HEADLINES

Target ng Department of Foreign Affairs (DFA) na linisin ang nasa 20K suspended passport application backlog hanggang katapusan ng buwan.

Ayon kay Foreign Affairs Assistant-Secretary Senen Mangalile, mula sa 696,412 passport applications nitong Hulyo 9 hanggang october 2, na-i-transmit na ng DFA ang nasa 93%.

Habang 4% para sa verification at 3% o 24,069 ang nasuspinde dahil sa mga mali sa form na isinumite ng aplikante.

Aminado naman si Mangalile na kung hindi nila maabot ang deadline ay aabutin ng dalawa pang linggo bago tuluyang ma-overhaul ang buong backlog.

Sinosolusyunan na rin anya ng kagawaran ang paglalabas at delivery ng passports at bilang tugon ay plano nilang kunin ang serbisyo ng dalawang kilalang courier company sa bansa.—sa panulat ni Drew Nacino

Inatasan na ng Department Of Energy ang mga kumpanya ng langis na tiyaking sapat ang supply ng kanilang mga produkto sa gitna ng numinipis na global oil supply sa ika-4 na quarter ng taon.

Ayon kay Energy Secretary Alfonso Cusi, dapat maglatag ng mga plano at solusyon ang mga oil company upang mabawasan ang epekto ng price hike sa mga susunod pang buwan.

Nakasaad sa ilalim ng Executive Order 134 noong 2002 na dapat panatilihin ng lahat ng oil companies sa bansa ang minimum inventory ng Petroleum stock.

Ito’y upang matiyak na sapat at stable ang supply ng petroleum products sakaling magkaroon ng domestic at international events, tulad ng terrorist attacks at armed conflicts sa Middle East.—sa panulat ni Drew Nacino

Nanindigan si Transportation Secretary Arthur Tugade na transparent siya sa kanyang financial standing sa gitna ng lumabas na report mula sa Pandora Papers na mayroon siyang offshore account.

Ayon kay Tugade, noong 2003 sila nag-invest sa solart holdings upang mapangalagaan ang bahagi ng cash assets ng kanyang pamilya.

Lehitimo anya ang pagpapalago nila sa kanilang financial portfolio sa pamamagitan ng solar tulad ng ginagawa ng ibang negosyante na nag-da-diversify o naglalagay ng kanilang assets sa iba’t ibang investment accounts.

Sa dokumentong nakalap ng International Consortium of Investigative Journalists, iginiit ng Philippine Center for Investigative Journalism na hindi inilabas ni Tugade ang kanyang offshore investments na nagkakahalaga ng P57 milyon bilang assets kada taon buhat noong 2012.

Gayunman, iginiit ni Tugade na kasama sa sinumpaang statement of assets, liabilities and networth ang lahat ng kanyang assets sa ilalim ng ‘personal properties – intangible’, partikular ang ‘offshore investments’ mula 2012 hanggang 2020.—sa panulat ni Drew Nacino

Hindi natinag ang ilang Senador sa pag-i-imbestiga sa umano’y anomalya sa pagbili ng gobyerno ng medical supplies sa Pharmally Pharmaceuticals.

Ito’y sa kabila ng inilabas na memorandum ni Pangulong Rodrigo Duterte na nagbabawal sa mga Cabinet member na dumalo sa pagdinig ng Senate Blue Ribbon Committee.

Gayunman, aminado si Senate Minority Leader Franklin Drilon na magiging mas mahirap ang kanilang imbestigasyon dahil sa memo ng Pangulo.

Lantaran anyang paglabag sa konstitusyon ang inilabas na kautusan kung saan tanging sa pagdinig ng kumite hinggil sa pharmally pinagbabawalan dumalo ang mga miyembro ng gabinete.

Idinagdag pa ni Drilon na kung gugustuhin ng liderato ng Senado ay maaaring kwestyunin sa Supreme Court ang inilabas na memo tulad ng kanyang ginawa noong siya ang Senate President kung saan kinuwestyun niya sa SC ang validity ng EO 464 ni dating Pangulong Gloria Arroyo.

Samantala, inihayag naman ni Senator Panfilo Lacson na malinaw na ang intensyon ng pinalabas na memo ay iparalisa ang pagdinig ng kumite sa nakikitang iregularidad sa transaksyon ng gobyerno at Pharmally.—sa panulat ni Drew Nacino ulat mula kay Cely Ortega-Bueno

May pangamba umano sa kanyang buhay ang warehouse staff ng Pharmally Pharmaceuticals na tumestigo sa Senado at umaming pinalitan nila ang expiration date ng medical supplies na binili sa kanila ng gobyerno.

Ito, ayon kay Senator Risa Hontiveros, ang dahilan kaya’t takot na humarap sa pagdinig ang naturang witness matapos umanong makatanggap ng mga banta.

Muli anyang nakipag-ugnayan sa kanyang tanggapan ang naturang testigo at tinukoy nito ang dalawang lalaki na naka-motorsiklo ang nagpunta sa kanilang lugar.

Nag-aalok pa umano ang dalawang lalaki ng P2,000 sa sinomang makapagbibigay ng impormasyon sa kinaroroonan ng testigo.

Ang nabanggit na impormasyon ay inilagay na sa record ni hontiveros upang mapangalagaan ang seguridad ng testigo.—sa panulat ni Drew Nacino ulat mula kay Cely Ortega-Bueno

Binatikos ni Senate Blue Ribbon Committee Chairman Richard Gordon ang pagpunta ni Pangulong Rodrigo Duterte at Senador Bong Go sa tindahan ng mamahaling relo sa isang marangyang mall.

Sa kanyang opening statement sa pagdinig ng kumite, kinuwestyun ni Gordon kung hindi ba alam ng Pangulo na naghihirap ang maraming mamamayan para sila ay mamasyal o magtungo sa mamahaling mall.

Magugunitang bumisita sina Pangulong Duterte at Go sa isang department store sa Makati City matapos maghain ang Senador ng Certificate Of Candidacy noong Sabado.

Agad namang itong sinalag ni Go at nilinaw na siya ang nag-aya sa punong ehekutibo na dumaan sandali sa mall bago umuwi dahil matagal na panahon niya itong hindi nagagawa.

Sumaglit lang naman anya sila sa naturang mall dahil nais ni Pangulong Duterte na makapag-ikot at makapaglakad dahil ilang buwan na itong hindi nakalalabas at nakatutok sa trabaho.

Iginiit ni Senador Go na hindi dapat lagyan ng malisya ang pagpunta nila sa mall ng pangulo lalo’t hindi rin naman sila bumili ng mamahaling relo sa halip ay biskuwit lamang ang kanilang nabili.—sa panulat ni Drew Nacino mula sa ulat ni Cely Ortega-Bueno

Hinimok ng Commission on Elections ang mga nagpaplanong maghain ng Certificates Of Candidacy at nomination and acceptance sa May 2022 polls na iwasang hintayin ang deadline.

Ito, ayon kay COMELEC Commissioner Antonio Kho, ay upang maiwasan ang pagdagsa ng tao at maging superspreader event ang deadline ng filing ng COC sa Biyernes.

Dapat anyang maghain na ng kandidatura nang mas maaga ang mga nais tumakbo sa halalan ngayong araw o bukas.

Pinayuhan ni Kho ang mga aspirant na habang may oras pa at upang maiwasan ang aberya, tulad ng kakulangan sa requirements o maling COC at supporting documents, ay dapat na itong ayusin bago mag-file. —sa panulat ni Drew Nacino

May mahalaga umanong i-aanunsyo si Vice President Leni Robredo, bukas, bisperas ng huling araw ng paghahain ng Certificate Of Candidacy para sa 2022 national at local elections.

Ito ang inihayag ng tagapagsalita ng Bise Presidente na si Barry Gutierrez.

Ayon kay Gutierrez, alas onse ng umaga may i-a-anunsyong mahalaga si Robredo.

Magugunitang inendorso noong isang linggo ng 1sambayan si Robredo bilang Presidential Candidate sa 2022 polls.

Nakipagkita at nakipag-usap na rin ang Bise Presidente kina Manila Mayor Isko Moreno at Senator Manny Pacquiao, na kapwa tatakbo sa pagka-Pangulo.—sa panulat ni Drew Nacino

Bumaba na sa 9,055 ang naitalang bagong kaso ng COVID-19 sa bansa, kahapon.

Sa datos ng DOH, umabot na sa 2,613,70 ang total COVID-19 cases habang nasa 103,077 ang aktibong kaso.

Wala namang naitalang namatay kahapon kaya’t nananatili sa 38,828 ang death toll.

Nilinaw ng DOH na walang naitalang namatay dahil sa technical issues pa rin sa COVIDKaya.

Samantala, nasa 12,134 ang gumaling dahilan upang lumobo sa kabuuang 2,471,165 ang total recoveries.—sa panulat ni Drew Nacino

Inanunsyo ng Department of Foreign Affairs o DFA na magpapatuloy ang operasyon ng anim nilang temporary offsite passport services bunsod ng pagdami ng mga nagpapa-appoint para makakuha ng slots sa pagproseso ng passport.

Ang Temporary Offsite Passport Services na matatagpuan sa SM Mall of Asia, SM North Edsa, SM Aura, Robinsons Place Las Pinas, Robinsons Place Magnolia at Ayala Glorietta 3 ay magpapatuloy hanggang sa katapusan ng Disyembre.

Una rito, nagbukas rin ng temporary offsite passport services ang DFA sa SM Olongapo downtown sa Olongapo City at Robinsons Galleria South sa San Pedro City, Laguna.

Plano pa ng DFA na magbukas ng tops sites sa iba pang mga rehiyon.—sa panulat ni Hyacinth Ludivico