Nakatakdang humarap si Pangulong Ferdinand Marcos Jr. sa publiko para sa kanyang ikalimang SONA o State of the Nation Address mamayang alas-kuwatro ng hapon sa Batasang Pambansa sa Quezon City.
Bagaman tumangging magbigay ng impormasyon tungkol sa laman ng talumpati, nagpahiwatig ang Malacañang na magkakaroon pa ng mga nakagugulat na anunsiyo.
Batay sa isinagawang survey ng Pulse Asia, umaasa ang mga Pilipino na sesentro ang SONA sa paglaban sa korapsyon, partikular na ang pagpapanagot sa mga sangkot sa flood control scam.
Inamin ni Pangulong Marcos na maaari pang baguhin ang kanyang talumpati hanggang isang oras bago magsimula ang programa upang matiyak na maayos ito.
Samantala, ayon sa Malacañang, mas pinili ni Pangulong Marcos ang mas simpleng pagdaraos ng SONA ngayong taon upang mabawasan ang gastusin ng pamahalaan, lalo’t may nagaganap na krisis dulot ng tensyon sa Gitnang Silangan. | Sa panulat ni Reianne Antiquina
