Krystine Belen

Katulad ng ibang babae, ang makasal ang isa sa mga pangarap ni Jenny Calimlim.

Natupad rin ito noong September 6 nang mag-isang dibdib sila ng kanyang long-time boyfriend na si Jayson De Guzman; ngunit sa halip na sa simbahan, sa ospital ito ginanap. At ang bride, walang malay.

Na-comatose kasi ito at naka-confine sa ospital dahil sa sakit na brain tumor.

Pinamunuan ng pari ang kasal, habang nakahiga sa hospital bed si Jenny at nakatayo ang groom sa kanyang tabi.

Ilang oras makalipas ang seremonya, tuluyan nang binawian ng buhay ang babae.

Si Jenny ay 26-anyos lamang.

Naiwan niya ang kanyang dalawang anak na may edad limang taon at anim na buwan.

Malungkot man ang kanyang pamilya dahil sa kanyang pagpanaw, nakaramdam pa rin sila ng kasiyahan dahil kahit papaano, natupad rin ang pangarap ni Jenny na maikasal sa kanyang pinakamamahal.

Biglang nagising ang diwa ng isang inaantok na lalaki mula sa Jiangsu Province sa China.

Nagsisipilyo kasi ito nang aksidenteng dumulas sa kanyang lalamunan ang hawak na 15 cm na toothbrush. Ang dahilan niya, kulang siya sa tulog kaya hindi niya napansin na nalunok niya na pala ito!

Gamit ang kanyang mga daliri, sinubukan ng lalaki na sungkitin ang toothbrush mula sa kanyang lalamunan, ngunit sa kasamaang-palad, naitulak niya pa ito paloob!

Mabilis siyang nagtungo sa Taizhou Fourth People’s Hospital kung saan siya isinailalim sa maselang gastroscopic operation.

Aminado si Dr. Wang Jianrong, head ng Department of Gastroenterology ng nasabing ospital, na hindi naging madali ang isinagawang operasyon na umabot ng ilang oras dahil madulas ang sipilyo.

Gayunman, pinuri ng doktor ang lalaki dahil agad itong nagtungo sa ospital, sa halip na sumubok ng iba pang home remedy.

Matagumpay namang nakuha ang toothbrush mula sa sikmura ng lalaki na sa ngayon ay nasa mabuti nang kalagayan.

Hindi na natapos ng isang bride mula sa Uttar Pradesh, India ang kanyang sariling kasal matapos mawalan ng malay.

Sinubukang i-revive ng doktor si Surabhi, subalit huli na ang lahat dahil tuluyan na itong nawalan ng buhay dahil sa heart attack.

Ngunit sa halip na matigil ang seremonya, itinuloy pa rin nila ito—at sa pagkakataong ito, ang nakababatang kapatid ng biktima na ang nagpakasal sa naiwang groom!

Habang nakahimlay sa kabilang silid ang mga labi ng bride, idinaraos naman ang kasal ng kanyang kapatid at groom na si Manjesh.

Ayon sa tiyuhin ng magkapatid na si Ajab Singh, magkahalong emosyon ang naramdaman ng kanilang pamilya. Malungkot sila dahil sa biglaang pagpanaw ni Surabhi, ngunit masaya sila dahil natuloy pa rin ang kasal.

Laganap pa rin sa India ang arranged marriage o ang pagkakasundo ng dalawang pamilya na ikasal ang kanilang mga anak. Ito ang dahilan kung bakit hindi na nakatanggi ang nakababatang kapatid na humalili sa kanyang nasawing ate dahil ito ang obligasyon niya sa kanyang pamilya.

Isang kakaibang insidente ang naranasan ng isang babae mula sa Detroit, Michigan.

Nakatulog kasi si Yacedrah Williams habang suot ang kanyang contact lenses. Nang magising ng madaling araw, naramdaman niyang dry ang kanyang mga mata.

Bago tanggalin ang kanyang contacts, kinuha niya muna ang inakala niyang eye drops. Ngunit nang ipatak niya ito sa kanyang mata, nakaramdam siya ng init at nagdikit ang kanyang eyelids. Dito niya napagtanto na sa halip na eye drops, nail glue pala ang nailagay niya sa kanyang mata!

Dahil sa panic, dali-daling hinugasan ni Williams ng malamig na tubig ang kanyang mata at pilit niya itong binuksan, subalit matindi ang pagkakadikit ng kanyang mga talukap.

Humingi na ng saklolo ang kanyang asawa at agad siyang naisugod sa ospital.

Ayon sa doktor, muntik nang mabulag ang babae, ngunit dahil sa suot niyang contact lens na nagsilbing panangga sa glue, naisalba ang paningin niya.

Maayos namang natanggal ang contact lens at nabuksan din sa wakas ang mata ni Williams. At sa halip na mabulag, nawalan lamang siya ng ilang pilikmata.

Kaya mo bang kainin ang face mask na ginagamit mo bilang proteksyon laban sa virus?

Ito lang naman ang imbensiyon ng tatlong university students mula sa Okinawa at Fukuoka, Japan. Dahil gusto nilang makaamoy ng tinapay sa lahat ng oras, lumikha sila ng face mask na gawa sa melon bread!

Ito ang Mask Pan, ang tinaguriang world’s first edible face mask.

Ayon sa The Labo, ang experimental division ng Goku no Kimochi, ang effectiveness ng Mask Pan ay katumbas o mas mahusay pa sa mga mask na mabibili sa merkado.

Tinest din ng Unitika Garmentec Research Institute ang bisa nito at napatunayang kaya nitong i-block ang droplets na may virus dahil sa umano’y high density fibers na taglay ng melon bread.

Ngunit ayon sa mga eksperto, mababawasan ang performance ng Mask Pan kung kakainin ito mula sa loob. Nagbabala rin silang huwag kainin ang outer part ng mask, lalo na kung ginamit ito sa labas at mataong lugar.

Mabibili ang limang piraso ng Mask Pan sa halagang 1,800 yen o higit P700, ngunit mabilis itong na-sold out matapos ilabas sa publiko.

Hindi na nagdalawang-isip ang isang bride mula sa Uttar Pradesh, India na mag-walk out sa kanyang sariling kasal matapos hindi makasagot sa simpleng Math problem ang kanyang groom.

Bago pa man ang kasal ay nagdududa na ang babae sa educational background ng kanyang fiancé.

Ayon sa pinsan ng bride, hindi inilahad ng pamilya ng lalaki kung saan ito nag-aral; kaya pakiramdam ng pamilya ng babae, dinaya sila ng mga ito sa napagkasunduang arranged marriage.

Habang idinaraos ang kanilang kasal noong May 1, sinubukan ng bride na i-test ang kaalaman ng kanyang groom sa pamamagitan ng pagpapa-recite sa kanya ng multiplication table of two, subalit hindi ito nakasagot.

Dahil dito, umalis ang babae at sinabing hindi niya kayang pakasalan ang sinumang hindi marunong ng basic Math.

Nagkasundo naman ang pamilya ng dalawa na ibalik ang mga ibinigay na regalo at alahas sa isa’t isa dahil sa nakanselang kasal.

Hindi ito ang unang beses na may nag-walk out na bride sa India kung saan laganap ang arranged marriage.

Noong 2015, mayroon ding bride na ipinatigil ang kanyang kasal matapos sumagot ang kanyang groom ng 17 sa tanong na 15 plus 6.