HEADLINES

Arestado sa entrapment operation ng  National Bureau of Investigation sa Pasay City ang tatlong indibidwal dahil sa hindi otorisadong pagbebenta ng gamot para sa COVID-19 patients.

Kinilala ang mga inaresto na sina Karen Amero, Ronaldo Ceriola at Erickson Soriano.

Ayon kay NBI Officer-In-Charge Director Eric Distor, ibinebenta ang mga gamot sa online platforms gaya ng Facebook, Shopee at Lazada.

Nagsagawa ng test-buy ang mga FDA personnel at nasabat sa operasyon ang iba’t ibang gamot kabilang na ang Ivirem-Remdesivir.

Kinasuhan na ang mga suspek ng paglabag sa Food and Drug Administration Act of 2009 at RA 10918 o Philippine Pharmacy Act—sa panulat ni Hyacinth Ludivico

Nagdeklara na rin ng kandidatura sa 2022 Presidential Elections si dating Senador Bonbong Marcos.

Ito ang inanunsyo ni Marcos matapos ang kanyang panunumpa bilang Chairman at miyembro ng Partido Federal ng Pilipinas o PFP kahapon.

Ayon kay Marcos, tinanggap niya ang endorsement ng PFP at multi-sectoral groups na maging standard-bearer sa 2022 elections makaraang makumpleto ang consultations sa kanilang grassroots leaders.

Sa kanyang talumpati, nanindigan ang dating Senador sa kahandaang harapin ang mga pagsubok ng bansa nang may pagkakaisa upang makabangon sa matinding pagkakalugmok sa pandemya at economic crisis.

 I will bring that form of unifying leadership back to our country.Hangad kong ibalik ang mapagkaisang paglilingkod na magbubuklod sa ating bansa, tayo magkaisa at sama-sama tayong babangon mula sa hagupit ng pandemya, babangon mula sa paglulugmok ng ating ekonomiya. Join me in this noblest of causes and we will succeed sama-sama tayong babangon muli,”pahayag ni dating Senador Bongbong Marcos—sa panulat ni Drew Nacino

 

Partido Federal ng Pilipinas (PFP) President and South Cotabato Governor Reynaldo S. Tamayo (left) swears in former Sen. Ferdinand ‘Bongbong’ Marcos, Jr. (2nd from left)

Hirap ngayon ang Municipal Health Officers ng Dinagat island sa pagbabakuna kontra COVID-19 sa mga residente nito.

Wala kasing malinaw na schedule kung kailan dadating ang suplay ng bakuna sa lalawigan.

Ayon kay Provincial Health Officer Dr. Jillian Lee, kahit may dumarating na bakuna ay hindi naman consistent ang pagdating ng mga ito.

Sinabi pa ni Lee na hindi gaanong natututukan ang kalagayan ng mga probinsya kumpara sa ibang mga lugar.

Mayroon aniyang tatlong District hospitals sa lalawigan ngunit dahil kulang ito sa tao at equipment ay nagsisilbi lamang ang mga ito bilang infirmary.

Sa ngayon ay nasa 1,374 total confirmed cases sa lalawigan na May 22 active cases.—sa panulat ni Hyacinth Ludivico

Naniniwala ang OCTA Research Group na tuluyan nang bababa ang COVID-19 trend sa Metro Manila.

Ayon kay OCTA Research Fellow Prof. Ranjit Rye, bumaba ang reproduction number o bilis ng hawahan sa ncr at nasa 16% naman ang positivity rate mula sa dating 25%.

Target naman na maibaba pa sa 10%  ang positivity rate sa rehiyon.

Ito ay upang ilagay na sa alert level 3 ang Metro Manila at mabuksan na rin ang iba pang mga industriya.—sa panulat ni Hyacinth Ludivico

Nananatiling sapat ang suplay ng medical oxygen sa Pilipinas.

Ito’y ayon kay Defense Secretary Delfin Lorenzana, at sinabing nakatuon ang task force on medical oxygen supply hinggil dito.

Aniya, ang naturang task force ang magtitiyak na sapat ang suplay ng medical oxygen para sa mga pasyente.

Sinabi pa ni Lorenzana na wala na silang natatanggap na reklamo mula sa mga ospital dahil sapat na ang suplay nito.

Sa ngayon ay mayroong 120 licensed manufacturer ng oxygen na nagsu-supply sa mga pagamutan sa bansa.—sa panulat ni Hyacinth Ludivico

Binigyang diin ni Dr. Cynthia Cuayo-Juico, isang pediatrician, na walang dapat ipangamba sa side effects ng COVID-19 vaccines ang mga magulang.

Giit pa niya, maaari talagang magkaroon ng side effects sa mga bata ang mga bakuna gaya ng lagnat, sakit ng ulo, chills at pananakit ng tinurukang braso.

Maliban dito, may mga pag-aaral din aniya sa amerika kaugnay sa side effect na namamaga ang labas at minsan ay ang loob ng puso ng mga batang nabakunahan ngunit hindi aniya ito dapat ikabahala.

Isasagawa sa Oktubre 15 ang pilot implementation ng pediatric inoculation sa bansa kung saan sisimulan ito sa mga batang may comorbidities na may edad 15 hanggang 17.—sa panulat ni Hyacinth Ludivico

Ikinababahala ng Bacolod City Local Government ang pagtaas ng bilang ng COVID-19 related deaths sa kanilang lugar.

Batay sa ulat ng Emergency Operations Center-Task Force, aabot sa 168 ang nasawi sa COVID-19 nitong Setyembre, kung saan karamihan sa mga pasyente o 140 sa mga ito ay hindi pa nababakunahan.

Ayon kay City Administrator Em Legaspi-Ang, ang nasabing bilang ay mas doble pa sa naitalang 76 death caess noong Setyembre 2019.

Aniya, karamihan sa mga nakararanas ng severe COVID-19 ay ang mga pasyenteng hindi pa nababakunahan.

Bukid dito, nakitaan rin ng virus transmission sa mga lugar na may low vaccination rates.

Kaugnay nito, hinikayat ng lokal na pamahalaan ang mga residente na magpabakuna na kontra COVID-19.—sa panulat ni Hyacinth Ludivico

Bumaba ng 52% ang hospital bed occupancy rate sa NCR sa nakalipas na dalawang linggo, ayon sa OCTA.

Gayunman, sinabi ni OCTA Research Fellow Dr. Guido David na nananatiling mataas ang utilization rate ng intensive care units sa Metro Manila dahil sa matagal na paggaling ng COVID-19 patients.

Sa kabila nito, nakita ng OCTA na bumubuti ang COVID-19 situation sa NCR.

Ito ay dahil bumaba sa 2,942 ang seven-day average ng mga bagong kaso sa NCR mula Setyembre 28 hanggang Oktubre 4.

Nasa negative 27% naman ang one-week growth rate sa Metro Manila habang ang reproduction number ay bumaba na sa 0.76.csa panulat ni Hyacinth Ludivico

Isasailalim sa lockdown ang Barangay Caburan Big at Caburan small sa Davao Occidental.

Ito ay dahil sa nararanasang pagtaas ng COVID-19 cases sa munisipalidad kung saan nakapagtala ito ng 78 active cases mula sa kabuuang 392 na mga kaso.

Sa inilabas na Executive Order no.21-020 ni Acting Mayor James John Joyce, magsisimula sa Oktubre 9 ang lockdown sa naturang mga lugar.

Kaugnay nito, ang mga residente ay hindi papayagang makalabas ng bahay maliban na lang kung may medical emergency at Authorized Persons Outside Of Residence o APOR.

Nagbigay naman ang lokal na pamahalaan ng food at medicine passes sa bawat pamilya.—sa panulat ni Hyacinth Ludivico

Nasabat ng Bureau Of Customs-Manila International Container Port ang mga imported cosmetic products at supplements sa Valenzuela City.

Nabatid na hindi otorisado ng Food and Drug Administration o FDA ang mga nasabing produkto.

Nitong Oktubre 1 nang salakayin ng mga otoridad ang bodega sa Santiago St., Valenzuela City kung saan nadiskubre ang mga imported cosmetic products, vitamins, at supplements.

Patuloy namang inaalam ng ahensiya ang market value ng mga goods na nakumpiska.—sa panulat ni Hyacinth Ludivico