HEADLINES

Anim ang patay habang 38 ang na-ospital sa gitna ng diarrhea outbreak sa bayan ng Manay, Davao Oriental.

Ayon sa provincial government ng Davao Oriental, 26 na ang nakarekober habang dalawa ang naka-admitt pa rin sa Davao Oriental Provincial Hospital – Manay.

Dalawa naman sa mga namatay ay napag-alamang nakaranas ng matinding dehydration.

Nagsasagawa na ng imbestigasyon ang local na pamahalaan sa sanhi ng outbreak na hinihinalang food poisoning.

Namahagi naman ang LGU ng chlorine at iba pang water purifying tablets habang inabisuhan ang mga residente na iwasan munang inumin ang tubig mula sa kanilang mga gripo hangga’t hindi pa matiyak na ligtas ito. —sa panulat ni Drew Nacino

Inilatag na ng Commission on Elections (COMELEC) ang mga panuntunan para sa huling araw ng paghahain ng Certificate of Candidacy (CoC) ngayong araw.

Ayon kay COMELEC Spokesman James Jimenez, kung mayroon pang maghahain ng CoC at maabutan ng deadline na 4:45 mamayang hapon ngayong Oktubre 8, ililista na lamang ng receiving office ang pangalan ng aspirants na nasa loob ng designated area at tanging may kumpletong CoC ang ilalagay.

Tatawagin din aniya ang mga pangalan ng mga nag-file base sa pagkakasunod-sunod sa listahan upang maghain at tatakan ng ‘received ’ang CoC.

Ilalabas naman simula Oktubre 29, ang tentative list ng mga kandidato sa official website ng COMELEC hanggang Nobyembre 8, para sa pag-ayos ng typographical error sa pangalan ng mga kandidato para sa official ballot.—sa panulat ni Drew Nacino

Nagpaliwanag na ang Department of Health sa pangungulelat ng Pilipinas sa Nikkei Asia sa COVID-19 recovery index.

Ayon kay Health Undersecretary Maria Rosario Vergeire, gumamit ang news magazine, na nakabase sa Tokyo, ng pitong araw na panahon noong Setyembre upang suriin at ikumpara ang sukatan ng mga bansa.

Sa nasabi anyang panahon ay halos patapos o tapos na ang COVID-19 surge sa ibang mga bansa, gaya sa Indonesia, habang ang Pilipinas ay nasa kalagitnaan pa ng pananalasa ng delta variant.

Ipinunto ni Vergeire na noong Setyembre lamang nagsimulang mag-peak ang mga kaso ng COVID sa bansa kung saan sa panahong ito isinagawa  ang analysis ng dalawang survey kaya’t nangulelat ang Pilipinas.

Aminado ang opisyal na naapektuhan din ng pagtaas ng delta variant cases ang vaccination program ng gobyerno kaya’t nakakuha ng mababang score sa recovery index ang bansa. —sa panulat ni Drew Nacino

Lumobo pa sa 22, 657,351 ang naka-kumpleto na ng bakuna kontra COVID-19 sa bansa.

Ito ang ipinagmalaki ng palasyo matapos mangulelat ang Pilipinas sa Nikkei Asia COVID-19 recovery index.

Ayon kay Presidential Spokesman Harry Roque, sa kabuuan ay 48,390,819 na ang tinurukan hanggang noong Miyerkules kabilang ang 25.7 million na nakatanggap ng first dose.

Sa ngayon aniya ay nasa 29% pa lamang ng kwalipikadong populasyon ng bansa ang fully vaccinated habang umabot na sa 76.7 % ang nakakumpleto ng bakuna sa metro manila.

Samantala, aarangkada na rin sa Oktubre 15, ang pagbabakuna sa mga edad 12 hanggang 17 na may commorbidities. —sa panulat ni Drew Nacino

Inaprubahan ng Food And Drug Administration (FDA) ang application para sa Emergency Use Authorization (EUA) ng ronapreve.

Ayon kay FDA Director General Eric Domingo, ang ronapreve ay maaaring gamot sa mild to moderate COVID-19 cases sa mga may edad 12 pataas.

Batay sa Agence France Presse report, lumalabas sa phase 3 trials ng ronapreve na napipigil nitong lumala pa o mag resulta sa pagka-ospital o pagkamatay ang mild o moderate case ng COVID-19 patients.

Obligadong magkasa ng contingency plan ang mga paaralang kasali sa pilot implementation ng limitadong face to face classes, sakaling mag positibo sa COVID-19 ang sinumang estudyante o guro.

Ayon ito kay Education Secretary Leonor Briones, bilang bahagi aniya ng mekanismo sakaling dapuan ng virus ang mga estudyante, guro o sinumang school personnel.

Muling pinayapa ni Briones ang mga magulang na takot isabak ang kanilang mga anak sa limited face to face classes na inaasahang magsisimula sa Nobyembre 15.

Sa ngayon ay nasa 59 na eskuwelahan ang pumasa sa risk assessment ng Department of Health para sa pilot implementation ng limited face to face classes.

Nalulugi na ang mga maggugulay sa Cordillera Region.

Ayon ito sa Apit Tako Kordilyera o ang Alyansa Dagiti Pesanta Ti Taeng Kordilyera matapos anitong dumagsa ang mga puslit na imported vegetables sa merkado.

Sinabi ni Fernando Bagyan, kinatawan ng grupo, na maraming buyers ang hindi nakakaakyat para sana bumili ng mga gulay kaya’t marami rin sa mga ito ang nabubulok na lang o ipinamimigay tulad ng carrot, repolyo at broccoli, dahilan kaya’t nalulugi ang mga manggugulay.

Kalahati ng aning gulay ng Cordillera ay dinadala sa Metro Manila.

Posibleng dala lamang ng galit ang naging banta ng Pangulong Rodrigo Dutere na ipapakulong ang mga senador kapag may ipina-contempt na miyembro ng  gabinete.

Ayon ito kay Senate President Vicente “Tito” Sotto III, kaya’t hindi siya nababahala sa nasabing banta ng Pangulong Duterte.

Sa pinakahuling Talk to the people, sinabihan ng pangulo ang mga miyembro ng gabinete na tumindig at igiit sa mga senador na huwag silang sigawan at kapag ito ng mga mambabatas ay pina-contempt, ipapakulong daw niya ang mga senador.

Kasabay nito, sinagot ni Sotto ang mungkahi ni Justice Secretary  Menardo Guevarra na magkaroon ng adjustment ang Senate Blue Ribbon Committee sa paraan ng pag iimbestiga.

Binigyang diin ni Sotto na batay sa rules ng Senado, ang chairman ng komite ang nagpapairal ng patakaran at kung mayroon anyang reklamo sa takbo ng pagdinig ng blue ribbon committee, posible itong pag aralan ng rules committee para maresolba. —mula sa ulat ni Cely Bueno (Patrol 19)

Isinusulong ng National Commission of Senior Citizens (NCSC) ang anito’y integrated database ng health profiles at skill sets ng senior citizens.

Ayon kay NCSC Chairperson Atty. Franklin Quijano, ito ay para mas mabilis na matugunan ng gobyerno at iba pang ahensya ang pangangailangan ng senior citizens sa bansa, bilang bahagi na rin ng 2021 Elderly Filipino Week.

Oktubre 4, nang malagdaan ang Implementing Rules and Guidelines ng Republic Act 11350 o IRR, batas na nagtatatag sa NCSC.

Sinabi ni Quijano na ang database ng health profiles ng senior citizens ay  maaaring ibahagi hindi lamang sa national government kundi maging sa ibat ibang grupo ng senior citizens, mga organisasyon at financial institutions.