HEADLINES

Hindi itinuloy ng Senate Blue Ribbon Committee ang paglilipat kay Pharmally Pharmaceutical Director Linconn Ong sa Pasay City Jail.

Ito ayon kay Senator Panfilo Lacson ay dahil sa hiniling ni Ong na haharap na siya sa executive session para doon isiwalat ang mga hindi nya masabi sa public hearing ng Blue Ribbon Committee.

Ayon kay Lacson, nakiusap si Ong na makuha ang mga dokumento para daw accurate ang mga sasabihin nya na numero o halaga tulad ng kung magkano ang ini-advance na pera ni Michael Yang sa kanila at magkano ang ibinalik  nya sa  bawat transaksyon ng Pharmally sa Procurement Service ng Department of  Budgement and Management.

Ang pagkakaalam ni Lacson nasa USB  na lahat ng mga kailangang dokumento ni Ong kaya’t hindi na nito kailangang umalis para kunin ito.

Giit ni Lacson, oras na bolahin lang sila at hindi pa rin magsabi ng totoo si  Ong sa executive session,  magtatagal ito sa pagkakakulong sa senado o kaya ay sa city jail.

Una rito, sinabi ni Blue Ribbon Committee Chairman, Senator Richard Gordon na pinanatili nila si Ong sa kostodiya ng senado dahil maaari anyang malagay ito sa peligro kapag inilipat sa Pasay City Jail.

Si Ong ang nagtapat na si dating Presidential Economic Adviser Michael Yang ang nagpautang at naging guarantor ng Pharmally kaya raw nakapag supply sila ng multi bilyong pisong halaga ng mga medical supplies kahit pa higit P600,000 lang ang kanilang kapital. —sa ulat ni Cely Ortega Bueno (Patrol 19)

Hindi dapat gamitin ang militar sa nalalapit na eleksyon.

Ayon kay Senator Richard Gordon , hindi tamang makialam ang mga sundalo sa pagdaraos ng halalan.

Ang tungkulin anya ng militar ay protektahan ang bansa laban sa external threat.

Mga pulis anya ang may tungkulin protektahan ang publiko at panatiliing mapayapa at maayos ang halalan.

Hindi naman na aalarma si Senate Majority Leader Juan Miguel Zubiri sa banta ng Pangulong Rodrigo Duterte na gagamitin ang militar para masiguro ang malimis, mapayapa at maayos na eleksyon.

Ito ayon kay Zubiri ay dahil sa professional ang ating mga sundalo kaya’t tiyak na hindi sila magpapagamit sa anumang usaping politikal.

Karaniwan  na anyang andyan ang militar  para panatiliing mapayapa ang halalan.

Kapag anya may nagiging bias na pulis sa isang kandidato sa isang lugar, pumapasok talaga ang militar para mapanatili ang kaayusan.

Nasa pagpapasya anya ng COMELEC kung kailangan ng militar sa ginaganap na eleksyon sa bansa. —sa ulat ni Cely Ortega Bueno (Patrol 19)

Asahan na ang maulap na papawirin na may kasamang kalat-kalat na pag-ulan sa Metro Manila at nalalabing bahagi ng bansa ngayong araw dahil sa trough ng bagyong may international name na ‘Mindulle’ at localized thunderstorms.

Huling namataan ng PAGASA ang bagyo sa layong 1,600km, silangan ng dulong hilagang luzon o sa labas ng Philippine Area of Responsibility (PAR).

Bahagyang itong humina taglay ang lakas ng hanging aabot sa 185km/hr at pagbugso na hanggang 230km/hr.

Kikilos pahilagang-kanluran ang nasabing sama ng panahon sa bilis na 10km/hr at posibleng pumasok ng PAR ngayong araw at papangalanang ‘Lannie’.

Bagaman maaaring lumabas din agad ng bansa ang bagyo, asahan na ang malalaking alon sa northern at eastern luzon. —sa panulat ni Drew Nacino

Nababahala ang ilang highland vegetable producers sa Benguet sa pagkalat ng smuggled carrots sa mga pamilihan.

Ipinagtataka ng Highland Vegetable Multipurpose Cooperative kung saan nanggagaling ang mga naglalakihang carrot sa Divisoria, Maynila gayong katamtaman lang naman ang laki ng local carrots.

Bagaman inalerto na nila ang Department of Agriculture noon pang Agosto hinggil sa imported crops, nilinaw ng Bureau of Plant Industry na hindi naman sila nag-issue ng anumang import permit para nasa nasabing gulay.

Napag-alaman ng kooperatiba na may ilang maliit na warehouse malapit sa Divisoria ang naglalabas umano ng imported vegetables sa upang ibagsak sa ilang pamilihan sa  Metro Manila tuwing tumataas ang presyo ng gulay sa Benguet.

Samantala, inabisuhan na rin ng vegetable traders sa Cebu ang mga kooperatiba sa Benguet na apat na container vans na kargado ng carrots mula China ang nagbabagsak sa kanilang mga pamilihan kada linggo.  —sa panulat ni Drew Nacino

Dapat manatiling alerto ang publiko laban sa COVID-19 sa kabila ng patuloy na pagbaba ng kaso nito o pagbagal ng hawaan lalo sa Metro Manila.

Ito ang paalala ni Dr. Guido David ng OCTA Research Group sakaling luwagan ang restrictions o ibaba ng pamahalaan ang alert level sa Oktubre.

Ayon kay David, dapat mag-ingat ang publiko lalo sa paglabas at umiwas sa mga social gathering dahil may posibilidad pa ring tumaas ang kaso kung magpapabaya.

Bagaman nasa .94 na lamang anya ang reproduction rate, dapat din anyang tandaan na hindi pa nakarerekober ang mga healthcare worker at nasa critical level pa rin ang hospitalization rate sa bansa. —sa panulat ni Drew Nacino

Ikinukunsidera na ng New York State sa Amerika ang pagha-hire ng medical workers mula Pilipinas at iba pang bansa.

Ipapalit sa mga ito sa unvaccinated staff sa mga ospital at nursing homes na hindi tatalima sa requirement na dapat bakunado kontra COVID-19 ang lahat ng health workers.

Ayon kay Governor Kathy Hochul, layunin ng nasabing hakbang na maiwasan shortage ng mga staff sa mga ospital at iba pang health care facilities sa buong New York State.

Kabilang din sa plano ang palagda sa executive order, kung kailangan, upang magdeklara ng State of Emergency na layuning taasan workforce supply at payagan ang health care professionals na lisensyado sa ibang states o bansa, bagong graduate, retired at dating health care professionals na magtrabaho sa New York.

Plano rin ni Hochul na makipag-ugnayan sa federal government at iba pang state leaders upang mapabilis ang visa processing ng mga medical professionals mula Pilipinas at iba pang bansa.  —sa panulat ni Drew Nacino

Handa si Dating Senador Antonio Trillanes, IV na kumandidato sa pagka-pangulo sa 2022 National Elections.

Ito, ayon kay Trillanes, ay kung hindi mag-anunsyo si Vice President Leni Robredo ng plano nito bago mag-Oktubre 8 o sa huling araw ng paghahain ng Certificate of Candidacy.

Aminado si Trillanes na bagaman suportado niya si Robredo sakaling tumakbo sa mas mataas na pwesto, nakahanda naman siyang humalili sakaling walang maging aksyon ang Bise Presidente.

Una nang inihayag ng Dating Senador na hindi naman kapwa genuine opposition member sina Senators Panfilo “Ping” Lacson, Manny Pacquiao at Manila Mayor Isko Moreno kahit nag-anunsyo na ang mga ito ng kandidatura. —sa panulat ni Drew Nacino

Ipinanawagan ni Presidential Adviser for Entrepreneurship Joey Concepcion sa IATF ang pagrepaso sa guidelines para sa mga fully vaccinated individual sa ilalim ng alert level system.

Ayon kay Concepcion, hindi naman malinaw ang qualifying conditions para sa mga bakunado para sa alert levels 2 at 3.

Dapat anyang payagan ang mga fully vaccinated individuals sa indoor business transactions sa lahat ng lugar na nasa alert levels 4 hanggang 2 at itaas ang kapasidad ng mga negosyong dapat buksan.

Una nang ipinanukala ni Concepcion na payagan ang indoor dine-in restaurants at personal care services na mag- accommodate pa ng mga bakunadong sa mga lugar na nasa ilalim ng alert levels 2 at 3. —sa panulat ni Drew Nacino