Niyanig ng magnitude 4.7 na lindol ang baybaying bahagi ng Southeastern Mindanao.
Ayon sa Philippine Institute of Volcanology and Seismology o Phivolcs, natukoy ang sentro nito sa layong 162 kilometro timog ng bayan ng Jose Abad Santos sa Davao Occidental.
Sinasabing tectonic ang pinagmulan ng lindol na may lalim na 107 kilometro.
Wala namang naitalang nasaktan at walang inaasahang aftershocks sa naturang pagyanig.
BINAWIAN ng buhay ang isang lalaki makaraang tagain umano sa ulo at leeg ng sariling ama sa bayan ng Sibunag, Guimaras.
Dead-on-the-spot ang biktimang si Edwin Galimba, 60 taong gulang, at residente ng Barangay Maabay.
Sa imbestigasyon ng Sibunag police, sinuntok umano ng biktima ang kanyang ina matapos ang mainitang pagtatalo kaya’t nagsumbong ito sa asawa na humantong sa pananaga.
Nasa kustodiya na ng awtoridad ang suspek na nahaharap sa kasong parricide.
NASAWI ang isang dating barangay captain matapos pagbabarilin sa bayan ng San Jose, Camarines Sur.
Kinilala ang biktima na si Jonathan Clidoro, dating tserman ng Barangay Catalotoan na isa ring security aide at political officer ni re-electionist San Jose Mayor Marco Chavez.
Sa inisyal na pagsisiyasat ng pulisya, pinagbabaril ng hindi pa nakikilalang salarin si Clidoro sa loob ng kanilang bahay.
Naglaan na si 2nd Dist. Rep. Lray Villafuerte ng isang milyong pisong pabuya para sa sinumang makapagtuturo at makahuhuli sa salarin.
Patuloy ang imbestigasyon sa nasabing insidente.
Ligtas na natagpuan ang isang pari na una nang naiulat na nawawala sa Cavite noong Sabado.
Hindi tinukoy ang pagkakakilanlan ng pari na nakitang nakatali ang mga kamay sa loob ng isang sasakyan sa Barangay Lumil, bayan ng Silang.
Ayon kay Silang police chief Lt. Col. Juan Peñafiel Oruga, Jr., ang biktima na nasa “state of shock” pa rin ay parish priest ng isang simbahan sa bayan ng Rosario.
Iniimbestigahan pa rin ng mga awtoridad ang naturang insidente.
DAHIL sa sunod-sunod na combat operations ng 4th Infantry Division ng Philippine Army, napilitang sumuko ang isang labingwalong taong gulang na amasona habang sampung armas naman ang narekober sa Mindanao.
Kinilala ang rebel returnee na si alyas “MJ” na itinuro rin ang imbakan ng mga armas ng New People’s Army o NPA sa Sitio Mahogany, Barangay Ibuan, Las Nieves, Agusan del Norte.
Matatandaang naglunsad ng serye ng mga operasyon ang militar at iba’t ibang lugar sa bansa kaya’t napipilitang magbalik-loob sa gobyerno ang mga rebelde.
Sa ilalim ng Enhanced Comprehensive Local Integrated Program o E-CLIP, makakatanggap ng mga benepisyo mula sa pamahalaan ang mga sumusukong miyembro ng NPA.
PATAY ang dalawang hinihinalang miyembro ng Abu Sayyaf Group o ASG habang sugatan naman ang siyam na iba pa makaraang maka-bakbakan ang mga tropa ng pamahalaan sa Basilan province.
Ayon kay Joint Task Force-Basilan commander Brig. Gen. Domingo Gobway, kabilang sa mga nasawi ang limang followers ni ASG leader Radzmil Janatul alyas Abu Khubayb habang nilalapatan naman ng lunas sa ospital ang apat na sugatan na pawang mga miyembro ng 64th Infantry Battalion.
Sinabi ni Gobway na nakatanggap sila ng text message hinggil sa presensiya ng isang armadong grupo sa Barangay Sukaten sa bayan ng Sumisip kung kaya’t pinuntahan ito ng mga sundalo na naging sanhi ng nasabing engkwentro.
Nadakip ng mga ahente ng Bureau of Immigration o BI ang isang South Korean national na sinasabing wanted sa kanilang bansa dahil sa pagkakasangkot sa investment scam.
Kinilala ni Immigration Commissioner Jaime Morente ang dayuhan na si Jun Myung Ho na nasakote sa isang residential area sa Banilad, Cebu City.
Nabatid noong February 2018 pa nasa Pilipinas si Jun matapos itong tumakas sa kanilang bansa dahil sa kasong fraud.
Pansamantalang nakadetine si Jun sa Camp Sotero Cabahug sa Cebu at nakatakda itong ilipat sa BI detention facility sa Taguig habang hinihintay ang deportation proceedings laban sa naturang dayuhan.
Pinadapa ng NU Bulldogs ang FEU Tamaraws sa score na 73-68 sa kanilang bakbakan sa UAAP Season 84 men’s basketball na ginanap sa Mall of Asia Arena sa Pasay City.
Si John Lloyd Clemente ang bumida sa panig ng Bulldogs matapos kumamada ng 18 points at nine rebounds.
Dahil dito, nakadalawang panalo na ang NU sa kasalukuyang season habang nalugmok naman ang Tamaraws sa ikatlong sunod na pagkatalo.
Hinoldap ng isang lalaki ang isang E-sabong betting station sa Rosario, Cavite matapos umanong maubos ang kanyang pera na P200,000 sa kakatalpak.
Kinilala ang suspek na si Christian Rodriguez, nakatira sa nasabing lugar.
Ayon sa pulisya, tinangay ni Rodriguez ang P380,000 na cash mula sa MJR betting station sa Barangay Bagbag 1.
Inihahanda na ang kaukulang reklamong isasampa laban sa suspek.
Halos kalahating milyong pisong halaga ng ari-arian ang naabo matapos masunog ang gusali ng isang Telecommunications Company (TELCO) sa Mandaluyong City.
Ayon sa Bureau of Fire Protection (BFP), unang sumiklab ang apoy sa ika-anim na palapag ng Globe Telecom Tower 1 sa Pioneer St. corner Madison St. sa Barangay Barangka Ilaya.
Tuluyang naapula ang sunog mag-a-alas-nuebe ng gabi kung saan umabot ito sa ikalawang alarma.
Wala namang naitalang casualties o injury ngunit patuloy pa ring inaalam ang naging sanhi ng pagsiklab ng apoy.