HEADLINES

Mariing pinabulaanan ng brodkaster at vlogger na si Raffy Tulfo na tatakbo siya sa pagka-Bise Presidente para sa 2022 national at local elections.

Ayon kay Tulfo, mataas ang respeto niya kay Pangulong Rodrigo Duterte kaya’t kaniyang tinanggihan ang alok ng mga pulitikong lumalapit sa kaniya.

Nilinaw din ni Raffy na hindi niya subscriber ang mahigit 42 milyon kungdi ng entertainment account ng isang broadcast company.

Kasunod nito, humingi ng paumanhin si Tulfo sa kaniyang mga kaibigan na mahigpit na taga-suporta ng Pangulo at sinabing misinformation lamang ang nabasa nila sa social media.

Naglabas na ng panuntunan ang Department Of Health o DOH hinggil sa pagpapatupad ng face-to-face classes sa mga paaralan.

Ayon sa DOH, nakapaloob sa panuntunan na hindi dapat lalagpas ng tatlong oras ang klase para sa kinder habang apat at kalahating oras naman para sa grades 1 hanggang 3 at senior high school.

Kailangang bakunado na rin ang mga guro kontra COVID-19 at dapat mahigpit ding ipatupad ang physical distancing.

Nasa 12 lamang din ang papayagan na mag-klase sa loob ng silid-aralan habang 16 lamang para sa grades 1 hanggang 3.

Habang 20 mag-aaral naman mula sa senior high school ang papayagan sa kada classroom.

Limitado lamang din sa dalawang buwan ang pilot testing para sa face-to-face classes na magiging salitan sa tig-isang linggo sa distance learning.

Blangko pa ang Department of Education o DEPED kung ilang guro ang magtuturo sa may 100 pampubliko at 20 pribadong paaralan na pagdarausan ng pilot testing ng face-to-face classes.

Gayunman umapela si Dr. Anna Ong-lim ng vaccine cluster ng pamahalaan na dapat ikonsidera ng mga guro at mga tauhan ng paaralan ang kaligtasan ng mga mag-aaral.

Ayon kay Lim, maituturing na game changer ang pagbabakuna kontra COVID-19 kaya dapat isaalang-alang ang kapakanan ng lahat.

Kasunod nito, pinamamadali ng Department Of Health o DOH ang pagbabakuna sa mga guro sa pribado at pampublikong paaralan upang matiyak na ligtas ang mga mag-aaral sakaling matuloy na ang face-to face classes.

Inaalam na ng National Disaster Risk Reduction and Management Council (NDRRMC) ang mga pinsalang hatid ng magnitude 5.7 na lindol sa Looc, Occidental Mindoro kaninang madaling araw.

Sa panayam ng DWIZ, sinabi ni NDRRMC Spokesperson Mark Timbal na patuloy silang nakikipag-ugnayan sa kanilang local counterparts partikular sa mga lugar na nakaramdam ng malakas na pagyanig.

Gayunman, handa naman ang NDRRMC sa mga kinakailangang tulong sakaling hingin ng mga apektadong lokal na pamahalaan.

Kinumpirma ni PNP Chief P/Gen. Guillermo Eleazar ang pagtatalaga niya kay P/Mgen. Alex Sampaga bilang bagong direktor ng Philippine National Police Academy (PNPA).

Ito’y kasunod ng pagkasawi ni Cadet 3rd Class George Carl magsayo na sinasabing biktima ng hazing sa loob ng akademiya.

Papalitan ni Sampaga bilang direktor ng PNPA si P/Mgen. Rhoderick Armamento epektibo sa Miyerkules, Setyembre 29.

Habang ililipat naman si Armamento sa iiwanang posisyon ni Sampaga bilang pinuno ng Directorate for Infomation and Communications Technology Management (DICTM).

Personal na nagpaabot ng pakikiramay si Philippine National Police (PNP) Chief P/Gen. Guillermo Eleazar sa pamilya ng kadete ng PNP Academy na biktima ng hazing.

Ito’y matapos bumisita si Eleazar sa burol ni Cadet 3rd Class George Carl Magsayo sa PNPA Compound sa Silang, Cavite.

Tiniyak din ni Eleazar sa naiwang pamilya ni Magsayo na ibibigay nila ang karampatang tulong gayundin ang mabilsi na resolusyon sa kaso.

Kasabay nito, siniguro rin ni Eleazar sa pamilya magsayo gayundin sa publiko na hindi nila hahayaang mamayagpag sa PNPA ang kultura ng karahasan sa loob ng akademiya.

Tiniyak ng Deparment of Health (DOH) na kanilang iniimbestigahan ang pagbubunyag ni Pharmally Executive Krizle Mago hinggil sa ginawang tampering ng production date sa mga biniling face shield ng gobyerno.

Ito’y ayon kay Health Sec. Francisco Duque, III sa pagdinig ng house Committee on Good Government and Public Accountability ngayong araw.

Ayon sa kalihim na batay sa kanilang Disease Prevention and Controlled Bureau, aabot sa 36 na buwan ang shelf-life ng face shield dahil sa styrofoam component nito.

Idinepensa rin ni Duque na naipamahagi at napakinabangan ng mga health workers at health facilities ang mga biniling face shield ng pamahalaan.

Tiwala naman si Sen. Riza Hontiveros na nasa ligtas na kalagayan ngayon ang Pharmally Executive na si Krizle Mago.

Ito’y ayon kay Hontiveros makaraang hindi na makontak si Mago ng mga taga-senado para dumalo sa nagpapatuloy na pagdinig ng Senate Blue Ribbon Committee ngayong araw.

Sinabi ng senadora na nakatanggap siya ng impormasyon na may komunikasyon si Mago sa ilang mga grupo kaya’t hindi rin aniya sila titigil na makausap ito.

Makabubuti aniya para kay Mago na huwag putulin ang linya ng komunikasyon sa senado dahil tiyak na bibigyan naman siya ng proteksyon nito mula sa mga nagnanais maghiganti sa kaniya. —sa ulat ni Cely Ortega Bueno (Patrol 19)

Muling ipinagpatuloy ng Senate Blue Ribbon Committee ang pagdinig nito kaugnay ng mga iregularidad sa pagbili ng pamahalaan ng medical supplies sa kumpaniyang Pharmally.

Hindi sumipot sa ikatlong pagkakataon ang executive ng Pharmally na si Krizle Mago matapos isiwalat nito na dinaya nila ang gobyerno sa pamamagitan ng pagpapalit ng expiration dates ng sinuplay nilang face shields.

Ayon kay Sen. Panfilo Lacson, nanghinayang siya nang hindi nito maisiwalat ng buo ang kaniyang mga nalalaman dahil may mga sumingit sa pagsagot nito sa kaniyang pagtatanong.

Gayunman, ang mga naisiwalat ni Mago sa naunang pagdinig ay mananatiling valid dahil under oath ang mga ito at bunga ng free will o hindi pinuwersa. —sa ulat ni Cely Ortega Bueno (Patrol 19)

Bahagyang tumaas ang COVID-19 reproduction number sa National Capital Region (NCR) batay sa datos ng OCTA Research Group.

Ayon kay Dr. Guido David, Research Fellow ng OCTA, nakapagtala sila ng 0.98 reproduction number kahapon kumpara sa 0.94 noong Sabado.

Kahapon, nakapagtala ng mahigit limang libong bagong kaso ang Department of Health (DOH).

Una nang inihayag ni Metropolitan Manila Development Authority (MMDA) Chairman Benhur Abalos na posibleng ibaba na sa level 3 ang alerto sa NCR sa ilalim ng bagong quarantine classification.