Krystine Belen

Muling ipinagtibay ni Pangulong Ferdinand Marcos Jr. ang pangako ng kanyang administrasyon na maging transparent at transformative sa ginanap na Ceremonial Endorsement ng Public Financial Management (PFM) Reforms Roadmap 2024-2028.

Sa kanyang talumpati, binigyang-diin ni Pangulong Marcos na magtatakda ng malinaw na mandato ang naturang roadmap upang masigurong mapupunta sa mga mahahalagang proyekto at programa ang perang ipinagkatiwala ng taumbayan sa pamahalaan.

“With this roadmap, we give a clear mandate of ensuring that the money entrusted to us by the people serves a purpose that truly matters, that will make a difference,” ani ng pangulo.

Nilikha ang PFM Reforms Roadmap 2024-2028 sa bisa ng Executive Order No. 29 na inilabas ni Pangulong Marcos noong June 2023.

Layon ng repormang ito na baguhin ang paraan ng pamamahala ng pondo ng publiko at resources ng bansa upang matiyak na mayroong accountability, efficiency, at transparency ang mga tanggapan ng gobyerno sa paggamit nito.

“With the strong support of our partners, especially with the ADB [Asian Development Bank], I am confident that the PFM Reforms Roadmap—anchored on the Philippine Development Plan 2023-2028—will lead the nation to a higher growth trajectory, and ultimately, to reducing poverty and achieving genuine prosperity,” dagdag pa ng pangulo.

Pinangunahan ni Pangulong Ferdinand Marcos Jr. ang kampanya laban sa paglaganap ng Online Sexual Abuse and Exploitation of Children (OSAEC) sa bansa.

Sa kanyang talumpati sa ginanap na OSAEC Summit 2024, binigyang-diin ni Pangulong Marcos na halos kalahating milyong bata sa Pilipinas ang nabiktima na ng online sexual abuse at exploitation.

Ayon sa pangulo, nakakahiya dahil kulang pa ang ginagawa ng pamahalaan upang labanan ang ganitong uri ng krimen at patuloy pa ring namamayagpag ang mga sangkot dito.

Upang tuluyan itong mapuksa, binuo ng pangulo ang Presidential Office for Child Protection (POCP) na magsisilbing sentro ng lahat ng estratehiya at resources upang matiyak na protektado at suportado ang bawat bata sa bansa.

Dagdag pa rito, inatasan din ni Pangulong Marcos ang mga kaukulang ahensya na palakasin pa ang pagpapanagot sa mga taong nasa likod ng pang-aabuso sa mga bata.

Itinuturing ni Pangulong Ferdinand Marcos Jr. na hamon ang pagtaas ng satisfaction rating ng kanyang administrasyon.

Ginawa ni Pangulong Marcos ang pahayag kasunod ng inilibas na ulat ng Social Weather Stations (SWS) kung saan lumabas na 62% ng mga Pilipino ang satisfied sa performance ng kasalukuyang administrasyon para sa ikalawang quarter ng taon.

Ayon sa pangulo, bagama’t natutuwa siya sa positibong pananaw ng mga Pilipino kaugnay sa pagsisikap ng kanyang administrasyon, tinitignan niya ito bilang hamon na mas pagbutihin ang trabaho.

Pagtitiyak niya, mananatiling nakatutok ang pamahalaan sa paglilingkod at pagtupad sa kanilang mga pangako sa publiko.

Pagtutuunan din aniya ng pansin ng administrasyong Marcos ang paghahatid ng tunay at epektibong serbisyo upang mapabuti ang buhay ng mga Pilipino.