Krystine Belen

Sa edad na 19, nagsimulang magtipid ang Japanese na si Saki Tamogami.

Ang kanyang goal? Makabili ng tatlong bahay! Sa edad na 34, natupad ang layunin niyang ito at nakapagpagawa pa siya ng isang shelter para sa mga pusa!

Ayon kay Saki, nakararamdam siya ng kasiyahan tuwing nakikitang lumalaki ang kanyang ipon. Kaya nang nagsimula siyang magtrabaho bilang assistant ng isang property agent, tiniyak niyang walang sentimong masasayang mula sa kanyang sahod.

Upang makatipid, nagluluto lamang sa bahay si Saki, at kung kakain man siya sa labas, dapat mayroon itong discount.

Naglalaan lamang siya ng 200 yen o halos P78 kada araw para sa kanyang pagkain. Ang madalas niyang kinakain ay tinapay, noodles, at labanos.

Tumigil na rin si Saki sa pagbili ng mga bagong damit simula noong 19-anyos siya. Kuntento na umano siya sa mga pinaglumaan ng kanyang kamag-anak. Maging ang kanyang mga kagamitan sa bahay ay pinaglumaan at itinapon na rin ng ibang tao.

Naging mabunga naman ang pagtitipid niya dahil sa edad na 27, nabili niya ang kanyang pinakaunang bahay sa halagang P3.9 million. Pinarentahan niya ito, gayundin ang kanyang ikalawang bahay.

Pagsapit ng 2019, nakabili na siya ng ikatlong bahay kung saan niya itinayo ang isang cat café na nagsisilbi ring shelter ng mga pusa.

Pagbabahagi ni Saki, nais niyang mag-rescue ng mga pusa dahil noong bata siya, tinulungan siya nito tuwing nalulungkot.

Habang marami ang humahanga sa dedikasyon ni Saki, may ilan ding nag-aalala sa mga panganib na maidudulot ng kanyang kakaibang paraan ng pamumuhay. Gayunman, hindi maikakailang nagbibigay siya ng inspirasyon na posibleng maabot ang ating mga pangarap, basta’t sasamahan ito ng disiplina at pagsisikap.

Nitong Hulyo, idinaos ang pagtatapos ng mga mag-aaral ng University of the Philippines (UP).

Katulad ng ibang nagsitapos, proud na ipinost ng umano’y UP graduate na si Princess Fernandez Neo ang mga larawan na kuha noong graduation niya kasama ang kanyang pamilya.

Ngunit napansin ng mga mapagmatyag na netizen na tila may kakaiba sa mga post ng babae.

Ayon sa caption ng kanyang profile picture, nagtapos si Neo bilang magna cum laude sa kursong Mass Communication Major in Journalism.

Pinabulaanan ito ng mismong UP College of Mass Communication na nagsabing wala silang naturang programa. Kinumpirma man nilang kinuha ang mga larawan sa UP Film Center, binigyang-diin nilang hindi pinapasok si Neo at ang mga kasama nito dahil hindi siya kabilang sa listahan ng graduates.

Dagdag pa rito, ibinahagi rin ng babae ang larawan ng kanyang diploma, sablay, at medalya, kabilang ang Gawad Oblation award na ibinibigay lamang sa mga alumni ng UP at mga kaibigan nito na nagpakita ng pambihirang serbisyo. Sa madaling salita, hindi ito iginagawad sa bagong graduates.

Dahil sa pamemekeng ito, agad siyang nakatanggap ng pambabatikos mula sa mga netizen.

Sa isang Threads post, humingi naman ng tawad si Neo sa paggamit ng pangalan ng UP.

Bagamat hindi tama ang kanyang ginawa at nararapat lamang siyang punahin, hindi maikakaila ang takot na naramdaman niya na madismaya ang kanyang pamilya. Ang takot at pressure na ito ang nagtulak sa kanyang gumawa ng mali. Sana’y magbigay ng aral ang kwentong ito hindi lamang sa mga anak, kundi sa mga magulang na nagbibigay sa kanila ng mataas na expectations.

Naalarma ang mga tao matapos tila himatayin ang isang pulis habang ginaganap ang isang parada sa Cuyo, Palawan.

Subalit ang lalaki, agad ring bumangon upang mag-propose ng kasal sa kanyang kasintahan!

Naging magkaklase sa kolehiyo ang magkasintahan na sina Joel at Rosemary. Matagal na silang nag-iibigan at naghihintay na lamang ng tamang panahon upang mag-isang dibdib.

Walang kaalam-alam si Rosemary na sa mismong pagdiriwang ng Purongitan Festival, aalukin na siya ng kasal ng kanyang pinakamamahal.

Hindi naman nauwi sa wala ang effort ni Joel dahil nakuha rin niya ang matamis na “oo” ng kanyang future wife.

Napasayaw na lamang sa tuwa ang pulis, habang masaya ring naki-celebrate ang mga dumalo sa pista na naging mas makulay at masigla dahil sa pagmamahalan ng dalawa.

Paano mo sine-celebrate ang birthday mo?

Ang isang lolang ito mula sa Suffolk, England, ipinagdiwang ang kanyang 102nd birthday sa kakaibang paraan—sa pamamagitan ng skydiving!

Bilang isang dating World War II cadet sa Women’s Royal Naval Service, hindi na bago kay Manette Baillie ang panganib.

Sa katunayan, noong 100th birthday niya, sumali siya sa isang race sa British Grand Prix, sakay ng isang Ferrari na may bilis na 130 miles per hour!

Napagdesisyunan ni Baillie na mag-skydiving matapos malaman na ginawa ito ng 85-year-old na tatay ng kanyang kaibigan. Naisip niya, kung kinaya iyon ng lalaki, kakayanin rin niya ito.

Kaya sa kanyang 102nd birthday, nagtipon ang kanyang pamilya at mga kaibigan sa Beccles Airfield upang panoorin ang lola, kasama ang ilang skydivers, na tumalon mula sa eroplano sa taas na 7,000 feet.

Ginawa ring pagkakataon ni Baillie ang kanyang kakaibang birthday celebration upang makakalap ng pondo para sa ilang charities. Naging matagumpay naman ito dahil nakalikom na siya ng mahigit $13,000 o P730,000, nasungkit niya pa ang British record na oldest skydiver in history!

Nang tanungin kung ano ang sikreto sa pagkakaroon ng mahabang buhay, ang sagot lamang ni Baillie: laughter at adventure.