Arestado ang isang tindero ng isda matapos mahulihan ng higit 700 libong pisong halaga ng umano’y shabu sa Osmeña St. corner Pateros St., Barangay Valenzuela, Makati City.
Kinilala ang suspek na si Noel Herrera, 56 taong gulang.
Ayon kay Makati Chief of Police, Police Col. Harold Dipositar, nasabat mula kay Herrera ang buy-bust money at 714,000 pesos na halaga ng umano’y shabu.
Inihahand na ang kaukulang kasong isasampa laban sa suspek.
Kalaboso ang dalawang hinihinalang drug pushers matapos mahulihan ng mahigit isang daang libong pisong halaga ng umano’y shabu sa Canada St., Brgy. San Dionisio, Parañaque City.
Ang magkapatid na sina Ramon Alcatin Villoga at Mary Grace Alcatin Villoga ay nahuli ng mga kagawad ng Parañaque City Police SDEU o Station Drug Enforcement Unit.
Maliban sa isang libong pisong buy-bust money, nasabat din sa operasyon ang 102,000 pesos na halaga ng umano’y shabu.
Mahaharap ang mga suspek sa reklamong paglabag sa Comprehensive Dangerous Drugs Act.
Nasakote ng mga pulis ang tatlong tulak umano ng ipinagbabawal na droga, kabilang ang isang babae, sa ikinasang buy-bust bust operation sa Lontoc St., Brgy. Calzada-Tipas, Taguig City.
Kinilala ang mga suspek na sina Julius Palma, Roger Dizumimba Dimacuta, at Mary Jane Luminda Agao.
Sangkot umano ang tatlong suspek sa talamak na kalakalan ng iligal na droga sa lungsod kaya’t isinailalim sa surveillance ang mga ito bago naikasa ang operasyon.
Walong sachets ng hinihinalang shabu na nagkakahalaga ng higit 250,000 pesos at limang daang pisong buy-bust money ang nasabat mula sa mga suspek na ngayo’y nahaharap sa kaukulang reklamo.
Mahigit isang daang libong pisong halaga ng umano’y shabu ang nasabat mula sa dalawang hinihinalang kilabot na drug pushers sa Acacia St., Sikat Village, Brgy. Tunasan, Muntinlupa City.
Kinilala ang mga suspek na sina Rasdie Bagonte, 25 taong gulang, at Rustico Mantilla, 45 taong gulang.
Matagal na umanong nakakatanggap ng sumbong ang mga pulis ukol sa illegal activities ng dalawa kaya’t ikinasa ang operasyon.
Bukod sa limang daang pisong buy-bust money, nakumpiska rin ang nasa 102,000 pesos na halaga ng umano’y shabu mula sa mga suspek na sasampahan ng reklamong paglabag sa Comprehensive Dangerous Drugs Act.
Naghihimas ngayon ng malamig na rehas na bakal ang dalawang lalaki matapos masakote sa magkahiwalay police operations sa Taguig City.
Sa Pineapple St., Brgy. New Lower Bicutan, arestado ang isang Mastura Lampay matapos makuhanan ng kalibre .38 na baril, isang belt bag, higit 80,000 pesos na halaga ng umano’y shabu at limang daang pisong buy-bust money.
Sa isa pang operasyon sa Brgy. Fort Bonifacio, Taguig City, huli ang isa pang drug suspect na si Francisco Masangkay.
Sinilbihan ng search warrant mula sa korte si Masangkay na nagresulta sa pagkakaaresto sa suspek habang nasabat mula rito ang higit 148,000 pesos na halaga ng hinihinalang shabu.
Nakatanggap na ng kompensasyon ang isa sa mga guro na nabiktima ng online bank transfer fraud.
Ayon kay Benjo Basas, Chairperson ng Teachers’ Dignity Coalition (TDC), isa ang nasabing guro sa 70 kaso na idinulog sa National Bureau of Investigation (NBI) matapos mawalan ng pera sa Landbank payroll accounts ng mga titser.
Sinabi ni Basas na tatlong daang libong piso (P300,000) ang natanggap na kompensasyon ng hindi pinangalanang guro.
Samantala, isiniwalat ni Basas na ipinarating sa kanila ng Landbank na iniimbestigahan pa lamang ang iba pang kaso.
Inaasahan na si Pangulong Rodrigo Duterte ang mangunguna sa 120th Labor Day celebration sa Pampanga kasabay ng pagbubukas ng kauna-unahang Overseas Filipino Worker Hospital sa San Fernando City.
Ayon kay Labor Undersecretary Benjo Santos Benavidez, ito ang huling May 1 event na dadaluhan ni Duterte bilang Pangulo dahil matatapos na ang termino nito sa June 30.
Sinabi ni Benavidez, na tuloy ang job at business fairs sa 26 sites sa buong bansa ngunit ang main event ay ang pagpapasinaya ng OFW Hospital.
Nakarekober ang militar ng dalawang Improvised Explosive Devices (IEDs) at mga bala kasunod ng engkwentro sa pagitan ng mga rebelde at mga tropa ng pamahalaan sa Surigao del Norte.
Sa isang statement, sinabi ng 30th Infantry Battalion na nagpadala ito ng mga sundalo sa Barangay Payapag sa bayan ng Bacuag dahil sa presensya ng tinatayang sampung miyembro ng New People’s Army (NPA).
Umatras naman ang mga rebelde matapos ang 15 minutong bakbakan.
Pinaboran ng korte sa Hong Kong ang isang Filipina domestic worker matapos umano itong mabiktima ng exploitation ng among Briton.
Matatandaang na-convict si Brian Apthorp dahil sa indecent assault laban sa Pinay na si alyas “Maria” noong nakaraang taon.
Ngunit matapos manalo sa kaso, naghain ng hiwalay na legal suit ang biktima laban sa Hong Kong government dahil sa umano’y “lutong makaw” na imbestigasyon hinggil sa trafficking at forced labor.
Sa desisyon ni High Court judge Russell Coleman, inilarawan nito ang pagsisiyasat sa kaso ni “Maria” bilang “prematurely curtailed” at binanggit din na hindi ito makatwiran at hindi ibinatay sa katotohanan.
Ang landmark ruling ay maituturing ding panalo sa hanay ng mga migrant worker activists na nakikipaglaban para sa 340,000 domestic workers sa Hong Kong na kinabibilangan ng mga Pinay at Indonesians na umano’y lantad sa pang-aabuso at pananamantala.
Nasakote ang isang lalaki na hinihinalang karnaper sa ikinasang operasyon sa Upper Calachuchi, Brgy. Pembo, Makati City.
Si Eric Mata, 48 taong gulang, ay Top 8 Most Wanted Person ng Makati Police para sa 2nd quarter ng taong kasalukuyan.
Nabatid na si Mata ay may nakabinbin na warrant of arrest para sa kasong paglabag sa New Anti-Carnapping Act sa sala ni Judge Monique Quisumbing-Ignacio ng Mandaluyong City RTC Branch 209.
Tatlong daang libong piso ang rekomendadong piyansa laban sa akusado.