HEADLINES

Umabot na sa 80% ang bilang ng mga fully vaccinated sa hanay ng Philippine National Police (PNP).

Ayon sa PNP Administrative Support to COVID-19 Task Force, nasa mahigit 200,000 mga police personnel na ang nabakunahan kontra COVID-19.

Sa pahayag ni ASCOTF Commander Lt. Gen. Joselito Vera Cruz, 89,940 sa mga pulis ang naturukan ng Sinovac; 65,698 sa bakunang Astrazeneca; 13,925 sa Sputnik V vaccine; 9,251 naman sa Pfizer; 5,411 sa Moderna vaccine; 35,130 sa Janssen vaccine habang 203 naman sa Sinopharm.

Umaasa naman si Vera Cruz na makukumbinsi ang mga pulis na ayaw magpabakuna upang madagdagan pa ang bilang ng mga fully vaccinated sa hanay ng PNP.

Sa ngayon, nagpapatuloy parin ang pagbabakuna sa ibat-ibang regional police offices para hikayatin ang nasa 6,000 pang mga pulis na magpabakuna bilang proteksiyon laban sa COVID-19. —sa panulat ni Angelica Doctolero

Umarangkada na ang nasa 28 bagon ng MRT-3 na malaking tulong sa mga pasaherong bumibiyahe papasok sa kanilang mga trabaho.

Ito’y matapos makapasa sa speed tests ang mga train set para masigurong ligtas ang mga pasahero sa tulong narin ng Sumitomo-Mhi-Tesp.

Dahil dito, tuloy-tuloy ang pagpapasakay ng mga tren kung saan, pinayagan ang nasa 30% ng mga pasahero na may katumbas na 124 kada train car o 372 na pasahero kada train set.

Sa kabila nito, mahigpit paring ipinatutupad ng DOTR ang “7 commandments” kabilang na ang:

1. Pagsuot ng face mask at face shield;
2. Iwasan ang pagsasalita, pakikipag-usap o pagsagot ng telepono;
3. Iwasan ang pagkain;
4. Maayos na bentilasyon;
5. Kailangan din na may frequent disinfection;
6. Hindi din pinapayagang sumakay ang mga symptomatic passenger; at
7. Sundin ang physical distancing para maiwasan ang hawahan ng COVID-19 sa loob ng tren. —sa panulat ni Angelica Doctolero

Bumaba ng 12% ang approval rating ng administrasyong Duterte sa pagtugon sa 14 na national issue sa gitna ng pandemya batay sa isinagawang survey ng Pulse Asia noong Setyembre.

Sa issue ng pagsugpo sa katiwalian, sumadsad sa 52% ang approval rating ng administrasyon noong isang buwan kumpara sa 64% noong Hunyo.

Isinagawa ng Pulse Asia ang face to face interview sa 2,400 respondent mula Setyembre 6 hanggang 11.

Bahagya namang sumadsad sa 74% ang rating pagsugpo sa kriminalidad kumpara sa 79% noong; paglikha ng maraming trabaho, 49% mula sa 54 %.

Pag-protekta sa kalikasan, 56 mula sa 61% pagpapanatili ng kapayapaan 64 mula sa 70% kampanya kontra COVID-19 pandemic, 59 kumpara sa 65% noong Hunyo.

Sahod sa mga manggagawa, 54 mula sa 48%; inflation, 37 kumpara sa 43% kapakapanan ng mga Overseas Filipino Workers, 66 mula sa 73% at patas na law enforcement 60 kumpara sa 67%.—sa panulat ni Drew Nacino

Pormal nang inilatag ng Department of Trade and Industry (DTI) ang guidelines sa muling pagbubukas ng mga gym sa National Capital Region sa ilalim ng alert level system.

Base sa inilabas na guidelines ng DTI, kailangang magsasagawa ng health screening sa mga pintuan ng mga gyms at dapat ay natutupad ang four-meter physical distancing habang suot ang mga facemask.

Bukod pa dito, ipagbabawal din ang paggamit ng water fountains at pagsasagawa ng group activity.

Dapat din na mayroong sanitation facilities o supplies, gaya ng handwashing station na may sapat at ligtas na water supply, sabon at 70% isopropyl o ethyl alcohol, hands-free trash cans, soap at towel dispensers, door openers, at iba pang mga equipment. —sa panulat ni Angelica Doctolero

Inihayag ng National Disaster Risk Reduction Management Council (NDRRMC) na aabot sa 221 ang bilang ng mga pasaherong nastranded sa mga terminal bunsod ng bagyong Lannie.

Ito ay matapos kanselahin ang operasyon ng 12 pantalan habang mayroon ding 100 rolling cargoes at tatlong barko ang sinuspinde.

Samantala, inihayag naman ng Philippine Coast Guard na limang vessel pa ang nastranded sa Palawan dahil sa bagyong Lannie.

Bukod pa dito, ilang mga residente din ang apektado sa Western Visayas kung saan, nasira at nalubog ang ilang mga kalsada maging ang mga barangay na nasa mga bundok matapos magkalandslide dahil sa pagbaha.

Umakyat naman sa mahigit anim na metro ang lebel ng tubig sa Jalaur River sa Pototan, Iloilo habang nalubog naman sa baha ang ilang barangay sa bayan ng Zarraga, Iloilo.

Sa ngayon, patuloy na minomonitor ng NDRRMC ang galaw at kilos ni bagyo habang binalaan narin ang mga residente na nasa low-lying areas na itinuturing na catch basin ng tubig baha dahil sa tubig na nanggagaling sa mga bundok. —sa panulat ni Angelica Doctolero

Nanatiling pangunahing concern ng mayora ng mga Pilipino ang maging malusog lalo ngayong may COVID-19 pandemic.

Batay ito sa isinagawang survey ng Pulse Asia Survey noong Setyembre 6 hanggang 11.

Nasa 70% ng mga adult pinoy ang nagnanais na maging malusog at iniiwasang magkasakit habang 47% ang concern sa pagkakaroon ng maayos na trabaho.

Nasa 46% naman ang concern sa araw-araw na pagkain habang 43 % sa usapin ng edukasyon.

Kabilang din sa mga concern ng mga Pinoy ang pagresponde sa pangangailangan ng calamity-hit areas, 71%  at pagbibigay ng tulong sa mga nawalan ng kabuhayan dahil sa pandemya, 64 %. —sa panulat ni Drew Nacino