HEADLINES

Umabot na sa 90%  ang utilization rate sa Intensive Care Unit o ICU ng Cagayan Valley Medical Center o CVMC.

Ito ay kahit pa bahagyang bumaba na ang bilang ng mga naka-admit na pasyente sa naturang ospital.

Paliwanag ni Dr. Glenn Mathew Baggao, pinuno ng CVMC, maliban sa COVID-19 ay kailangan ding tugunan ang iba pang mga sakit tulad ng hypertension, kidney disease, diabetes at iba pa.

Bahagyang bumaba aniya sa 186 ang bilang ng naka-admit na COVID-19 patients sa nasabing pagamutan mula sa dating mahigit 200.

Habang nabawasan naman ng 70% ang utilization rate sa regular room ng CVMC.—sa panulat ni Hya Ludivico

Iba’t-ibang personalidad ang nagdeklara kahapon ng kani-kanilang kandidatura at pagnanais na tumakbo para sa 2022 elections.

Kabilang sa mga naghain ng Certificate of Candidacy (COC) sa ika-pitong araw ng filing ay si Vice President Leni Robredo, na tatakbong independent candidate sa pagka-pangulo.

Naghain din ng kandidatura sa pagkapangulo ang dating BPO call center agent na si Jeffry Roden.

Pasok naman sa listahan ng mga naghahangad na maging senador sina Rep. Neri Colmenares sa ilalim ng Makabayan Partylist, dating vice president Jejomar Binay sa ilalim ng partido United Nationalist Alliance, radio show host at entrepreneur na si Dr. Carl Balita, brodkaster at dating vice-president Noli De Castro sa partido ni Manila Mayor Isko Moreno, dating speaker at Taguig Representative Alan Peter Cayetano, at Human Rights Lawyer na si Atty. Jose Manuel Chel Diokno.

Naghain naman ng kanilang Certificate of Nomination and Acceptance (CONA) ang Bayan Muna, Trade Union Congress of the Philippines (TUCP), Partido Lakas ng Masa at OFW Family.

Sa ngayon, aabot na sa 57 ang naghain ng kandidatura bilang presidente, 16 sa pagkabise-presidente, 92 bilang senador at 194 partylist ang naghain ng kanilang CONA.—sa panulat ni Hya Ludivico

Umapela ang Metro Manila Mayors sa Department of Education (DEPED) na maisama sa pilot implementation ng face-to-face classes ang kahit isang paaralan sa bawat lungsod sa Metro Manila.

Kaugnay nito, sinabi naman ni DEPED Undersecretary Nepomuceno Malaluan na kabilang ito sa kanilang mga ikinokonsidera lalo na’t bumababa na ang kaso ng COVID-19 sa NCR.

Paliwanag ni Malaluan, ang Department Of Health ang magsasagawa ng risk assessment sa bawat lugar na pagdarausan ng in-person classes.

Sa ngayon ay 59 paaralan ang nakapasa sa risk assessment ng DOH para sa pilot test ng face-to-face classes.—sa panulat ni Hya Ludivico

Tanging ang COVID-19 vaccine ng Pfizer Biontech at Moderna ang pinapayagang maiturok sa mga kabataan sa bansa.

Sinabi ni Food and Drug Administration Director General Dr. Eric Domingo, na kahit  nagsabi na ang Sinovac biotech ng China na nais nilang mag-apply ng Emergency Use Authorization o EUA, ay nakukulangan pa sila sa clinical trial nito.

Aniya, hihintayin muna nilang matapos ang clinical trial phase 3 ng Sinovac upang malaman kung mabisa at ligtas ito para sa mga batang edad 12 hanggang 17.

Tiniyak naman ni Domingo na lahat ng aplikasyon ay dumadaan sa masusing pagsusuri.—sa panulat ni Hya Ludivico

Asahan na ang mahina hanggang sa malakas na pag-ulan sa Eastern Visayas at ilang bahagi ng Bicol region dahil sa bagyong Maring, ngayong araw.

Huling namataan ng pagasa ang bagyo sa layong 585 kilometers, silangan ng Virac, Catanduanes.

Taglay nito ang lakas ng hanging aabot sa 45 kilometers per hour at pagbugso na hanggang 55 kilometers per hour.

Kumikilos ito pa-Silangan Timog-Kanluran sa bilis na 15 kilometers per hour.

Samantala, pinayuhan naman ng PAGASA ang mga residente sa Eastern Visayas at Bicol na maghanda sa posibleng flashfloods at landslides lalo sa mga mababa at bulubunduking lugar.  —sa panulat ni Drew Nacino

Welcome kay Presidential aspirant at dating Senador Ferdinand “Bongbong” Marcos Jr. ang pagpasok din ni Vice President Leni Robredo sa 2022 Presidential race, indikasyon ng panunumbalik ng kanilang tunggalian na nagsimula noong 2016 polls.

Magugunitang tinalo ni Robredo si Marcos sa Vice Presidential race noong 201 at nagwagi sa ilang recounts na inihirit ng kampo ng anak ni dating Pangulong Ferdinand Marcos.

Ayon sa nakababatang Marcos, inasahan na niya at hindi na ikinagulat ang hakbang ng Bise Presidente dahil matagal naman na nitong sinasabi na kung tatakbo siya sa pagka-Pangulo ay tatakbo rin si Robredo.

Isa anyang indikasyon ng matatag na demokrasya kung maraming kandidato ang sasabak sa halalan dahil maraming pagpipilian ang mga mamamayan.

Samantala, tumanggi munang mag-komento ang isa pang Presidential aspirant na si Senador Panfilo Lacson sa kanilangmga makakalaban habang tikom din ang mga kapwa aspirant na sina Senador Manny Pacquiao at Manila Mayor Isko Moreno.—sa panulat ni Drew Nacino