HEADLINES

Nilimitahan ng Bangko Sentral ng Pilipinas o BSP sa anim ang digital banks sa bansa hanggang sa taong 2024.

Paliwanag ni BSP Governor Benjamin Diokno, mababantayan nang mas mabuti ng BSP ang performance at epekto ng digital banks sa banking system at matitiyak ang healthy competition.

Kabilang sa mga inaprubahang digital banks ang Overseas Filipino bank ng Land Bank of the Philippines; Tonik bank of Singapore; Unobank of Singapore; Union Digital ng Union Bank of the Philippines; Gotyme ng Robinsons Bank Corp.; at Maya Bank.

Umaasa naman si Diokno na makakatulong ang digital banks na mailipat sa digital channels ang 50%  ng total retail transactions sa bansa at mapataas sa 70% ang bilang ng mga Pilipinong may bank accounts pagdating ng 2023.

Nakatakdang bumuo ng advisory ang Department of Labor and Employment hinggil sa mungkahing pagpapatupad ng mga paghihigpit sa mga empleyadong hindi pa bakunado kontra COVID-19.

Ito ang inihayag ni Labor Secretary Silvestre Bello III, mayroong magandang punto ang nasabing suhestyon lalo na’t para ito sa kapakanan at kaligtasan ng lahat.

Ngunit kailangan aniya ito pag-aralan mabuti dahil posibleng magkaroon ng diskriminasyon sa mga hindi pa bakunadong indibidwal.

Maliban dito, sinabi ni Bello na maaari ring irekomenda sa pangulo na magamit nito ang kanyang emergency powers para obligahin ang pagbabakuna pero kailangan ikonsidera kung mayroong sapat na supply ng bakuna ang bansa.

Samantala, nakatakda namang magpatawag ng tripartite meeting si Bello kasama ang mga grupo ng mga manggagagawa ukol sa mungkahing ito.

Posibleng ibaba pa ang alert level sa Metro Manila.

Ito ang inihayag ni Manila Development Authority (MMDA) Chairman Benhur Abalos, kung magpapatuloy ang pagganda ng COVID-19 indications sa rehiyon.

Sinabi pa ni Abalos, mangyayari lamang ito kung patuloy na bababa ang hawaan at mga kaso ng COVID-19.

Dagdag ni Abalos, malaki ang naging epekto ng pagsasailalim sa granular lockdown ng ilang lugar at pagpapatupad ng mahigpit na quarantine measures at pagdami ng nagpapabakuna laban sa COVID-19.

Umaasa si Abalos na magiging maayos na ang sitawasyon sa National Capital Region (NCR) na nasa ilalim ng alert level 4 hanggang sa 15 ng Oktubre.

Nakapagtala ng mahigit 60 kaso ng African Swine Fever (ASF) ang Department of Agriculture (DA) sa mga barangay sa bansa noong nakaraang buwan.

Sinabi ni DA Secretary Noel Reyes, ang mga naturang kaso ay mula sa 29 na bayan sa 13 na probinsiya.

Bukod dito, nakapagtala rin ang Bureau of Animal Industry (BAI) sa higit 40 barangay sa rehiyon ng Ilocos.

Dahil dito, maglalaan ng karagdagang pondo ang DA sa programa upang malabanan ang pagkalat nito.

Posibleng magdulot ng diskriminasyon ang pagpapatupad ng restriksyon sa mga hindi pa bakunado na indibidwal kontra COVID-19.

Ayon kay Department of Health (DOH) Health Undersecretary Maria Rosario Vergeire, maaaring isa itong diskriminasyon sa mga indibidwal na walang access sa bakuna o kaya may problema  sa kalusugan.

Ang naturang pahayag ay matapos ang naging hirit ng mga business at private sektor na patawan ng restriksyon ang galaw ng mga hindi pa nababakunahan na indibidwal.

Giit ni Vergeire, mayorya pa naman ng mga Pilipino sa bansa ay hindi pa bakunado.

Gayunpaman, hinihikayat ng kagawaran ang lahat na magpabakuna na kontra COVID-19 at patuloy na sundin ang mga ipinatutupad na mga health protocols upang maiwasan ang pagkalat ng virus sa bansa.

Ramdam na ang pagbaba ng mga kaso sa NCR dahil sa pagbaba ng naitatalang transaksyon ng One Hospital Command Center.

Ito’y ayon kay Health Sec. Francisco Duque, at sinabing nasa 284 na lamang ang average transactions kada araw.

Mas mababa rin aniya ng 25% ang naitatalang mga kaso ngayong linggo kumpara sa nakalipas na linggo.

Sinabi naman ni Defense Sec. Delfin Lorenzana na lumuluwag na rin ang ilang ospital at hindi na nangangailangan pa ng dagdag na health workers.

Maaari nang gamitin ang gamot na Molnupiravir laban sa COVID-19.

Ito ay ayon sa Food and Drug Administration (FDA), pinapayagan pa lamang ito sa ilalim ng Compassionate Special Permit (CSP).

Ayon kay FDA Director General Eric Domingo, tanging apat na ospital pa lamang sa bansa ang nabibigyan ng CPS sa paggamit ng anti-viral drug kontra COVID-19.

Dagdag ni Domingo na lumabas sa interim analysis na nasa 50% ang maaaring mabawasan ng naturang gamot sa mga may severe case ng COVID-19.

Ang Molnupiravir ay gawa ng Merck & Co. kung saan epektibo umano ito sa lahat ng uri ng variant ng virus.

Bagama’t hindi pa nagsusumite ang pharmaceutical company ng Emergency Use Authorization (EUA) ay maaari na i-apply ng CSP dito sa Pilipinas.

Inihayag ni Vaccine Czar Secretary Carlito Galvez Jr., ang mga hakbang na gagawin sa pilot implementation ng pagbabakuna sa mga menor de edad na nakatakdang simulan sa Oktubre 15.

Sisimulan ang pagbabakuna sa mga edad 15 hanggang 17 anyos sa anim na ospital sa NCR na may kakayahang tumugon sakaling magkaroon ng adverse effects ang bakuna sa mga kabataan.

Sa phase 2 naman na isasagawa sa Oktubre 22, ay gagawin ang pagbabakuna sa piling lokal na pamahalaan sa Metro Manila.

Pagdating sa ikatlong phase ay gagawin na ang pagbabakuna sa buong NCR at iba pang mga lugar na mas mataas sa 50% ang vaccination rate sa senior citizens.

Ayon kay Galvez, kabilang sa mga posibleng maunang rehiyon ay ang CAR, CARAGA, at regions 1, 2, 3, 4A, 8 at 10.—sa panulat ni Hyacinth Ludivico

Hindi kailangan tanggalin ang mga empleyadong hindi pa nababakunahan kontra COVID-19.

Ito ang iginiit ni Presidential Adviser Joey Concepcion na kailangan ng batas para sa sapilitang pagbabakuna sa lahat maging sa mga empleyado.

Aniya, maraming mga industriya na kailangan mahikayat ang mga empleyado na magpabakuna dahil high risk ang mga negosyo sa COVID-19.

Samantala, muli namang isusulong ng Department of Trade and Industry (DTI) na dagdagan ang kapasidad sa mga establisyimento para sa mga bakunado sa mga susunod na linggo.

Sa ngayon ay nasa 30% pa lamang ang kapasidad sa mga restoran, salon at sa mga gym.

Ibinaba na sa alert level 2 mula sa alert level 4 ang  anim na lalawigan sa Bicol region dahil sa bahagyang pagbaba ng kaso ng COVID-19.

Ayon sa DOH-Bicol Center for Health Development, kahit nasa alert level 2 na ang Albay, Camarines Sur, Camarines Norte, Masbate, Sorsogon at Catanduanes ay nananatili pa rin na nasa high risk at nasa alert level 4 status ang Legazpi City sa Albay at Iriga City sa Camarines Sur dahil sa mataas na bilang ng naitatalang kaso kada araw.

Inilagay naman sa moderate risk ang Naga City sa Camarines Sur at Sorsogon City sa Sorsogon habang low risk na ang Ligao City at Tabaco City sa Albay at Masbate City sa Masbate.

Sa ngayon ay umabot na sa 39,234 ang kabuuang kaso ng COVID-19 sa Bicol region.—sa panulat ni Hyacinth Ludivico