HEADLINES

Muling nagbuga ng usok ang Taal volcano sa Batangas, kagabi.

Dakong ala syete nang maitala ng phivolcs ang “anomalously high” volcanic sulfur dioxide emission mula sa taal.

Umabot sa 25,456 tonnes per day ang ibinugang sulfur dioxide ng Taal kagabi, ang pinakamataas na volcanic so2 emission simula noong Hulyo 4, kung saan nakapagtala naman ng 22,628 tons per day.

Nananatili sa katamtaman hanggang malakas ang “degassing” sa main crater at nagdulot ng pagsingaw ng usok na aabot sa tatlong libong metro ang taas mula sa volcano island.

Ang mataas na sulfur dioxide emission ay indikasyon ng mataas na lebel ng magmatic degassing mula sa main crater na maaaring magresulta sa isang explosive activity.

Kasalukuyang nasa alert level 2 ang status sa Taal volcano.—sa panulat ni Drew Nacino

Posibleng humirit ng dagdag-pasahe ang mga transport group bunsod ng serye ng oil price increase sa nakalipas na anim na linggo.

Ayon kay Pasang Masda President Obet Martin, sa oras na tumaas muli ang presyo ng mga produktong petrolyo sa susunod na linggo ay mapipilitan silang humiling ng fare increase.

Hindi na anya nila kakayanin ang lumalaki nilang gastos sa krudo kaya’t umaapela rin sila ng pang-unawa mula sa mga mananakay.

Kahapon ay muling inilarga ng mga kumpanya ng langis ang ika-6 na sunod na linggong dagdag presyo sa kanilang mga produkto na aabot na sa halos P6 sa diesel, P4 sa gasolina at P5 sa Kerosene.

Handa naman liga ng transportasyon at operators sa Pilipinas at Alliance of Transport Operators and Drivers Association of the Philippines na makipag-dayalogo sa gobyerno kung paano matutulungan ang kanilang sektor.—sa panulat ni Drew Nacino

Umabot na sa halos $100 milyon ang nalugi sa social media giant na Facebook dahil sa malawakang outage.

Ito ang kinumpirma ng Facebook matapos makabalik online ang kanilang platforms, kabilang na ang Instagram at Whatsapp.

Bumagsak din ng 4.9%  ang stocks ng FB habang nalagasan ng halos $7 bilyon ang yaman ni Facebook Chairman at CEO Mark Zuckerberg.

Nilinaw naman ng Facebook na configuration change sa kanilang routers at hindi tangkang pag-hack ang dahilan ng major outage. —sa panulat ni Drew Nacino

Naghain nadin ng Certificate of Candidacy (COC) ang ilang mga kilalang artista at atleta para sa 2022 National Elections.

Kabilang sa mga naghain ng COC ay ang re-electionist na si Jhong Hilario para sa kaniyang ikalawang termino bilang konsehal ng makati.

Naghain din sina Yul Servo para sa posisyon sa pagka-Bise Alkalde ng Maynila, Jerico Ejercito bilang Vice Governor ng Laguna at ka-tandem ng dating mamahayag na si Sol Aragones na tatakbo naman bilang Gobernador.

Nagsumite din ang artistang si Anjo Yllana bilang Kongresista ng Camarines Sur at Richard Yap bilang Congressman sa Cebu City.

Tatakbo naman bilang Mayor ng Victorias City sa Negros Occidental ang Star Magic Artist na si Javi Benitez na nobyo ng Filipina-American Actress na si Sue Ramirez.

Kakandidato naman bilang board member ng Nueva Ecija si Jason Abalos habang kabilang naman sa council slate ni San Juan City Mayor Francis Zamora ang mga basketbolistang sina James Yap, Ervic Vijandre, Paul Artadi at Don Allado.

Nagpasa din ng COC ang mga beauty queen na si Ali Forbes bilang Konsehala ng Quezon City at Marissa Del Mar bilang kinatawan ng  One Filipino Worldwide Party-List (OFW).

Magtatagal ang COC filing hanggang sa Biyernes, Oktubre 8. —sa panulat ni Angelica Doctolero

Binalaan ni Pangulong Rodrigo Duterte ang kanyang mga kaibigan at kaaway na iwasang i-sabotahe ang 2022 elections.

Ayon kay Pangulong Duterte, nais niyang maranasan ng mga pilipino sa kanyang huling terminokung paano magkaroon ng malinis na halalan sa Mayo 2022.

 I’m warning everybody, everybody, kasama ko sa partido o hindi, o kaibigan kita o hindi, kalaban kita, itong election na ito huwag mo talagang, — ‘wag kang magkamali kasi nandiyan pa ako of course the I think supreme body during the election is the COMELEC, I will just also coordinate with the COMLEC I will not allow fraud ,” pahayag ni Pangulong Rodrigo Duterte.

Nanawagan din ang Pangulo sa mga magkakalabang pulitiko at tribal group,lalo sa Mindanao, na iwasan ang karahasan.

Kabilang sa mga tinukoy ng Pangulo ang New People’s Army na hindi anya dapat makisawsaw sa eleksyon.

I am appealing to the leaders both, sa lahat ng tribo, wag kayo manggulo kasi, I said if you do not follow…disarmahan lahat ng tao and then kulungin ka,” wika ng Pangulong Duterte.

Humiling ng dagdag na pondo ang Philippine National Police (PNP) upang suportahan ang pagbili ng mga body cameras na gagamitin sa operasyon ng mga pulis.

Ayon kay PNP Chief Police General Guillermo Eleazar, nangangailangan pa ang kanilang ahensya ng mahigit 248-B budget para sa 32 unit ng body-worn cameras.

Sa ngayon, hinihintay nalang ng PNP na maaprubahan ang kanilang hiling sa Senate Finance Committee. —sa panulat ni Angelica Doctolero

Umapela sa national government ang mga business at industry group higpitan pa ang restriksiyon para sa mga hindi pa bakunado kontra COVID-19.

Ito umano ang paraan ng private sector groups upang mahimok ang hindi pa nagpapaturok na magpabakuna na.

Sa joint statement, inihayag ng mga negosyante na suportado nila ang vaccination policies ng pamahalaan upang mailigtas mula sa malalang sakit ang mayorya ng mga pinoy at makabangon muli ang ekonomiya.

Bagaman may karapatan anila ang lahat na magdesisyon sa vaccination, naniniwala silang dapat mas maging mahigpit ang gobyerno at pribadong sektor sa aktibidad ng mga unvaccinated person para sa kaligtasan ng lahat.

Ipinunto ng grupo na mas nagbibigay ng matinding banta maging sa mga nabakunahan na at nalalagay rin umano sa peligro ang healthcare system kung magiging maluwag ang restriksyon sa mga hindi bakunado.—sa panulat ni Drew Nacino