Gilbert Perdez

Kahit abala ang mga pulis sa paghahanda sa darating na eleksyon, walang tigil ang war on drugs at kriminalidad.

Ito’y matapos madakip ang isang kilabot umanong drug pusher kung saan nasabat mula rito ang higit 1.3 million pesos na halaga ng hinihinalang shabu sa ikinasang buy-bust operation sa Roldan Street, Brgy. New Lower, Taguig City.

Kinilala ni Southern Police District PBGen Jimili Macaraeg na si Akmad Sumlay, tatlumpung taong gulang, at isang driver.

Maliban sa buy-bust money, nakumpiska rin sa operasyon ang P1.3M na halaga ng umano’y shabu, isang belt bag, at digital weighing scale o timbangan.

Inihahanda na ang reklamong paglabag sa comprehensive dangerous drugs act laban kay Sumlay.

Timbog ang dalawang hinihinalang tulak ng droga sa isinagawang operasyon ng mga awtoridad sa Tenement Building Brgy. Western Bicutan, Taguig City.

Kinilala ang mga suspek na sina Marlon Piñon, 45 taong gulang, at John Paul Villavicencio, 29 taong gulang.

Bukod sa dalawang libong pisong buy-bust money, nasabat din sa operasyon ang higit apat na raang libong pisong halaga ng shabu, at coin purse.

Sasampahan ng kaukulang reklamo ang naturang suspek.

Arestado ang isang lalaki matapos mahulihan ng umano’y shabu sa inilatag na checkpoint ng Commission on Elections (COMELEC) sa Doña Esperanza corner 3rd Street, Brgy. Sta. Ana, Pateros.

Kinilala ang suspek na si Ryan Jayungco, nasa hustong gulang, at nakatira sa nasabing bayan.

Nabatid na dumaan sa COMELEC checkpoint si Jayungco sakay ng motorsiklo at nang hingan ng mga dokumento ay sinubukan pang takbuhan ang mga pulis.

Nasabat sa operasyon ang ilang sachets ng hinihinalang shabu na nagkakahalaga ng P68K at isang timbangan, at motorsiklo.

Nakatakdang sampahan ng kaukulang reklamo ang naturang suspek.