMDA Chairman Benjur Abalos na aabot na sa 7.1 milyon ang fully vaccinated sa Metro Manila na katumbas ng 72.65% ng target recipients.

Ayon kay Abalos, mahigit 8.6 milyon pa ang naghihintay ng second dose habang inaasahang tutungtong na sa 82% o 8 milyon ang fully vaccinated pagsapit ng Oktubre 26 .

Sa kabuuan, ang target anyang recipient ng COVID-19 vaccine sa NCR ay 9.8 milyon.—sa panulat ni Drew Nacino

Pumalo na sa 2,509,177 ang kabuuang COVID-19 cases sa bansa.

Ito’y makaraang makapagtala ang Department Of Health kahapon ng karagdagang 18,449 na bagong kaso ng COVID-19.

Umabot naman sa 21,811 ang nadagdag sa mga gumaling kaya’t sumirit na sa kabuuang 2,313,412 ang recoveries.

Sa nagdaang tatlong araw, walang naitalang namatay pero nakapagtala ng 93 deaths kahapon dahilan upang sumampa na sa kabuuang 37,494 ang death toll.

Samantala, bahagya pang bumaba ang aktibong kaso sa 158,169.—sa panulat ni Drew Nacino

Halos isang linggo bago ang filing ng Certificates Of Candidacy (COC) para sa 2022 elections, dinagsa ng mga national at local political leader ang membership ng Partido Federal ng Pilipinas o PFP kung saan inaasahang aanib din si dating Senador Ferdinand “Bongbong” Marcos.

Ayon kay PFP Secretary-General Tom Lantion, dumami ang mga kakandidatong nais maging miyembro nang malaman nilang magkakaroon ng espasyo si Marcos sa partido bilang Chairman at Presidential bet ng PFP.

Grupo-grupo anya ang mga bagong miyembrong nag-o-oath taking na kinabibilangan ng mga kilalang pulitiko mula sa tinaguriang “solid North” hanggang Metro Manila, Visayas at Mindanao.

Ilan sa mga nanumpa sina dating Quezon City 3^rd District Rep. Mat Defensor sa Annabel’s Restaurant sa Tomas Marato na pinagunahan ni lantion sa pamamagitan ng zoom.

Nag-oath taking din ang iba pang opisyal mula Valenzuela City, Cavite, Batangas, Batanes, Zamboanga at Masbate gaya ni Balud, Masbate Mayor Marilie Lim, Vice Mayor Ruben Jude; Councilors Melissa Aninang, Real Bajande, Roque Dela Cruz, Salvador Delfin Junior, Geilord Macuha, Jinky Nuevo, Serafin Sese Junior at Paulino Tacurda.

Sinaksihan ito nina Anakalusugan Partylist Rep. Mike Defensor, Sagip Partylist Rep. Rodante Marcoleta at Atty. Vic Rodriguez, na Executive Vice President at General Campaign Manager ng PFP at Chief of Staff ng dating Senador.

Ang PFP ang unang political party na nag-endorso sa kandidatura ni BBM o tinawag nilang “best bet mo” bilang Pangulo sa 2022 elections.

Bagaman wala pang pormal na pagtanggap mula mismo kay BBM, inihayag ni Rodriguez na tinitimbang pa ng dating mambabatas ang lahat ng posibilidad at i-a-anunsyo ang desisyon sa oras na matapos ang kanyang konsultasyon sa grassroots leaders ng bansa.—sa panulat ni Drew Nacino

Nagpasaklolo na ang Senate Blue Ribbon Committee sa National Bureau of Investigation o NBI.

Ito’y para hanapin ang Executive ng kumpaniyang Pharmally Pharmaceutical Corporation na si Krizle Mago.

Ayon kay Committee Chairman Richard Gordon, nag-aalala siya sa kalagayan ni Mago lalo’t hindi ito mahagilap ng mga tauhan ng Senado para padaluhin sa naging pagdinig kahapon.

Kinumpirma naman ni Justice Sec. Menardo Guevarra na inatasan na niya ang NBIpara tuntunin si Mago at maihatid agad ito sa Senado.

Magugunitang ibinunyag ni mago na dinaya nila ang gobyerno sa pagpapalit ng expiry dates ng mga face shield na binili sa kanila.

Nakapagtala na ang lalawigan ng Batanes ng unang nasawi dahil sa COVID-19 kasabay ng pagtaas din ng mga naitatalang kaso roon.

Isang 70 taong gulang na lalaki mula sa Basco ang sinasabing pinaka-unang nasawi sa sakit dulot ng COVID.

Ayon sa Batanes Provincial Government, Setyembre 25 pa pumanaw ang pasyente sanhi ng acute respiratory failure secondary to pneumonia.

Sa kabuuan, pumalo na sa 424 ang aktibong kaso ng COVID sa Batanes matapos makapagtala naman ng 76 bagong kaso.

Patuloy ang dagsa ng mga nagnanais magparehistro ngayong apat na araw na lang ang nalalabi bago ang deadline para sa voters registration.

Dahil sa dami ng mga tao, nagpasya ang tanggapan ng Commission on Elections o COMELEC sa lungsod ng Maynila na ilipat ito sa mga mall.

Bahagya ring nagkagulo sa Robinsons Place Otis nang pansamantalang ipatigil dito ang pagpapapasok ng mga nagnanais magpatala.

Nakatakdang talakayin na sa Bicameral Conference Committee ang panukalang batas na nagpapalawig sa voters registration matapos itong ipasa ng dalawang kapulungan ng kongreso.— ulat mula kay Aya Yupangco (Patrol 5)

Tiniyak ng Deparment Of Health o DOH na may nakalatag nang contingency plan sakaling may mga guro o school personnel na nagpositibo sa COVID-19.

Ito ang inihayag ni Health Spokesman Usec. Ma. Rosario Vergeire kasabay ng paglagda ng DOH at Education Department para sa joint memorandum circular para sa limited face-to-face classes.

Nilinaw din ni Vergeire na hindi na rin kakailanganing magpa-COVID test ng mga guro at estudyanteng lalahok sa limited face-to-face classes .

Gayunman, sinabi ni Vergeire na kakailanganin lamang ang COVID-19 test sakaling makaranas o makitaan ng sintomas ang mga guro at estudyante.

Lusot na sa ikatlo at huling pagbasa ng Senado ang panukalang palawigin pa ng isang buwan ang voter registration para sa 2022 Presidential at local elections.

23 Senador ang bumoto pabor sa Senate Bill 2408 na naglalayong i-urong sa Oktubre 31 ang voters registration mula sa kasalukuyang deadline na Setyembre 30.

Ayon sa mga Senador, dapat palawigin ang pagpaparehistro ng mga botante para maiwasan ang disenfranchisement ng mga boto.

Anila, marami ang gustong bumoto subalit hindi nabibigyan ng pagkakataon dahil sa sunud-sunod na lockdown dulot ng COVID-19 pandemic.—ulat mula kay Cely Ortega-Bueno