Gilbert Perdez

Laglag sa kamay ng mga awtoridad ang isang kilabot umanong tulak ng ipinagbabawal na droga sa ikinasang buy-bust operation sa ND Balderama St., Brgy.Bambang, Pasig City.

Si Alejo Garamay Jr., alyas “Nognog”, 34 taong gulang, ay nadakip ng mga tauhan ng Station Drug Enforcement  Unit (SDEU) ng Pasig Police sa pangunguna ni PLt. Kenny Khamar Khayad.

Nasabat sa operasyon ang buy-bust money at pitong sachets na naglalaman ng hinihinalang shabu at nagkakahalaga ng higit P54,000 at isang pouch.

Sasampahan ang suspek ng reklamong paglabag sa comprehensive dangerous drugs act.

Bagsak sa kulungan ang anim na drug suspects matapos mahulihan ng higit P200-K halaga ng ipinagbabawal droga sa ikinasang buy-bust operation sa Gen. Mascardo St., Barangay Bangkal, Makati City.

Kinilala ang mga suspek na sina Mark Christian Igno, Kerwin Paul Vitor, Steven Seguibience, Joshua Padel, Eusebio Concepcion IV, at Ariel Reyes, parehong residente ng lungsod.

Maliban sa buy-bust money, nasabat din sa operasyon ang nasa P217-K na halaga ng umano’y shabu at higit P4-K halaga ng marijuana.

Nakakulong na ngayon ang mga suspek sa custodial facility ng Makati PNP at nakatakdang sampahan ng kaukulang reklamo.

Nadakip ng mga awtoridad ang isang lalaking sangkot umano sa kalakalan ng ipinagbabawal na droga kasunod ng operasyon sa J. Ocampo St., Brgy. Saint Joseph, San Juan City.

Ayon sa San Juan Police, nakilala ang suspek na si Christian Pascual.

Matagal na umanong nakakatanggap ng sumbong ang mga awtoridad ukol sa illegal activities ni Pascual kaya’t ikinasa ang operasyon.

Walang binanggit ang San Juan Police hinggil sa dami ng ipinagbabawal na gamot na nasabat mula sa suspek na nakatakdang sampahan ng kaukulang reklamo.

Arestado ang isang mag-ama matapos mahulihan ng mahigit P7-K halaga ng umano’y shabu sa 4th Estate Subdivision, Brgy. San Antonio, Parañaque City.

Kinilala ang mga suspek na sina Archieval David Tesoro, 44 taong gulang, at Aldrich Gabriel Dela Cruz Tesoro, 21 taong gulang.

Maliban sa P1-K buy-bust money, nasabat din sa operasyon ang higit 100 grams ng hinihinalang shabu na tinatayang nagkakahalaga ng P714-K.

Nakakulong na ngayon ang mga suspek at nakatakdang sampahan ng kaukulang reklamo.

Kalaboso ang dalawang lalaki na sinita lamang sa hindi pagsusuot ng face mask sa Bacoor City, Cavite.

Kinilala ang mga suspek na sina Alvin Ramos at Jonald Aquino.

Sa imbestigasyon, sinita ng mga barangay tanod ang dalawa dahil sa hindi pagsusuot ng face mask ngunit sa halip na sumunod ay nagalit ang mga ito at naghamon ng away.

Hinamon pa umano ang mga tanod ng patayan at saka nagbantang pasasabugin ang barangay hall.

Dahil dito, agad na ini-report sa pulis ang dalawa na ngayo’y sasampahan ng kaukulang reklamo.

Nalansag ng mga elemento ng Southern Police District (SPD) ang isang drug den sa Barangay Sucat, Muntinlupa City.

Limang drug suspects ang nasakote na kinabibilangan nina Bobby Arceno, Danny Abas, Angelito Andaya, Alejandro Hernandez, at John Carl Tan.

Aabot naman sa higit P224,000 na halaga ng shabu ang nasabat sa operasyon, kasama ang P500 buy-bust money.

Mahaharap ang mga suspek sa reklamong paglabag sa comprehensive dangerous drugs act.