HEADLINES

Umabot na sa 69 na kaso ng African Swine Fever (ASF) ang naitala sa mga barangay nitong Setyembre ayon sa report ng Department of Agriculture (DA).

Sinabi ni Agriculture Assistant Secretary Noel Reyes, natagpuan sa 29 na bayan sa 13 na probinsya ang naitalang mga kaso.

Bukod dito, naitala rin ng Bureau of Animal Industry ang 41 barangay na apektado ng naturang sakit sa Ilocos Region.

Samantala, magbibigay ng karagdagan na 4-B budget ang DA para sa programa nito laban sa pagkalat ng ASF. —sa panulat ni Airiam Sancho

Pinangunahan ni Health Secretary Francisco Duque, III at opisyal ng Inter-Angency Task Force ang soft-launch ng Vaxcert PH program para sa mga nabakunahan na na OFW at mga Pilipino na mangingibang bansa na ginanap sa SM City Clark, Pampanga, makaraang araw.

Ayon kay Duque, ang Vaxcert PH Platform ay maaring gamitin sa lokal at internasyonal na byahe alinsunod sa guidelines ng World Health Organization (WHO) sa pagpapatupad ng COVID-19 Certificates.

Aniya, ang importansya ng programang ito ay para masiguro na ang mga OFW at iba ay hindi magkaroon ng problema sa pangingibang bansa.

Samantala, ang naturang programang ito ay nilahukan din ng National Task Force Against COVID-19 at SM supermalls.—sa panulat ni Airiam Sancho

Pormal nang naghain ng Certificate Of Candidacy o COC sa pagka-Pangulo si dating Sen. Bongbong Marcos sa ilalim ng Partido Federal ng Pilipinas o PFP.

Sinamahan si Marcos ng kaniyang asawa na si Atty. Louise at dalawang anak na si Ferdinand Alexander at Joseph Simon sa paghahain ng kandidatura.

Kahapon, inanunsyo ni Marcos sa kaniyang Facebook page ang kaniyang intensyong tumakbo bilang Pangulo sa 2022 national election.

Ani Marcos, hangad niyang maibalik ang mapagkaisang paglilingkod na magbubuklod sa ating bansa.

Nais umano niyang magkaisa ang lahat at magkakasamang makabangon ang mga Pilipino sa pagkalugmok ng ekonomiya bunsod ng pandemya.

Tila nag benepisyo ang messaging app na Telegram sa kasagsagan ng outage ng Facebook (FB).

Ito ayon kay Pavel Durov, Founder ng Telegram App ay matapos madagdagan ng pitumpung milyong bagong users ang kanilang app bagamat bumagal ito.

Sinabi ni Durov na lumampas sa normal ang dami ng daily users ng Telegram App na ininstall ng maraming FB users nang halos anim na oras na hindi naka access sa Facebook.

Una nang humingi ng paumanhin ang Facebook sa aberya sa kanilang site, dahilan kaya’t hindi rin ma-access ng ilang oras ang Instagram at Whats App.

Pinuna ng Senado ang mga nakita nitong kawalan ng alokasyon sa panukalang budget ng DILG bilang pantugon sa pandemya.

Ayon kay Senate Committee on Finance Chairman Sonny Angara, walang nakalaan para sa pagkuha ng contact tracers sa ilalim ng proposed P248.5-B na budget ng DILG.

Dahil dito, tiniyak ni Angara kay DILG Secretary Eduardo Año na hahanapan ng Senado ng pondo ang kailangang budget ng DILG para sa pagkuha ng 25,000 contact tracers sa susunod na taon.

Sisiguruhin aniya ng Senado na tumutugon sa COVID-19 pandemic ang panukalang pambansang budget para sa susunod na taon.

Magugunitang una na ng napuna ng Senado sa panukalang 2022 Budget na binalangkas ng Malakanyang ang kawalan ng pondo para pambili ng bakuna na bukod pa sa booster shots, wala rin para sa bakuna ng mga 12 hanggang 17 anyos at wala ring inilaan para sa special risk allowance ng healthcare workers. —ulat mula kay Cely Ortega Bueno (Patrol 19)

Pinaiimbestigahan ni Senador Imee Marcos ang aniya’y nagaganap na Agricultural Smuggling kasabay ang pagtukoy at papanagot sa mga importer at mga opisyal ng Department of Agriculture (DA) at Bureau of Customs na sangkot dito.

Kasunod na rin ito nang pag kuwestyon ni Marcos sa DA sa pagdagsa ng imported agricultural products at pabirong tinanong kung Department of Importation na sa halip na DA nasabing ahensya.

Sinabi ni Marcos na posibleng pananabotahe sa ekonomiya ang hindi napapanahon at sobra sobrang importasyon ng mga gulay mula China habang ang mga gulay ng mga lokal na magsasaka sa Benguet at iba pang taniman sa Cordillera ay patuloy na nabubulok.

Binigyang diin ni Marcos na ang pagbibigay proteksyon sa mga lokal na mga magsasaka ang solusyon sa pangmatagalang seguridad sa pagkain at hindi ang importasyon ng mga produktong pang-agrikultura, kahit pa ito ay legal.

Sa harap ng kawalan ng mga bumibili at pagkabulok ng mga ani ng mga lokal na magsasaka dahil sa quarantine restrictions, nakumpiska ng boc ang nasa P4.7-M na halaga ng mga imported na repolyo, carrots, brocolli at iba pang gulay sa isang raid sa Divisoria at Tondo sa Maynila. —ulat mula kay Cely Ortega Bueno (Patrol 19)

Pumalo na lamang sa 192 ang bilang ng mga lugar sa National Capital Region o NCR ang nakapailalim pa rin sa granular lockdown.

Batay sa datos ng Philippine National Police o PNP, mas mababa ito ng 41 kumpara sa naitalang 233 na mga lugar na nakapailalim sa granular lockdown kahapon.

Mula sa 192, sinabi ng PNP na 126 sa mga ito ay mga kabahayan, 29 ang residential buildings, 23 ang mga kalye habang 14 dito ay mga subdivision o village.

Ang mga ito ayon sa PNP ay pawang nagmula sa 152 na mga barangay sa buong NCR dahil sa patuloy na pagsipa ng kaso ng COVID-19.

Nananatiling nakakakalat ang mga pulis katuwang ang iba pang force multipliers sa mga lockdown areas para tiyakin na nasusunod pa rin ang minimum health protocols.—ulat mula kay Jaymark Dagala (Patrol 9)

Tiniyak ng Philippine National Police o PNP sa publiko na magpapatuloy ang kampaniya kontra iligal na droga kahit nasa gitna ng pandemiya.

Ito ang inihayag ni PNP Chief P/Gen. Guillermo Eleazar kasunod ng pagkakasabat ng kabuuang P5.7 milyong halaga ng iligal na droga sa dalawang magkahiwalay na operasyon sa lungsod Maynila.

Ayon kay Eleazar, inatasan na niya ang Manila Police District o MPD na magsagawa ng malalimang imbestigasyon hinggil dito upang malaman kung sinu-sino ang mga nasa likod nito at kung sila ba’y kabilang sa malalaking sindikato ng iligal na droga.

Magugunitang aabot sa anim hanggang pitong suspek ang naaresto sa magkahiwalay na operasyon partikular na sa Tondo kahapon at sa San Miguel noong Lunes.—ulat mula kay Jaymark Dagala (Patrol 9)

Namemeligrong kapusin sa supply ng tubig ang mahigit limang bilyong katao sa taong 2050.

Ito ang ibinabala ng United Nations kasabay ng paghimok sa mga leader na maglatag na ng mga paraan kontra sa nagbabadyang global water crisis.

Sa Climate Change Conference, inihayag ng UN – World Meteorological Organization na noon lamang 2018 ay nasa tatlo punto anim na bilyong katao na ang walang sapat na supply ng tubig sa loob ng isang buwan.

Nasa point 5% lamang anila ng tubig sa mundo ang useable at maging ang fresh watersa mga lawa at ilog bukod pa sa tumataas na temperatura na nagreresulta sa global at regional precipitation changes.

Dahil dito, nagbabago ang rainfall patterns at agricultural seasons na naka-aapekto naman sa food security at human health.

Kabilang sa tinukoy ng UN na namemeligrong makaranas ng water shortage ang Asya, na may pinaka-malaking populasyon sa mundo.—sa panulat ni Drew Nacino