Itinuturing na milagro ng 51 pamilya ang pagkaligtas sa nangyaring landslide at rockslide sa Barangay Dagsaan, Guimaras, Iloilo.
Ayon kay Jubylee Palaron, isa sa mga pamilya na naapektuhan habang nangyayari ang trahedya, inakala daw nila na kulog lamang ang naririnig na ingay hanggang sa nawasak na ang kanilang tirahan.
Samantala, agad naman na nakahingi ng tulong ang pamilya bago pa man tamaan ang kanilang tirahan ng malalaking bato mula sa bukid.—sa panulat ni Airiam Sancho
Tiniyak ng militar ang buong suporta at pakikiisa sa kampanya ng pamahalaan na lansagin ang Private Armed Groups gayundin ang pagsupil sa loose firearms lalo na ngayong papalapit na ang halalan.
Ayon ito kay Western Mindanao Command Chief Major General Alfredo Rosario Jr. Matapos masabat ng awtoridad ang iba’t ibang uri ng armas sa Pikit, Cotabato.
Sinabi ni Rosario na naispatan ng mga tauhan ng 90th Infantry Battalion ng army at 3rd Cavalry company ang dalawang armas na nasa likurang bahagi ng isang sasakyang dumaan sa kanila habang nagbibigay seguridad sa tanggapan ng Comelec sa Pikit Municipal Hall.
Kaagad hinarang ng mga sundalo ang naturang sasakyan kung saan nakuha ang isang low powered at apat na high-powered firearms na malinaw anilang paglabag sa Comelec gun ban mula Oktubre 1 hanggang 8.
Kinilala naman ni Joint Task Force Central Commander Major General Juvymax Uy ang may-ari ng sasakyan na si Benjamin Mantol alias Datu Mama na punong barangay ng Talitay at kaagad isinailalim sa interogasyon kasama ang tatlong iba pa, subalit pinakawalan din.—mula sa ulat ni Jaymark Dagala (Patrol 9)
Bumangga ang isang motorsiklo sa sinusundan nitong sasakyan sa Brgy. Babanuang, San Manuel, Isabela.
Ayon sa otoridad, lasing ang nagmamaneho na si Jetro Valdez, 21 gulang na binabagtas ang hilagang direksyon ng daan nang hindi nito mapansin at mabangga ang sinusundang motorsiklo na minamaneho ni Jerwin Santiago, 24 taong gulang.
Nagresulta ito sa pagkabagok ng ulo ni Valdez at idineklara ng ospital na dead on arrival habang nagtamo lamang ng minor injury ang backride nito.—sa panulat ni Airiam Sancho
Dumating na sa Pilipinas ang mahigit 1,000,000 doses ng Pfizer COVID-19 vaccines.
Pasado alas otso ng gabi nang dumating sa Ninoy Aquino International Airport Terminal 3 sakay ng Hong Kong flight LD456 ang 862,290 doses ng bakuna.
Habang 76,050 doses naman ang dumating sa Cebu dakong alas sais kagabi sakay ng Hong Kong flight LD457.
Sa kabuuan, umabot na sa 78.42 milyong doses ng bakuna ang dumating sa bansa kung saan mahigit kalahati nito ay sinovac mula sa China.
Inaasahan naman ang pagdating ngayong linggo ng karagdagan pang higit 1000,000 na doses ng Pfizer vaccines.
Hiniling ni Health Secretary Francisco Duque III sa Pangulong Duterte na maglabas ng administrative order para sa distribusyon ng allowance ng mga health workers.
Aniya, ang administrative order ay para sa allowance na nakapaloob sa ilalim ng “Bayanihan to Recover as One” na nag-expired na sa nakalipas na mga buwan.
Samantala, kung maaprubahan ng pangulo, kabuuan na mahigit 2 bilyon fund allowances ng higit 400,000 health workers mula sa period na Setyembre 15, 2020 hanggang Disyembre 19, 2020 ang tatanggap ng 2,000 piso kada buwan. —sa panulat ni Airiam Sancho
Umabot na sa higit 49,000 indibidwal ang nabakunahan sa Lungsod ng Iligan, Cagayan De Oro kontra COVID-19.
Ayon kay acting City Health Officer Dr. Berlinda Lim, target nilang mabakunahan ang higit 200,000 na residente.
Aniya, kabuuan na 3,626 na health workers para sa A1 Priority at 96% naman sa A3 ang nakatanggap na ng kumpletong dose ng bakuna.
Sa A4 Priority, higit labing isang libo na essential workers lamang ng publiko at pribadong sektor ang tapos nang bakunahan.
Habang 76 na indibidwal sa A5 Priority ang nakatangap na ng kumpletong dose mula sa higit tatlong libo na bakunado lamang ng unang dose.
Samantala, hinikayat naman ni Lim ang mga Kapitan ng mga barangay na hikayatin ang mga nasasakupan hinggil sa importansya ng bakuna.
Arestado ang 12 suspek matapos ang ikinasang buy-bust operasyon ng mga otoridad sa Mandaluyong at Maynila.
Ayon sa otoridad, nasabat ang tatlong lalaki na may isang kilong shabu na tinatayang nagkakahalaga na 6.8 milyong piso sa fast-food chain sa Barangay Malamig, Mandaluyong.
Kasunod nito, nahuli si alyas Lastrifasa sa Barangay 648, Maynila dahil sa umano’y pagtutulak ng droga.
Gayundin, nakuha sa isang senior citizen ang 16 na sachet ng shabu na mahigit 700 gramo o halos limang milyong piso.
100 gramo naman ng shabu na tinatayang higit sa 600, 000 piso ang nakuha sa tatlong babae at tatlong lalaki sa Juan Luna, Tondo.
Kabuuan na dalawang kilo o higit dalawang milyon ang nasamsam sa mga operasyon.
Patuloy pa rin ang pag-iimbestiga ng otoridad habang nahaharap ang mga suspek sa kaso ng paglabag sa R.A. 9165 Comprehensive Dangerous Drug Act of 2002.—sa panulat ni Airiam Sancho
Puspusan na ang pagrepaso at pag-aaral ng PNP sa mga lugar na nakakapagtala ng malaking bilang ng mga away politika at karahasan tuwing halalan.
Kasunod na rin ito ng kautusan ni PNP chief police general Guillermo Eleazar na bantayan at magkasa ng mga plano kung paano pipigilan ang mga away politika sa gitna na rin nang paghahain ng Certificate of Candidacy (COC) para sa 2022 National Elections.
Sinabi ni Eleazar na kadalasang nag-uugat sa matinding away politika ng mga kandidato maging ng kanilang supporters ang mga naitatalang karahasan na may kinalaman sa halalan.
Dahil dito, inatasan din ng PNP chief ang Intelligence Group na bantayan at magsagawa ng background check sa mga kandidato kung may potensyal silang maghasik ng karahasan sa kanilang nasasakupan.
Muling tiniyak ng PNP na ginagawa nila ang lahat para tiyakin ang isang tapat, malinis, maayos at mapayapang halalan sa susunod na taon.—mula sa ulat ni Jaymark Dagala (Patrol 9)
Naipadala na ng AFP sa PNP-CIDG ang mga detalye ng mahigit isanlibong kaso at paglabag sa Human Rights Law ng CPP-NPA mula 2010 hanggang 2021.
Ayon kay Brigadier General Alejandro Nacnac, director ng AFP Center for Law of Armed Conflict, kabilang sa mga ipinadala nilang datos ang mga paglabag ng NPA tulad ng paggamit sa mga kabataan bilang child warriors, paninira sa mga kagamitan ng mga sibilyan at gobyerno, paggamit ng anti-personnel mines, pagpatay at iba pa.
Tiwala si Nacnac na sa pagtutulungan ng AFP, PNP at task force Elcac ay matutuldukan na ang mga paglabag ng mga komunistang terrorista kasabay ang pagpapanagot sa mga ito.—mula sa ulat ni Jaymark Dagala (Patrol 9)
Pumalo na sa mahigit 40K ang kabuuang bilang ng COVID-19 sa hanay ng PNP matapos madagdag ang 94 na bagong kaso ng virus.
Subalit ipinabatid ng PNP health service na malaki na ang nabawas ng mga aktibong kaso ng virus sa PNP na ngayo’y nasa 1,727 na lamang.
Nakapagtala rin ang PNP ng 148 na bagong gumaling sa sakit kaya’t pumalo naman na sa 38,700 ang kabuuang bilang ng mga gumaling o total recoveries nito
Samantala, nadagdagan naman ng dalawa ang bilang ng mga nasawi sa PNP dahil sa COVID-19, kaya’t sumampa na sa 121 ang death toll nito.—mula sa ulat ni JaymarkDagala (Patrol 9)