Gilbert Perdez

Sumampa na sa 467,601 ang kabuuang bilang ng mga dinapuan ng Coronavirus Disease 2019 (COVID-19) sa Pilipinas.

Ito’y makaraang makapagtala ang Department of Health (DOH) ng 1,885 ng bagong impeksiyon nang mabigong magsumite ng datos sa tamang oras ang 15 laboratoryo sa bansa.

Nanguna ang Quezon City sa may pinakamaraming bagong kaso na pumalo sa 130 na sinundan ng Bulacan (122), Davao City (99), Rizal (78), at Leyte (63).

Gumaling naman ang 307 pasyente dahilan upang umakyat sa 430,791 ang total recoveries sa buong kapuluan.

Samantala, sumirit naman sa 9,062 ang death toll kasunod ng pagpanaw ng7 pang COVID-19 patients.

Nagdiwang ng Pasko sa Baluarte Elementary School sa Molo district, Iloilo City ang 23 pamilya matapos masunog ang isang residential area sa lugar.

Ayon kay Teresa Gelogo, head ng City Social Welfare and Development Office (CSWDO), sumiklab ang sunog sa Zone 6-B, Barangay Boulevard at nagmula sa tahanan ng isang Freddie Portillo kung saan 14 na bahay ang nilamon ng apoy.

Bagama’t walang nasaktan sa insidente, ayon sa Bureau of Fire Protection – Iloilo City, halos kalahating milyong piso naman ang kabuuang pinsala ng sunog.

Hanggang P10k naman ang ibibigay na tulong ng lokal na pamahalaan sa bawat pamilyang apektado ng naturang sunog.

Gagamitin ni Pangulong Rodrigo Duterte ang kanyang veto power upang matanggal ang ilang probisyon na nakapaloob sa panukalang 2021 General Appropriations Act.

Ginawa ni Presidential Spokesperson Harry Roque ang pahayag ilang araw bago ang inaabangang ceremonial signing ng proposed P4.5-T national budget para sa susunod na taon.

Bagama’t hindi tinukoy ni Roque ang ilang items na babaklasin, binanggit ng kalihim na ito’y ibabase lamang sa rekomendasyon ng Department of Budget and Management (DBM).

Sinasabing lalagdaan ni Pangulong Duterte ang budget bill sa Davao City sa Lunes, ika-28 ng Disyembre.

Nakapagtala ng isang pagyanig ang Philippine Institute of Volcanology and Seismology (PHIVOLCS) sa paligid ng Taal Volcano.

Ayon  sa PHIVOLCS, nananatili ang alert Level 1 (abnormal) sa Taal na nangangahulugan na maaaring magkaroon ng biglaang phreatic explosions, volcanic earthquakes, minor ashfall, lethal accumulations o pagsabog ng volcanic gas sa paligid ng bulkan.

Dahil dito, mahigpit na inirekomenda ng PHIVOLCS ang pagbabawal sa pagpasok sa permanent danger zone ng Taal, lalo na malapit sa bunganga ng bulkan, at sa Daang Kastila.

Itinalaga si Atty. Aimee Ferolino-Ampoloquio bilang ad interim commissioner ng Commission on Elections (COMELEC).

Si Ampoloquio ay dating Provincial Election Supervisor (PES) ng Davao del Norte kung saan matatapos ang kanyang termino sa Pebrero 2, 2027.

Batay sa Saligang Batas, maaaring gawin ang ad interim appointment kapag ang naka-recess ang Kongreso pero kailangan pa rin itong dumaan sa kumpirmasyon ng Commission on Appointments.