Naghahanda na ang Department of Environment and Natural Resources para sa posibleng kakulangan sa tubig dulot ng nakaambang Super El Niño sa susunod na taon.
Ayon kay DENR Secretary Juan Miguel Cuna, posibleng maranasan ang seryosong problema sa suplay ng tubig pagsapit ng unang bahagi ng taong 2027.
Dahil dito, nakikipagpulong na ang iba’t ibang ahensya ng gobyerno upang maghanap ng alternatibong mapagkukunan ng tubig, kabilang sa pinag-aaralan ng National Water Resources Board ang pagbabawas ng water allocation sa ilang sektor kung kinakailangan upang mapanatili ang sapat na suplay.
Hinikayat din ng DENR ang mga lokal na pamahalaan, negosyo, at mga kabahayan na magpatupad ng rainwater harvesting systems upang mapakinabangan ang tubig-ulan habang tag-ulan pa.
Pinag-aaralan din ng pamahalaan ang cloud seeding at desalination projects bilang dagdag na hakbang laban sa kakulangan ng tubig.
Una nang nagbabala ang PAGASA na maaaring mabuo ang Super El Niño sa huling bahagi ng 2026. Kapag nangyari ito, inaasahang magdudulot ito ng matinding tagtuyot sa ilang bansa kabilang ang Pilipinas, pati na rin ng mas malalakas na bagyo at iba pang matitinding epekto ng panahon.—sa panulat ni Reabelle Medina
#DWIZ #DWIZNews #Aliw23
