HEADLINES

Bumulusok pa sa 0.76 ang COVID-19 reproduction rate sa Pilipinas, indikasyon ng nagpapatuloy na downward trend ng kaso.

Ayon kay Octa Researh Fellow, Dr. Guido David, sumadsad sa 12,455 cases ang seven-day average o mula Setyembre 30 hanggang kahapon, Oktubre 6.

Bumaba rin anya sa -26 ang one-week growth rate kaya’t bumagal ang COVID -19 surge sa ilan pang lugar tulad sa Metro Manila, Cavite, Laguna, Batangas, Rizal at Quezon.

Gayunman, tumataas pa rin anya ang mga kaso sa ilang bahagi ng Northern Luzon.—sa panulat ni Drew Nacino

Nilinaw ng Infectious Disease Expert na si Dr. Edsel Salvaña, miyembro ng D.O.H. – Technical Advisory Group na hindi humihina ang bisa ng COVID-19 vaccine, anuman ang brand nito.

Taliwas ito sa mga naglalabasang pag-aaral sa ibang bansa na nawawala umano ang bisa ng ilang brand ng bakuna matapos ang anim na buwan o higit pa kaya’t kailangan ng booster shots.

Ayon kay Salvaña, sa datos ng Food and Drug Administration, wala namang nagpapakita na nawawalan ng bisa ang mga bakuna sa COVID-19 kapag nagtagal.

Noon pa naman din anya nilinaw ni Vaccine Panel Head, Dr. Nina Gloriani na ang tinutukoy nitong bumababa ay ang lebel ng antibodies na hindi naman konektado sa proteksyong naibibigay ng bakuna.

Iginiit ni Salvaña na patuloy na na-po-protektahan ng vaccine ang mga bakunado laban sa pagkakaroon ng severe symptoms ng COVID-19 at sa pagkamatay mula rito.

Bagaman aminado si Salvaña na may malaking benepisyo ang booster shot sa matatanda, may comorbidity, healthcare workers, hindi pa naman ito napatutunayan ng siyensya.—sa panulat ni Drew Nacino

Tiniyak ng Department of Energy na stable ang supply ng langis sa bansa sa kabila ng lumalaking global demand nito dahilan ng patuloy na pagtaas ng presyo.

Aminado si Energy Assistant Secretary Gerardo Erquiza na kabilang ang Pilipinas sa may malaking demand sa krudo pero kulang naman ang supply.

Ayon kay Erquiza, inatasan na nila ang local suppliers na tiyaking may maitatabi silang supply na magagamit sa loob ng 15 araw o hanggang isang buwan, depende sa produkto.

Sa datos ng DOE, aabot na sa P6.5¢  kada litro ang itinaas ng presyo ng gasolina, P15 sa diesel at P12.74¢ sa kerosene, sa nakalipas na halos dalawang buwan.

Kahit anya nasa 103 bilyon barrels ang global demand kada araw ay 100 bilyon lamang kada araw ang nabibigay na supply kaya’t aabot sa 2.9 hanggang 3 bilyon barrels  ang kulang bawat araw.

Samantala, bukas naman ang kagawaran sa pakikipag-dayalogo sa iba pang stakeholders sa posibleng pagbibigay ng subsidiya sa transport sector.—sa panulat ni Drew Nacino

Nasa P4.5 milyon na halaga ng endangered Philippine wood species ang nasabat ng Department of Environment and Natural Resources (DENR) sa lungsod ng Valenzuela at lalawigan ng Bulacan.

Natimbog din sa tatlong magkahiwalay na operasyon ang 13 indibidwal at nakumpiska mula sa mga ito ang dalawang luxury vans na ginagamit sa pagbiyahe ng iligal na troso.

Inilarga ang unang operasyon sa Barangay Parada, Valenzuela City kung saan tatlumpu’t tatlong tabla ng narra, yakal, molave at kamagong na may sukat na nasa 3,503 board feet ang nakumpiska.

Ayon kay DENR Undersecretary for Protected Areas and Special Concerns Edilberto Dc. Leonardo, nagkakahalaga ang mga kontrabando ng P4 milyon.

Nasakote rin sa pito katao ang mga tabla ng teakwood, kamagong at molave sa Guiguinto at Norzagaray, Bulacan na aabot naman sa kalahating milyong piso ang halaga.—sa panulat ni Drew Nacino

Inilabas na ng National Task Force Against COVID-19 ang recalibrated national vaccination program nito para sa nalalabing buwan ng 2021 at sa susunod na taon.

Kabilang sa programa ang paglikha ng vaccine security roadmap sa gitna ng presensya ng COVID-19 variants at reformulated booster shots.

Ayon kay NTF Chief at Vaccine Czar Carlito Galvez, bagaman hindi masyadong napag-uusapan ang booster shots, kasama na ito sa kanilang plano partikular sa anim hanggang walong buwang vaccination cycle.

Sa katunayan anya ay naglaan na ang gobyerno ng vaccine doses bilang booster, para sa mga healthcare worker, partikular ang mga unang binakunahan noong Marso ng isang taon.

Handa na ang mga ito sa oras na aprubahan ng World Health Organization at Department of Health ang probisyon ng booster shots para sa mga nasabing manggagawa.—sa panulat ni Drew Nacino

Pinag-aaralan na ng gobyerno na gawing taon-taon ang COVID-19 vaccination.

Ito ang inamin ni national Task Force Against COVID-19 Chief at Vaccine Czar, Secretary Carlito Galvez kasabay ng ceremonial vaccination ng Tourism workers sa Taytay, Rizal.

Ayon kay Galvez, nakikita nila na kailangan talaga ang tinatawag na vaccination cycle o maging annual na ang bakunahan lalo’t hindi naman ito maaaring gawing one-time big time.

Tinitingnan na anya nila ang phenomenon sa ibang bansa at tuwing Lunes ay mayroon silang update mula sa Custom Consultative Group kasabay ng kanilang pag-aaral sa trends ng global vaccine supply.—sa panulat ni Drew Nacino

Umalma ang kampo ni dating Senator Ferdinand “Bongbong” Marcos Jr. sa kumalat na emergency alert text blast na sumusuporta sa kanyang kandidatura sa 2022 Presidential elections.

Kahapon ng umaga nang makatanggap ang ilang kalapit na establisyimento ng Sofitel Hotel Tent sa Pasay ng text blast kaugnay kay Marcos kasabay ng paghahain nito ng Certificate Of Candidacy.

Ayon kay Atty. Vic Rodriguez, Chief of Staff ni Marcos, hindi galing sa kanila ang mga ipinadalang emergency text alert at bahagi lamang ito ng demolition job laban kay  BBM, ng mga kontra sa kanyang pagtakbo.

Kahit anya ang pamilya ng dating Senador ay nakatanggap ng nasabing mensahe.

Iginiit naman ni Rodriguez na hindi dapat gamitin sa pulitika ng sinumang grupo ang emergency text alert ng Gobyerno, na ang tunay na layunin ay bigyang babala ang publiko sa mga paparating na kalamidad. —sa panulat ni Drew Nacino

Lumantad na sa NBI si Julian Ongpin matapos isyuhan ng subpoena kaugnay sa pagkamatay ng artist na si Bree Jonson.

Si Ongpin na anak ni Businessman Roberto Ongpin ay dumating sa NBI Death Investigation Division kasama ang tatlong abogado.

Sinabi ni NBI Spokesperson Ferdinand Lavin na nakikipagtulungan naman si Ongpin sa imbestigasyon sa nasabing kaso matapos tumugon sa subpoena ng ahensya, bagamat tumangging ibunyag ang mga sagot sa mga katanungan nang itinuturing na Person of interest sa pagkamatay ni Jonson.

Kaugnay nito, ipinabatid ni Lavin na tinututukan na ng NBI ang laboratory examination ng mga ebidensya ng nakuha mula sa pinangyrihan ng krimen na isang beach resort sa La Union, habang patuloy ang pagkuha nila ng pahayag mula sa mga testigo.

Tinawag na polluted ni House Committee on Good Government and Public Accountability Chair Michael Aglipay ang testigong lumantad sa Senado na nagbunyag ng substandard face shields.

Kasunod narin ito nang pagkuwestyon ni Aglipay kung bakit hindi humarap ang nasabing testigo na dating warehouse staff ng Pharmally Pharmaceutical Corporation sa imbestigasyon din ng kamara sa naturang usapin.

Sinabi ni Aglipay na maituturing na polluted witness ang naturang dating empleyado ng Pharmally dahil hindi ito nagpapakita ng mukha kaya’t hindi nila uubrang maimbita sa kamara lalo hindi nila batid kung sino at tanging sa senado lamang ito naka-protective custody.

Una nang inamin ni Pharmally official Krizle Mago ang ibinunyag ng nasabing testigo na pag-tamper sa expiration date ng face shields bagamat binawi ng opisyal nang humarap sa pagdinig ng kamara kung saan naman ito naka-custody.

Umalma ang kampo ni dating Senator Ferdinand “Bongbong” Marcos Junior sa kumalat na emergency alert text blast na sumusuporta sa kanyang kandidatura sa 2022 Presidential elections.

Kahapon ng umaga nang makatanggap ang ilang kalapit na establisyimento ng Sofitel hotel tent sa Pasay ng text blast kaugnay kay marcos kasabay ng kanyang paghahain ng Certificate of Candidacy.

Ayon kay Atty. Vic Rodriguez, Chief of Staff ni Marcos, hindi galing sa kanila ang mga ipinadalang emergency alert at ito ay bahagi umano ng demolition job laban kay B.B.M., ng mga kontra sa kanyang kandidatura.

Kahit anya ang pamilya ng dating Senador ay nakatanggap ng nasabing mensahe.

Iginiit ni Rodriguez na hindi dapat gamitin ng sinumang grupo sa pulitika ang emergency alert text ng gobyerno na ang tunay na layunin ay bigyang babala ang publiko sa mga paparating na kalamidad. —sa panulat ni Drew Nacino