Gilbert Perdez

Magdaragdag ng puwersa ang NCRPO o National Capital Region Police Office sa mga lugar sa Metro Manila bilang paghahanda sa nalalapit na eleksyon.

Katunayan, ayon kay NCRPO Chief Police Major General Felipe Natividad, tinatayang nasa 2,584 na mga miyembro ng regional office ang sumalang sa mandatory career courses sa mga regional training centers para sa pagsabak nila sa kanilang election duties.

Ayon kay Natividad, layunin nitong ipamalas ang kahandaan at kapabilidad ng mga pulis sa kanilang hanay.

Titiyakin din aniya nila na magiging ligtas ang mga mamamayan laban sa mga election-related violence o anumang insidenteng mangyayari sa kanilang lugar.

INABSWELTO ng Sandiganbayan sa kasong ‘falsification of public documents’ ang mga dating opisyal at miyembro ng Philippine Army na may kaugnayan sa umano’y maanomalyang pagbili ng higit 5 milyong pisong halaga ng military uniforms noong 2003.

Kabilang sa mga nilinis ng anti-graft court sina dating Army commanding general Lt. Gen. Gregorio Camiling Jr., dating Army Support Command Commanding Officer Brig. Gen. Severino Estrella, at mga miyembro ng Bids and Awards Committee o BAC na sina Col. Cesar Guzman Santos, Col. Jessie Mario Dosado, Col. Barmel Zumel, Capt. George Cabreros, chief accountant Rolando Minel, Col. Cyrano Austria, at Atty. Editha Santos.

Sa desisyon, binanggit na nabigo ang prosekusyon na patunayan na nabigyan ng ‘undue advantage’ o pabor ang ‘Dantes Executive Menswear’ matapos maigawad dito ang higit limang milyong pisong halaga ng kontrata para sa iba’t ibang combat clothing and individual equipment o CCIE.

Ibinaba na ng Philippine Institute of Volcanology and Seismology o Phivolcs sa Alert Level 2 mula sa Alert Level 3 ang status ng Taal Volcano sa Batangas.

Ayon kay Phivolcs OIC Renato Solidum, bagama’t nagkakaroon pa rin ng sulfur dioxide emissions at mahihinang pagyanig sa paligid ng bulkan ay wala nang banta ng pag-akyat ng magma.

Pinagbabawalan pa ring bumalik sa Taal Island ang mga residente habang pinapayagan naman ang pangingisda sa isla.

Samantala, ipinanawagan naman ni Solidum ang pagsasaayos ng road networks at transport systems sa mga lugar sa paligid ng lawa ng Taal upang mapabilis ang evacuation sakaling mag-alburoto muli ang nasabing bulkan.

Tiniyak ng ilang kandidato sa pagka-pangulo na itataguyod nila at pangangalagaan ang karapatang pantao.

Sa ikalawang bahagi ng PiliPinas Debates 2022: The Turning Point na ginanap sa Sofitel sa Pasay City, sinabi ni dating Presidential spokesman Ernesto Abella na mahalagang bigyan ng trabaho at oportunidad ang mga mahihirap at mga vulnerable individuals upang hindi lumala ang problema sa droga.

Para naman kay Ka Leody de Guzman, hindi uubra sa kanya ang katulad ng polisiya ng kasalukuyang administrasyon na nalalabag na ang mga karapatang pantao ng mga mamamayan.

Isusulong naman ni Vice President Leni Robredo ang prevention at treatment sa drug problem, pagpapa-rehab sa mga adik at pagpaparusa sa mga tulak ng bawal na gamot.

Samantala, titiyakin naman ni Sen. Manny Pacquiao na masusugpo ang mga sindikato ng droga sa bansa na nagpapasok ng droga sa bansa habang isusulong ni Sen. Ping Lacson ang maayos na implementasyon ng anti-terorrism law na aniya’y maraming safe guards.