Gilbert Perdez

Inatasan ng mga obispo ang lahat ng mga simbahan sa bansa na patunugin ang kanilang mga kampana sa Halalan sa Lunes, Mayo 9.

Sa isang circular, binanggit ng Catholic Bishops’ Conference of the Philippines (CBCP) na gagawin ang sabayang pagkalembang ng kampana sa pagbubukas ng mga ‘voting precincts’ bandang alas-sais ng umaga na tatagal ng sampung minuto.

Hinimok din ng CBCP ang publiko na ipagdasal ang Commission on Elections o Comelec at iba pang partner agencies para sa malinis, tapat, at mapayapang eleksiyon.

Una rito, nanawagan din ang simbahan ng “intense prayer” para sa halalan.

Niyanig ng magnitude 5.2 na lindol ang Surigao del Sur province.

Ayon sa Philippine Institute of Volcanology and Seismology (PHIVOLCS), tectonic ang pinagmulan ng lindol na tumama sa layong labing-anim na kilometro silangan ng bayan ng Marihatag.

May 31 kilometro ang lalim ng pagyanig kung saan naramdaman ang Intensity III sa Bislig City at Tandag City, at Surigao del Sur.

Wala namang inaasahang aftershocks at danyos sa naturang lindol.

Nakapagtala ng 81 cases ng dengue ang Dinagat Islands mula Enero hanggang Abril ngayong taon.

Dahil dito, ayon sa Provincial Health Office (PHO), mas pinaigting pa ng mga local government units (LGUs) ang pagsasagawa ng cleanup drive, partikular ang mga may naitatalang kaso upang makontrol ang pagkalat ng sakit.

Base sa datos, nakapagtala ang bayan ng Tubajon ng 19 na kaso, 17 sa San Jose, 14 sa Basilisa, at 11 naman sa munisipalidad ng Dinagat.

Samantala, inanunsiyo naman ng PHO na libre ang testing, admission, at treatment ng mga kaso ng dengue sa lahat ng mga district hospitals sa naturang isla.

Umakyat ng 32% ang mga naitalang anti-Asian incidents sa Canada noong 2021.

Batay sa datos ng The Chinese Canadian National Council – Toronto, sumampa na sa 318% ang racist incidents na nangyari laban sa mga South Asians habang 121% laban sa mga Southeast Asians.

Nabatid na halos kalahati ng 943 incidents ay naganap sa mga pampublikong lugar.

Sa kanyang talumpati sa harap ng mga miyembro ng Filipino Canadian National Congress o FCNC, inisiwalat ni Filipino Canadian Member of Parliament Rechie Valdez na maging ang kanyang ina at tiyahin ay naging biktima rin ng racism.