HEADLINES

Pinaiimbestigahan na ng NTC o National Telecommunications Commission ang emergency text blasts na nagpo-promote kay dating Senador Ferdinand Bongbong Marcos, Jr.

Ipinabatid ito ni NTC Deputy Commissioner Edgardo Cabarios na nagsabi rin na hindi naman emergency ang ipinadalang alert na natanggap ng maraming cellphone users matapos maghain ng COC ni Marcos sa pagka-presidente.

Ayon kay Cabarios, nakipag ugnayan na sila sa mga Telcos na itinangging dumaan sa kanila ang nasabing emergency alert na sa pagkakaalam anila ay tanging sa NDRRMC lamang nanggagaling.

Maaaring ang naturang emergency alert aniya ay nanggaling sa iligal na operasyon ng “portable cell sites” na Radio Based Stations na gumagamit ng frequencies ng mobile networks.

Hinimok ng IBP Integrated Bar of the Philippines ang Pangulong Rodrigo Duterte na irekunsidera ang desisyong huwag padaluhin ang mga cabinet member sa Senate investigation hinggil sa umanoy  overpriced medical supplies na binili sa Pharmally Pharmaceutical Corporation.

Tinukoy ng IBP ang pasya ng Korte Suprema sa kaso ng Senate Versus Ermita kung saan ang kapangyarihan ng kongreso para i-compel o pilitin ang pagdalo ng Executive Officials sa imbestigasyon ay nakabase sa prinsipyo ng Separation of Powers.

Binigyang diin ng ibp na sa pamamagitan lamang ng pagbibigay ng free access to information sa kongreso makakatutulong ang Gobyerno na makabuo ang mga ito ng mga polisiya para sa kapakinabangan ng Taumbayan.

Una nang binatikos ng Philippine Bar Association ang nasabing kautusan ng Pangulong Duterte na paglabag anila sa System of Checks and Balances at Doktrina ng Separation of Powers sa tatlong sangay ng Gobyerno.

Nakapagtala ng halos sampung libo o 9, 868 na bagong kaso ng COVID-19, dahilan kayat sumirit pa sa mahigit 2.6 na milyon ang kumpirmadong kaso ng virus sa bansa.

Ayon sa DOH, ito na ang ikalawang araw na nairehistro ang mas mababa sa sampung libong bagong kaso ng COVID-19 dahil sa usaping teknikal sa COVID.

Dahil dito sinabi ng DOH na nasa 112, 807 ang active cases ng COVID-19 kung saan 76.7% ang mild, 13. 98% ang asymptomatic, 2.8% severe at 1.2% ang critical condition.

Sumampa na sa halos 2.6M ang total recoveries kabilang na ang 133 na mga bagong gumaling sa nasabing virus, samantalang nananatili sa 38,828 ang death toll. —mula sa ulat ni Aya Yupangco (Patrol 5)

Irerekonsidera ng IATF ang panukalang bawasan ang quarantine period para sa mga air passengers.

Ayon ito kay trade secretary Ramon Lopez na nagsabing ngayong linggo o sa susunod na linggo magpupulong ang IATF sakaling isulong at maaprubahan sa technical level.

Tiniyak ni Lopez ang pagtulong sa aviation sector para kahit paano ay makapagbukas ng operasyon sa pamamagitan nang pagluluwag ng travel restrictions habang paparami ang mga nababakunahan.

Una nang inihayag ni Presidential Adviser for Entrepreneurship Joey Concepcion ang isinusulong ng airline companies na gawing pito na lamang ang 10-day quarantine period para sa incoming travelers dahil mabigat ito sa bulsan ng mga pasahero.

Dumistansya ang National Disaster Risk Reduction and Management Council (NDRRMC) sa paglabas ng isang alert message na natanggap ng mga nasa Sofitel plaza kung saan naghahain ng Certificate of Candidacy ang mga tatakbo sa 2022 National Elections.

Inamin ni NDRRMC spokesperson Mark Timbal na ikinagulat nila ang nasabing alert message lalo’t ang pagpapadala ng mga ito ay nakasalig sa Republic Act 10639 o ang Free Mobile Disaster Alerts Law

Gayunman, sinabi ni Timbal na maging ang mga telco ay itinangging sa kanila nanggaling ang alert messages kaya’t umaasa silang masasagot naman ito ng National Telecommunications Commission (NTC)

Sa ilalim ng nasabing batas, ipinabatid ni Timbal na ang pagpapadala ng disaster alerts ay kinakailangang partikular sa panganib, lugar at oras kung kailan dapat tatama ang kalamidad o sakuna

Magugunitang nagkagulatan sa Sofitel plaza tent nang makatanggap ng alert message ang mga tao roon ilang sandali bago maghain ng kaniyang kandidatura si dating Senador Ferdinand Bongbong Marcos Jr.—mula sa ulat ni Jaymark Dagala (Patrol 9)

Pormal nang naghain ng Certificate of Candidacy (COC) sa pagka-Pangulo si dating Sen. Bongbong Marcos sa ilalim ng Partido Federal ng Pilipinas (PFP).

Sinamahan si Marcos ng kaniyang asawa na si Atty. Louise at dalawang anak na si Ferdinand Alexander at Joseph Simon sa paghahain ng kandidatura.

Kahapon, inanunsyo ni Marcos sa kaniyang Facebook page ang kaniyang intensyong tumakbo bilang Pangulo sa 2022 National Election.

Ani Marcos, hangad niyang maibalik ang mapagkaisang paglilingkod na magbubuklod sa ating bansa.

Nais umano niyang magkaisa ang lahat at magkakasamang makabangon ang mga Pilipino sa pagkalugmok ng ekonomiya bunsod ng pandemya.

Tiwala si Deputy Speaker Bernadette Herrera na hindi patatagalin pa ni Pangulong Rodrigo Duterte ang paglagda sa panukalang pagbabawal sa child marriage sa bansa.

Ito’y matapos maratipikihan ng Kamara ang reconciled version ng panukalang “An Act Prohibiting the Practice of Child Marriage”.

Giit ni Herrera, maituturing na pang-aabuso sa mga kabataan ang practice na ito ng child marriage.

Batay sa 2017 State of the World’s Children report ng United Nations Children’s Fund (UNICEF), pang 12 na ang Pilipinas sa mga bansa sa buong mundo na may pinaka-maraming kaso ng child marriage.

Naniniwala si Labor Secretary Silvestre Bello III na maaari lang magpatupad ng restrictions sa mga hindi pa bakunado kung sapat ang suplay ng COVID-19 vaccine sa bansa.

Binigyan-diin ni Bello na nananatiling usapin sa maraming lugar sa bansa ang suplay ng bakuna.

Ito ang naging tugon ng kalihim matapos manawagan ang ilang mga negosyante na limitahan o higpitan ang pagkilos ng mga hindi pa nababakunahan kontra COVID-19 sa bansa upang mas maraming mahikayat na magpabakuna na.

Halos 170M views ang nakuha ng mental health campaign ng globe, bilang pakikiisa sa National Mental Health week sa ikalawang linggo ng Oktubre.

Sa gitna na rin ito na inilabas na Mental Health Atlas 2017 ng World Health Organization kung saan nakasaad na ang mental illness ang ikatlo sa pinaka-karaniwang kapansanan sa Pilipinas o humigit kumulang 6M na Pilipino ang dumaranas ng depression at anxiety.

Gamit ang kantang “better days 2.0” ni quest, ikinasa ng Globe ang video challenge nito na paalala sa mga tao na manatiling positibo sa ilalim ng #planthappinessph campaign kung saan nakatanggap ang Globe ng 275 video entries mula sa mga medical frontliners, delivery riders, work-from-home moms, empleyado, negosyante at iba pa mula nang magsimula ang kampanya noong Setyembre 27.

Binigyang-diin ni Yoly Crisanto, Globe chief sustainability officer and SVP for corporate communications na natutuwa sila sa pagdagsa ng mga tugon sa kanilang panawagang kung saan maraming tiktokers na sumayaw, nagpamalas ng kanilang mga koleksyon ng halaman, kumanta, nag-document ng kanilang pagbabakuna at nagpakita ng kanilang mga simpleng kasiyahan tulad ng pagluluto, pag-e-ehersisyo at pag-aalaga ng kanilang mga alagang hayop para i-promote ang mental health at well-being.

Bahagi ng #planthappinessph ng Globe ang pagsisikap na mapangalagaan ang mental health ng customers kung saan magbibigay ang Globe sa mga kumasa sa hamon ng libo-libong libreng binhi at punla tulad ng Langka, Guyabano, Punong Supa at Bignay.

Kabilang din sa mental health program ng Globe ang tayo naman! O tulong, alaga, yakap at oras para sa mga tagapagtaguyod ng edukasyon kung saan nakipag-ugnayan ang Globe sa disaster risk reduction management service ng Department of Education at sa Bureau of Human Resource and Organizational Development Employee Welfare Division upang suportahan ang kapakanan ng mga guro, non-teaching personnel at mga magulang mula sa Globe Filipino teachers program.