Judith Estrada-Larino

Pinangangambahang ma-bankrupt ang Overseas Workers Welfare Administration (OWWA) sa susunod na taon kapag nagtuluy-tuloy pa ang coronavirus disease 2019 (COVID-19) pandemic.

Ipinabatid ito ni OWWA Administrator Hans Leo Cacdac sa kanyang pagharap sa hearing ng senate committee on labor dahil posible aniyang wala nang P1-bilyon ang matira sa trust fund ng ahensya sa pagtatapos ng 2021.

Sinabi pa ni Cacdac na mahigit sa P19-bilyon ang pera ng OWWA sa pagsisimula ng taon subalit napakalaki na ng nabawas dahil sa assistance na ibinibigay sa mga Overseas Filipino Workers (OFWs) na nawalan ng trabaho o kaya ay na-istranded sa ibang bansa.

Bumagsak na rin anya ng mahigit sa 46% ang koleksyon ng ahensya kaya’t hindi na ito halos nadadagdagan.

Ayon kay Cacdac, simula lamang noong ika-15 ng Marso ay mahigit na sa P1-bilyon ang nagamit ng ahensya para sa pagkain, accommodation, shelter, at transportation assistance sa mga OFWs.

Inihayag ni Cacdac na malaking bahagi nito ang nagamit sa mga hotels na nagsilbing quarantine area para sa mga umuwing OFWs at sa mga susunod na araw ay kailangan na rin nilang maglabas ng pondo para sa cash subsidy at scholarship ng mga anak ng mga OFWs na nawalan ng trabaho.

Papayagan nang makabiyahe sa mga lansangan sa Metro Manila simula sa susunod na lingo ang mga UV Express units at traditional jeepneys.

Ipinabatid ito ni Land Transportation Franchising and Regulatory Board (LTFRB) Chairman Martin Delgra III sa isinagawang virtual meeting ng house committee on Metro Manila development  matapos atasan ng mga mambabatas ang ahensya na magbigay ng eksaktong petsa kung kailangan uubra nang lumarga ang  mga UV Express at traditional jeepneys.

Ayon kay Delgra, una munang makakapasada ang mga UV Express at unti-unti ay makakabiyahe naman na ang traditional jeepneys dahil mayroon silang sinusunod na hierarchy sa ‘go signal’ sa public transportation para muling makapag-operate matapos suspindihin dahil sa deklarasyon ng enhanced community quarantine (ECQ).

Ang hierarchy aniyang tinutukoy niya ay preference sa mayroong mas malaking kapasidad na makapagdala ng pasahero mula point A patungong point B bukod pa sa kapasidad din ng operators na mapangasiwaan ang kanilang units.

Nanguna ang Pasig City sa mga lungsod sa Metro Manila na may pinakamataas na coronavirus disease 2019 (COVID-19) performance.

Batay ito sa survey ng RP Mission and Development Foundation Incorporated kung saan nagtala rin ng magandang performance kontra COVID-19 ay ang Quezon City, Maynila, Marikina City at Valenzuela City.

Lumalabas na 86% ng mga taga-Pasig City ay nagbigay ng magandang review sa pamamaraan ng kanilang alkalde at city government para labanan ang nasabing virus.

Nasa ikalawang job approval ratings ang Quezon City – 80%, Maynila – 78%, Marikina – 74% at Valenzuela – 72%.

Samantala, naitala naman ang lowest approval ratings ang mga lungsod ng Pasay City – 25%, Las Piñas City – 26% at Malabon City – 27%.

Dalawampu’t pito (27) pang Pilipino sa ibang bansa ang kumpirmadong nagpositibo sa coronavirus disease 2019 (COVID-19).

Dahil dito, ipinabatid ng Department of Foreign Affairs (DFA) na umakyat na sa 8,351 ang mga kumpirmadong positibo sa COVID-19 na Pilipino mula sa 56 na bansa at rehiyon.

Today, the DFA reports 27 new confirmed COVID-19 cases in Asia and the Pacific and the Middle East, 15 new recoveries, and 4 new deaths from said regions as well. No new reports were received from Europe and the Americas. Furthermore, (1/3) pic.twitter.com/QymzdM265x

— DFA Philippines (@DFAPHL) June 24, 2020

Sa nasabing bilang, 2,767 ang patuloy na nagpapagamot sa iba’t ibang ospital.

Nasa 15 naman ang gumaling kaya’t pumapalo na sa 5,072 overseas Pinoys ang nakarecover mula sa nasabing sakit.

Samantala, apat naman ang nasawi kaya’t nasa 512 na ang bilang ng mga Pinoy abroad na pumanaw dahil sa COVID-19.

Pinakamarami pa ring naitalang confirmed COVID-19 positive na overseas Pinoys sa bahagi ng Middle East/Africa na mayroong 6,114 case; sumunod ang Europa na mayroong 961 cases;  Americas na mayroong 685 na kaso at Asia Pacific Region na nakapagtala naman ng 591 kaso.

Muling tiniyak ng DFA na sa pamamagitan ng foreign service posts ay patuloy na tututukan ang kondisyon ng mga Pinoy sa ibang bansa at handang saklolohan ang mga Pilipinong apektado ng COVID-19 pandemic.

Inihahanda na ng Department of Budget and Management (DBM) ang P4.3-trilyon na national budget para sa susunod na taon.

Ipinabatid ito ni Budget Secretary Wendel Avisado na nagsabi ring target nilang maisumite sa Pangulong Rodrigo Duterte ang nasabing budget bago pa man ang State of the Nation Address (SONA) nito sa ika-26 ng Hulyo.

Gayunman, sinabi ni Avisado na kapag hindi nakahabol sa SONA, posibleng sa ikalawang linggo ng Agosto na nila maisumite ang 2021 budget para sa kaukulang pag-apruba ng pangulo at makapagsumite na rin sila nito sa kongreso.

Pagtutuunan ng pansin ng DBM na pondohan ang mga proyektong pang-imprastruktura at paggawa na kapwa pinakaapektado ng coronavirus disease 2019 (COVID-19) pandemic.