HEADLINES

Sapat ang supply ng langis sa bansa.

Ayon ito kay Energy Assistant Secretary Gerardo Erquiza, Jr., bagamat itinutulak ng global demand ang pagtaas ng presyo ng langis sa world market.

Obligado aniya ang local suppliers na tiyaking tatagal ang oil reserves ng 15-30 days depende sa produkto.

Sinabi ni Erquiza na malaki ang demand sa langis subalit kulang ang supply kaya’t nagtataas ang presyo ng produkto.

Tila nahila pababa ng kontrobersya sa Pharmally ang pagsuporta ng publiko sa Duterte administration kaugnay sa pagtugon sa pinakamahalagang usapin para sa kanila.

Ayon ito kay Dela Salle University Lecturer Professor Cleve Arguelles, matapos ilabas ng Pulse Asia ang bumabang aprroval rating ng gobyerno sa pagtugon sa kanilang concerns.

Tinukoy ng Pulse Asia ang pagbaba ng 12% quarter to quarter at 25% year on year, sa pag apruba ng publiko sa kampanya ng gobyerno laban sa korupsyon.

Sinabi ni Arguelles na aktibo ang Pangulong Rodrigo Duterte sa pag depensa sa ilang sangkot sa Pharmally Deal kaya’t hirap ang senado na gawin ang trabaho nitong imbestigahan ang usapin.

Maaari aniyang napagtutuunan ng pansin ng publiko ang pagiging defensive ng Pangulo sa Pharmally controversy na malaki rin ang posibilidad na makapagpabagsak sa trust at approval ratings ng Pangulong Duterte.

Nakalabas na ng Philippine Area of Responsibility ang bagyong Lannie kaninang umaga.

Sa pinakahuling bulletin ng PAGASA, ang bagyong Lannie ay namataan sa layong 770km kanluran ng Calapan City, Oriental Mindoro o 670km kanluran ng Subic, Zambales.

Ayon pa sa PAGASA, ang trough ng bagyong Lannie ay inaasahang magdadala ng ulan sa Metro Manila, Central at Southern Luzon, Antique at Aklan.

Ang Gale Warning ay nakataas sa seaboards ng Northern Luzon at Western seaboards ng Southern Luzon.

Pabor ang DOT sa panawagang bawasan ang quarantine period sa mga international travelers na fully vaccinated.

Ayon kay Tourism Secretary Berna Romulo-Puyat, malaking tulong sa ekonomiya ng bansa bukod sa mahalaga sa mga nawalay ng matagal sa kanilang mga mahal sa buhay lalo na ngayong malapit na ang holiday season kung babawasan ang quarantine period.

Batay sa guidelines ng IATF, ang mga magmumula sa yellow risk ay dapat sumailalim sa 10 day facility based quarantine at apat na araw na home quarantine.

Limang oras na nag offline ang website ni Senador Richard Gordon noong Lunes , Oktubre 4 dahil sa Cyber Attacks.

Ayon kay Myke Cruz, Information Technology Officer sa tanggapan ni Gordon, nagkaroon ng tinatawag na Distributed Denial of Service (DDOS) attack sa kanilang website kaya’t nag shutdown ang web services nito mula alas-7 ng umaga hanggang ala-1 ng hapon.

Ang DDOS Attack daw ay traffic request sa website na karaniwang idinadaan sa dark web ng mga taong nabayaran ng malaking halaga.

Sa website ni Gordon, bumaha ang traffic requests mula sa China, United States, Ukraine at iba pang bansa sa South East Asia kaya ang bandwidth ng website ay lumobo sa 1.8gb sa loob ng isang oras mula sa dating 100mb lamang.

Bukod sa cyber attack sa website, binaha rin ang social media account ni Gordon ng banat nang hinihinalang trolls na bumabatikos sa imbestigasyon ng senado sa pagbili ng gobyerno ng pandemic supplies sa Pharmally Pharmaceutical Corporation.—sa ulat ni Cely Ortega Bueno (Patrol 19)

Sisimulan na ng Department of Education (DepEd) ang pilot implementation ng face to face class sa 59 na paaralan sa kabila ng pandemya sa ika-15 ng Nobyembre.

Ayon kay Education Undersecretary Nepomuceno Malaluan, 59 na paaralan ang nakapasa sa “granular risk assessment as minimal or low risk”ng Department of Health.

Base sa timeline ng DepEd, aabutin hanggang Disyembre 22 ang inisyal na pilot face-to-face class at tatagal hanggang Enero 31, 2022 ang pilot study.

Patuloy pa rin na ine-evaluate at ina-identify ng DepEd ang iba pang paaralan para sa expansyon ng nasabing pilot run na inaasahang magsisimula sa Marso 7, 2022. —sa panulat ni Airiam Sancho

Bumaba na ang bilang ng kaso ng mga pasyente na may COVID-19 sa nakalipas na dalawang linggo sa Philippine General Hospital (PGH).

Ito’y ayon kay Spokesman Dr. Jonas Del Rosario, na kinumpirma ang nasabing pagbaba ng kaso ng COVID-19 pasyente mula 355 na umuukopa sa 325 na hospital’s bed ay bumaba na sa 237.

Bagaman nabawasan na ang bilang ng naturang kaso ng COVID-19 pasyente sa ospital, nananatili pa rin na puno ang ICU. —sa panulat ni Airiam Sancho