Sinabi ni economist Prof. Astro del Castillo na mahalaga ang pagpasok ng mas maraming foreign investments dahil nakatutulong ang mga ito sa pagpapalago ng ekonomiya, paglikha ng trabaho, at pagpapataas ng kita ng mga manggagawa.
Gayunman, ayon kay Del Castillo, sa kabila ng bilyun-bilyong dolyar na investment pledges na naitala ng Marcos administrasyon mula nang maupo ito sa puwesto, tinatayang 5% lamang ang aktuwal na naisasakatuparan. Aniya, mula sa humigit-kumulang $70 bilyong investment pledges, nasa $4 bilyon lamang ang umano’y naging aktuwal na pamumuhunan.
Iniuugnay ni Del Castillo ang mababang realization ng mga investment pledge sa mataas na political risk, mga hamon sa ease of doing business, at mataas na cost of doing business sa bansa kumpara sa mga karatig-bansa.
Dagdag pa niya, kabilang din sa mga balakid sa pagpasok ng mas maraming dayuhang mamumuhunan ang mataas na halaga ng kuryente at enerhiya, na aniya’y nagpapataas sa gastos ng mga negosyo at nagpapahirap sa Pilipinas na makahikayat ng karagdagang foreign investors.
