HEADLINES

Itinanghal muling “Best Island in Asia” ang Siargao.

Batay ito sa 34th readers’ choice awards ng US based luxury and lifestyle travel magazine Conde’ Nast Traveler kung saan nakapasok din bilang top 3 ang Palawan at top 8 naman ang Boracay.

Bahagi rin ng top 10 Islands in Asia para sa taong ito, ayon sa Conde Nast Traveler magazine ang Raja Ampat Islands sa Indonesia, Bali, Indonesia, Sri Lanka, Langkawi, Malaysia, Koh Samui, Thailand, Phi Phi Islands, Thailand at Phuket, Thailand.

Ipinagmamalaki ng Siargao na tinaguriang surfing capital of the Philippines ang pristine beaches nito, white san islets at iba pang itinuturing na natural wonders.

2018 nang unang manguna ang Siargao sa naturang listahan.

Pasok naman sa top 25 ng Asia list ng nasabing magazine ang El Nido Resorts na Lagen Island, Apulit Island, Pangalusian Island at Miniloc Island sa Palawan.

Inihayag ni 1Sambayan convenor retired supreme court senior associate Justice Antonio Carpio na si vice president Leni Robredo ang mismong mamimili ng kaniyang running mate.

Ani Carpio hindi rin ito mula sa rekomendasyon ng partido kundi personal na pagpili ni Robredo.

Mamaya o bukas nakatakdang i-anunsyo ni Robredo kung sino ang kaniyang magiging running mate sa 2022 national election.

Una rito, nanguna si dating Sen. Antonio trillanes sa isinagawang internal survey poll bilang kanilang pambato sa pagka-bise presidente.

Matatagalan pa umano ang pagtukoy sa kung sino ang nasa likod ng emergency alert kung saan tila kinakampanya si dating Sen. Bongbong Marcos.

Sinabi ni National Telecommunications Communication (NTC) deputy commissioner Edgardo Cabarrios, bagama’t hindi imposibleng matukoy ang mga ito, tiyak na mahirap ang pagdadaanang proseso dahil maikling oras lamang ang pagkaka-transmit ng mensahe.

Dagdag pa ni Cabarrios posibleng galing ang mensaheng ito sa isang portable cell site.

Napaka-epektibo kasi aniya ng mga portable cell sites sa mga lugar na tinamaan ng kalamidad at down ang komunikasyon.

Ito aniya ang ginagamit para balaan ang mga residente sa posibleng epekto ng dadaang o dumaang kalamidad.

Ngunit dahil wala namang kalamidad at emergency, maituturing na ilegal ang paraang ito na paggamit sa portable cell sites.

Bumaba pa sa 0.67 ang reproduction number ng COVID-19 sa National Capital Region (NCR) ngayong araw.

Ayon sa OCTA research group, kapansin-pansin na ang tuloy-tuloy na pagbaba ng reproduction number na naitatala kada araw.

Ang reproduction number umano na mas mababa sa 1 ay nangangahulugan na bumabagal na ang hawaan ng COVID-19.

Maliban sa reproduction number, bumaba rin sa 32% ang 7-day average ng COVID at bumaba naman sa 14% ang positivity rate.

Nitong Lunes, sinabi ng OCTA na nasa moderate risk na lamang ng COVID-19 ang kanilang klasipikasyon ang NCR.

Muling nanindigan si dating Sen. Bongbong Marcos na wala siyang dapat ihingi ng tawad sa mga akusasyong pagpatay, pagpapahirap at iba pang mga kalupitan umanong nangyari sa ilalim ng pamumuno ng kaniyang ama.

Sa isang panayam sinabi ni Marcos na kung may makapagpapakita sa kaniya na siya ay may ginawang mali o sinaktan, handa siyang humingi agad ng tawad.

Ngunit hindi umano niya magagawang humingi ng tawad para sa ginawa ng ibang tao.

2013 nang pagtibayin ang Marcos compensation law na magbibigay ng pinansyal na kumpensasyon sa mga naging biktima ng pagpapahirap at paglabag sa karapatang pantao noong panahon ng martial law.

Itinaas ng militar sa high terror level ang Iligan City sa Lanao Del Norte.

Ito’y dahil umano sa posibleng kaugnayan ng natagpuan na pampasabog noong nakaraang buwan sa lugar.

Ayon kay Jane Javier, researcher ng National Intelligence Coordinating Agency o NICA- Region 10, maaaring may kaugnayan ang mga natagpuang pampasabog sa aktibidad ng terorismo ng Daulah Islamiyah-Maute at ng rebeldeng grupo na New People’s Army.

Matatandaan na noong Setyembre 25, narekober ng mga pulis ang isang rocket-propelled grenade sa barangay Pala-o at pinaniniwalaan na bahagi ng malaking pambobomba.

Dahil dito, nagdesisyon umano ang NICA na isailalim sa high terrorism threat level ang lungsod.

“I wish her all the best’

Ito ang mensahe ni senate president pro tempore Ralph Recto kay vice president Leni Robredo matapos itong mag-anunsyong tatakbo sa pagka-pangulo sa 2022 elections.

Gayunman, sinabi ni Recto na mananatili ang kanyang suporta sa kandidatura ni Manila Mayor Isko Moreno.

Tumanggi namang magsalita hinggil sa isyu ang isa pang presidential candidate na si senador Panfilo Lacson dahil nagkasundo aniya sila ni senate president Tito Sotto na huwag mag-komento sa kanilang mga magiging karibal sa halalan.

Ayon naman kay dating senador Antonio Trillianes, natutuwa ang magdalo group sa naging pasya ni Robredo na pamunuan ang tunay na oposisyon sa pagtakbo sa pagka-pangulo.

Hindi siya aniya ang magiging running mate ni Robredo at sa halip ay tatakbo siyang muli sa pagka senador.—mula sa ulat ni Cely Bueno (Patrol 19)

Tuloy na sa pagtakbo bilang pangulo ng bansa si Vice President Leni Robredo.

Kasunod na rin ito nang pagtanggap ni Robredo sa pag-endorso ng opposition coalition na 1Sambayan sa kanya bilang pambato nito sa 2022 presidential elections.

Sa kaniyang talumpati, sinabi ni Robredo na lalaban siya para mawakasan na ang aniya’y luma at bulok na sistemang politika sa bansa.

Binigyang-diin ni Robredo na buong-buo na ang kaniyang loob at kailangan aniyang palayain ang mga Pilipino mula sa kasalukuyang sitwasyon, kaya’t inihahain niya ang kanyang sarili bilang kandidato sa pagka-pangulo.—mula sa ulat ni Jaymark Dagala (Patrol 9)

Nangangamba ang General Santos City, City Health Office sa kakulangan ng staff na mag-seserbisyo sa mga ospital.

Ito ayon kay Dr Rochelle Oco, pinuno ng City Health Office ay matapos mag-positibo sa COVID-19 ang 29 na healthcare workers kabilang ang pitong doktor.

Sinabi ni Oco na 660 ang active cases ng COVID-19 sa Gensan na nasa 471 ang death toll, subalit mahigit 12,000 ang naka-recover na sa nasabing sakit.

Kasabay nito, ipinabatid ni Oco na 50% na ng mga residente sa Gensan ang nabakunahan, subalit malaking hamon ang pagbabakuna sa mga Senior Citizen na karamihan ay naniniwala aniya sa fake news o disinformation hinggil sa COVID-19 vaccines.