Krystine Belen

Tiniyak ni Pangulong Ferdinand Marcos Jr. na hindi makatatanggap ng special treatment si Kingdom of Jesus Christ (KOJC) founder Apollo Quiboloy.

Ginawa ng pangulo ang pahayag kasunod ng pagsuko ni Quiboloy sa mga awtoridad kamakailan.

Ayon kay Pangulong Marcos, bagamat prominente ang naturang religious leader, itatrato pa rin ito katulad ng mga ibang inaresto.

Pagdidiin ng pangulo, mananagot ang lahat ng sangkot sa pagtatago kay Quiboloy.

Matatandaang nasa 2,000 pulis ang ipinakalat sa KOJC compound sa Davao City noong August 24 matapos maghain ng warrant of arrest ang Pasig City court at Davao City Regional Trial Court laban sa pastor dahil sa mga kasong qualified human trafficking at child and sexual abuse.

Nahaharap din si Quiboloy sa iba’t ibang kaso sa Amerika, kabilang na ang sex trafficking of children, fraud and coercion, at bulk cash smuggling.

Naniniwala si Department of Finance (DOF) Secretary Ralph Recto na patunay ang mabagal na inflation noong Agosto na epektibo ang mga ipinatutupad na interbensyon ng administrasyon ni Pangulong Ferdinand Marcos Jr.

Ginawa ni Sec. Recto ang pahayag kasunod ng ulat ng Philippine Statistics Authority (PSA) na bumaba sa 3.3% ang inflation rate sa bansa noong Agosto.

Tiniyak naman ng kalihim sa publiko na kayang panatilihin ng administrasyong Marcos ang pagbagal sa galaw ng presyo ng mga bilihin.

Kaugnay nito, ibinahagi ni Pangulong Marcos na palalawakin pa ang Kadiwa ng Pangulo program sa Visayas at Mindanao, kasabay sa rollout ng African Swine Fever (ASF) vaccine, upang masigurong abot-kaya ang mga pagkain.

Ayon sa pangulo, kabilang ang mga ito sa mga konkretong hakbang na ginagawa ng pamahalaan upang matiyak na makakamtan ng bawat Pilipino ang mas kumportableng buhay.

Labis na kalungkutan ang naramdaman ng isang nursing student mula sa Naga City, Camarines Sur matapos pumanaw ang isang lalaki na sinubukan niyang sagipin habang nananalasa ang bagyong Enteng.

Sa isang Facebook post, ibinahagi ni Zain Cortez, 18-anyos, ang ulat tungkol kay Juancho, 57-anyos, na binawian ng buhay matapos makuryente sa gitna ng baha.

Pauwi na si Cortez mula sa kanyang duty nang madatnan niyang nagkakagulo ang mga tao sa gitna ng baha. Dito niya natagpuan ang isang walang malay na lalaki na nakahiga sa isang styrofoam.

Dahil sa awa, sinubukan niyang isalba ang buhay ng lalaki sa pamamagitan ng pagsasagawa ng cardiopulmonary resuscitation (CPR). Nais man nilang humingi ng tulong, hindi naman makadaan ang ambulansya o kahit anong sasakyan na mabilis na magdadala sa lalaki sa ospital dahil sa baha.

Habang ginagawa ang CPR, hindi mapigilan ng nursing student na manginig at mapadasal dahil sa takot na baka huli na ang lahat.

Ayon kay Cortez, bagamat sinasabihan na siya ng ibang tao na tumigil na, hindi niya kayang sumuko, lalo na’t nakita niya ang pamilya ng lalaki na nais makaligtas ang kanilang ama.

Ngunit sa kalaunan, napagtanto niyang wala na talaga siyang magagawa sa kabila ng kanyang pagsisikap, dahil tuluyan nang nasawi ang lalaki.

Bilang first aider at nursing student, masakit para kay Cortez ang pangyayari. Paalala niya, hindi lamang kasanayan ang pag-alam sa basic life support, kundi isang responsibilidad dahil maaaring mangyari ang krisis anumang oras at kahit saan, nang walang abiso.

Tiniyak ni Pangulong Ferdinand Marcos Jr. na hindi lamang sisibakin sa pwesto, kundi kakasuhan din, ang mga tumulong kay dismissed Bamban, Tarlac Mayor Alice Guo na makalabas ng Pilipinas.

Sa isang panayam, binigyang-diin ni Pangulong Marcos na malinaw na paglabag sa batas at interes ng sistemang panghukuman ng bansa ang ginawa ng mga tumulong kay Guo o kilala rin bilang Guo Hua Ping.

Aniya, dapat magsilbing babala sa mga nagtatangkang umiwas sa hustisya ang pagkaaresto ni Guo na nadakip sa Jakarta, Indonesia.

Nauna nang inihayag ni Pangulong Marcos na walang puwang sa pamahalaan ang sinumang inuuna ang pansariling interes, sa halip na ang paglilingkod sa publiko nang may dangal, integridad, at katarungan.