Kinumpirma ng Sweding Police na narekober na ang bangkay ng isang lalaking suspek umano sa pagpapasabog sa isang apartment building sa Gothenborg City.
Natagpuan ang bangkay ng hindi pinangalanang lalaki na palutang – lutang malapit sa pantalan.
Wala namang nakikitang foul play ang pulisya sa pagkamatay ng suspek.
Magugunitang 16 ang nasugatan sa pagsabog pagkasunog ng gusali noong setyembre na kagagawan ng suspek na napag-alamang residente rin ng apartment.—sa panulat ni Drew Nacino
Bumawi ang San Miguel Beermen sa game 2 ng best of seven semi-finals series nila ng TNT Tropang Giga ng sa Philippine Cup.
Nalusutan ng SMB ang tnt sa score na 98-96 upang itabla ang kartada sa 1 – 1 sa kanilang paghaharap sa Don Honorio Ventura State University gym sa Bacolor, Pampanga.
Binitbit ni Marcio Lassiter ang beermen patungo sa panalo matapos magpakawala ng buzzer-beater shot sa huling quarter.
Nag-ambag naman ng 26 points sina Terrence Romeo at Junmar Fajardo ng 22 points para sa beermen.
Muling maghaharap ang dalawang koponan sa game 3, ala sais ng gabi bukas.—sa panulat ni Drew Nacino
Nasa labas na ng Philippine Area of Responsibility ang bagyong Lannie.
Gayunman, isang panibagong Low Pressure Area ang nagbabadyang pumasok sa bansa sa susunod na 24.
Ayon sa PAGASA, papangalanang maring ang nasabing LPA sa oras na pumasok ng bansa.
Huli itong namataan sa layong 1,525 kilometers silangan ng Visayas.
Inaasang magdadala ito ng pag-ulan sa Visayas at Northern Luzon sa mga susunod na araw.—sa panulat ni Drew Nacino
Muling binantaan ni Pangulong Rodrigo Duterte si Senate Blue Ribbon Committee Richard Gordon, sa gitna ng pinangungunahan nitong imbestigasyon sa COVID-19 supply procurement ng gobyerno.
Ayon kay Pangulong Duterte, darating din ang araw na mababaligtad din ang ikot ng mundo ni Gordon dahil hindi ito habambuhay nasa pwesto at kapangyarihan.
Iginiit din ng Pangulo na bagaman kinikilala niya ang kapangyarihan ng kongreso, mayroon naman din anyang limitasyon ito.—sa panulat ni Drew Nacino
Nanindigan si Pangulong Rodrigo Duterte sa kanyang memorandum na nag-uutos sa mga cabinet official na huwag dumalo sa senate blue ribbon committee hearing kaugnay sa COVID-19 supply procurement.
Sa kanyang pre-recorded talk to the people, iginiit ni Pangulong Duterte na walang sinuman sa Senado na puwedeng manakot o mambastossa mga miyembro ng gabineteng tatangging dumalo sa pagdinig.
Kung ipakukulong anya ang kahit isang miyembro ng gabinete ay tiyak na may kalalagyan ang mga Senador.
Hinamon pa ng Pangulo ang mga Senador lalo Si Senador Richard Gordon, Chairman ng kumite, na i-akyat na lamang sa korte suprema ang issue.—sa panulat ni Drew Nacino
Naghain na rin ng kandidatura para sa pagka-Pangulo sa 2022 elections ang labor leader na si Ka Leody De Guzman.
Personal na nagtungo si De Guzman sa Sofitel Hotel tent upang magfile ng kanyang Certificate Of Candidacy, kahapon.
Tatakbo ang Chairman ng buklurang manggagawang Pilipino o BMP, sa ilalim ng partido lakas ng masa, na nakatuon sa kapakanan ng mga manggagawa.
Bukod kay De Guzman, isa pang BMP official sa katauhan ni Atty. Luke Espiritu ang sasabak naman sa 2022 senatorial race.—sa panulat ni Drew Nacino
Hindi nagsasawa ang Commission on Elections (COMELEC) sa paalala sa mga naghahain ng Certificate of Candidacy (COC) para sa 2022 elections, na iwasan ang pagdadala ng entourage sa filing ng kanilang kandidatura.
Ayon kay COMELEC Spokesman James Jimenez, sa katunayan ay hindi na kailangan pang ulitin sa mga tatakbo sa halalan, lalo sa mga national candidate, ang paalala bagkus ay dapat magkusa na ang mga ito.
Nasa gitna anya ang ng COVID-19 pandemic ang bansa maging ang mundo at kahit pakiramdam nila ay normal na ang sitwasyon ay hindi dapat ilagay ng mga kandidato sa alanganin ang kaligtasan ng iba.
Ipinunto ni Jimenez na bagaman sa filing venue lamang epektibo ang COMELEC guidelines, ang paghahakot ng supporters ay paglabag naman sa rules of common sense, na sa kanyang tingin ay may katapat na parusa.
Magtatapos bukas, Oktubre 8, ang paghahain ng COC pero iginiit ng poll body na iwasang humabol sa deadline hangga’t maaari. —sa panulat ni Drew Nacino
Ipinawalang–sala na ng korte ang 19 na pulis na akusado sa pagpatay kay Albuera, Leyte Mayor Rolando Espinosa Sr. at isang kapwa bilanggo.
Ayon kay Atty. Roland Inting, abogado ng isa sa mga akusado, isinagawa ang promulgasyon kahapon sa pamamagitan ng video conference sa Quezon City Regional Trial Court branch 104.
Bigo ang limang testigo ng prosekusyon na tukuyin kung sino sa mga akusado ang kabilang sa grupong pumatay kay Espinosa at kapwa presong si Raul Yap sa Baybay Sub-Provincial Jail.
Binaril umano ang Alkalde ng mga miyembro ng PNP-CIDG sa gitna ng search warrant sa loob ng naturang bilangguan noong Nobyembre 5, 2016.
Magugunitang ikinulong ang pinaslang na Mayor dahil sa kasong may kaugnayan sa iligal na droga. —sa panulat ni Drew Nacino
Inaasahan ng Philippine National Police o PNP ang pagdagsa ng mga nagnanais maghain ng kanilang kandidatura kasabay ng deadline nito bukas.
Kasunod nito, inatasan na rin ni PNP Chief P/Gen. Guillermo Eleazar ang lahat ng kaniyang Regional at Provincial Commanders na ihanda ang kanilang mga tauhan para sa karagdagang deployment.
Nanawagan naman si Eleazar sa mga kandidato na iwasang maging super spreader event ang huling araw ng paghahain ng Certificates of Candidacy o (COC) at Certificate of Nomination and Acceptance o (CONA).
Una rito, umapela rin ang Commission on Elections o COMELEC sa mga naghahangad ng posisyon sa Pamahalaan na huwag nang hintayin ang deadline para iwas abala.
Kasunod nito, sinabi ni Eleazar pangkalahatan pa ring maayos at mapyapa ang unang 6 na araw ng paghahain ng kandidatura sa buong bansa.—ulat mula kay Jaymark Dagala (Patrol 9)
Nangulelat ang Pilipinas sa global Coronavirus recovery index.
Batay ito sa Nikkei COVID-19 recovery index score kaugnay sa infection management, vaccination rollout, programs at social mobility.
Sa Setyembre 30 index score ng 121 bansa, lumagpak sa 121st spot ang Pilipinas mula sa 120th rank noong Agosto 31 habang pumalit sa 120th ang Vietnam.
Kabilang sa pinagbatayan ang mababang vaccination rate ng bansa kung saan 30% pa lamang ng populasyon ang nababakunahan.
Samantala, bumulusok naman sa 9th spot mula sa 1st spot ang China, na sinasabing pinagmulan ng COVID-19 pandemic.—sa panulat ni Drew Nacino