HEADLINES

Isasara sa publiko ang lahat ng sementeryo at kolumbaryo sa Olongapo City mula Oktubre 30, hanggang  Nobyembre  2.

Ayon kay Olongapo City Mayor Lenj Paulino, bukas naman sa publiko mula Oktubre 27 hanggang 29  at sa Nobyembre 3 hanggang 5 ang mga pampubliko at pribadong libingan at kolumbaryo sa lungsod.

Kaugnay nito, hanggang 30% lamang ng kapasidad ng lugar ang papayagang makapasok at bubuksan lamang mula alas-6 ng umaga hanggang ika-5 ng hapon.

Pinaalalahanan rin ang publiko na iwasan ang  pagdadala ng mga pagkain at inumin.

Hindi naman papayayagan na magtungo sa mga naturang lugar ang mga batang 15 taong gulang pababa.—sa panulat ni Hyacinth Ludivico

Tinukoy na ng Department of Education (DEPED) ang 59 na pampublikong paaralan na magsasagawa ng face to face classes.

Ang nasabing bilang ay kabilang sa mahigit 600 nominadong paaralan matapos makapasa sa granular risk assessment ng Department of Health (DOH).

Ayon sa DEPED, sinuri ng mabuti ng DOH Epidemiology Bureau ang mga kinilalang paaralan na kasama sa minimal or low risk batay sa alert level ng mga probinsiya.

Batay sa nakasaad sa DEPED-DOH Joint Memorandum Circular on the pilot implementation of face to face classes, nasa proseso na ang pagbibigay ng karagdagang proteksyon para sa paghahanda ng mga paaralan na kasama sa pilot phase.

Kasama sa gagawin ng DEPED ay ang pangangasiwa sa site inspection, hygiene, sanitation materials, hand washing facilities at standards classrooms at iba pa.

Kabilang sa mga  eskwelahan na napili ng DEPED para sa face to face classes na mula sa Luzon ay ang Asid Elementary School sa Masbate, Laserna Intergrated School sa Aklan  at Siay Central Elementary School sa Zamboanga Sibugay at iba pa.

Samantala, target naman ng DEPED na simulan ang face to face classes sa a-kinse ng Nobyembre kung saan ipatutupad lamang ito sa loob ng dalawang buwan.

Inihayag ng COVID-19 task force ng bayan ng Santo Tomas, Davao Del Norte na puno na ang Santa Cruz public cemetery dahil sa dami ng mga pasyenteng nasasawi sa COVID-19.

Nakapagtala ang bayan ng Santo Tomas ng 141 COVID-19-related deaths hanggang nitong Oktubre 5.

Ayon sa lokal na pamahalaan, 55 na mga bangkay ang nakalagak sa naturang sementeryo mula noong enero hanggang Setyembre.

Maliban sa Santa Cruz public cemetery, ginagamit na rin ang pampublikong sementeryo sa Barangay Balagunan upang paglibingan sa mga pasyenteng nasasawi sa COVID-19.

Batay sa datos nitong Oktubre 5, mayroong 1,642 COVID-19 cases sa bayan ng Santo Tomas.—sa panulat ni Hyacinth Ludivico

Arestado ang 12 suspek na mahigit isang taon nang pinaghahanap hinggil sa pagkamatay ng isang estudyante sa umano’y hazing ng fraternity sa Sorsogon noong 2020.

Kinilala ang mga naaresto na sina Mar Charnel Fajardo, 22-anyos; Arman Bunyi Jr., 23; Arvin Nuñez, 25; Ronnel Balaguer, 25; Johnson Gealone, 26; Runy Gerero, 35; Remdrant Gerolao, 34; Reniel Guran, 32; Archie Dipon, 43-anyos; Ronmark Godala, 24; Billy Bertania, 31 at Ulysses Berania, 29-anyos, na pawang mga residente ng Bulan, Sorsogon.

Itinuturing silang top 10 most wanted personalities ng region 5 na may nakalabas na warrant noon pang Agosto 2020.

Pebrero 2020 nang masawi ang 23-anyos na criminology student na si Omer Despabiladeras dahil sa pinagdaanang initiation rites.

Nahaharap ang mga suspek sa kasong paglabag sa anti-hazing law.—sa panulat ni Hyacinth Ludivico

Pinangangambahang magkulang ang suplay ng oxygen sa lalawigan ng Batanes sa gitna ng patuloy na pagtaas ng mga kaso ng COVID-19 doon.

Ayon kay Batanes Gov. Marilou Cayco, mabilis ang hawahan ng COVID-19 sa lalawigan ngunit hindi pa batid kung ito’y dahil sa delta variant.

Sinabi naman ni Dr. Jeffrey Canceran, Medical Chief ng Batanes General Hospital, bagama’t may sarili silang oxygen plant ay hindi ito nakakapag-produce nang maramihan dahil sa nagdaang bagyong Lannie.

Sa ngayon, mayroong 574 ang active COVID-19 cases sa Batanes matapos madagdagan ng 68 mga bagong kaso.—sa panulat ni Hyacinth Ludivico

Target ng National Task Force against COVID-19 na makumpleto ang pagbabakuna kontra COVID-19 sa bansa bago ang 2022 national elections.

Sinabi ni NTF Chief Implementer at Vaccine Czar Secretary Carlito Galvez Jr., na sisikapin nilang mabakunahan ang target population ng bansa pagsapit pa lamang ng Pebrero ng susunod na taon.

Ito’y upang matiyak na bakunado na ang mga botante, kahit magkaroon ng paglabag sa health protocols.

Aminado naman si Galvez na posibleng maging spreader event ang darating na halalan, kabilang na ang aktwal na botohan sa poll precinct’s.—sa panulat ni Hyacinth Ludivico

Nabawasan na ang bilang ng COVID-19 patients sa Philippine General Hospital.

Ayon kay PGH Spokesman Dr. Jonas Del Rosario, sa ngayon ay nasa 237 na mga pasyente na lamang ang umuukupa sa kanilang 325 COVID-19 beds.

Mas mababa aniya ito kumpara sa 355 pasyente na kanilang in-admit sa nakalipas na dalawang linggo, na lampas sa kanilang kapasidad.

Gayunman, sinabi ni Del Rosario na marami pa rin silang pasyente ngayon na malala at kritikal ang kalagayan dahil sa COVID-19 kaya’t puno pa rin ang kanilang Intensive Care Units o ICU.

Umaasa naman si Del Rosario na patuloy na bababa ang bilang ng mga pasyente.—sa panulat ni Hyacinth Ludivico

Nanawagan na ang mga public transport driver ng dagdag P3 sa minimum fare bunsod ng patuloy na pagsipa ng presyo ng mga produktong petrolyo.

Ayon kay Pasang – Masda Chairman Obet Martin, sapat na ang P9 na pasahe kung P40 per liter ang gasolina pero nasa P46 ito kaya’t mapipilitan silang humirit ng dagdag P3.

Sa datos ng Department Of Energy, tumaas ng hanggang P15 ang kada litro ng gasolina habang P14 sa diesel.

Nilinaw naman ni martin na maaari nilang isantabi ang petisyon para sa fare increase kung bibigyan sila ng subsidya ng pamahalaan. —sa panulat ni Drew Nacino