Gilbert Perdez

Hindi muna pahihintulutan ni Pangulong Rodrigo Duterte ang pagsasagawa ng pilot implementation ng face-to-face classes.

Ito ang inihayag ng Pangulo matapos makipagpulong sa Inter-Agency Task Force (IATF) at ilang health experts tungkol sa natuklasang bagong strain ng coronavirus sa United Kingdom at South Africa.

Matatandang inaprubahan ng Presidente ang rekomendasyon ng Department of Education (DepEd) na magsagawa ng pilot testing ng face-to-face classes sa mga piling paaralan sa mga lugar na may mababang kaso ng COVID-19.

Gayunman, binawi ito ni Duterte sa pagsasabing hindi muna niya ito papayagan hangga’t hindi natatapos ang pandemya.

Umakyat na sa 469,005 ang kabuuang bilang ng kaso ng COVID-19 sa bansa.

Ito’y makaraang makapagtala ang Department of Health (DOH) ng 1,406 na bagong kumpirmadong impeksiyon isang araw matapos makapagdiwang ng Pasko.

Nanguna ang Bulacan sa may pinakamaraming kaso na umabot sa isang daan na sinundan ng Quezon City (98), Rizal (88), Laguna (73), at Batangas (69).

Pumalo naman sa 431,005 ang total recoveries kasunod ng paggaling ng 266 na COVID-19 patients.

Samantala, sumirit na sa 9,067 ang death toll kasunod ng pagpanaw ng 5 pang pasyente.

Nasawi ang 1 pulis at isang 2 taong gulang na batang lalaki matapos magkasalpukan ang 2 motorsiklo sa Borongan City, Eastern Samar.

Nadala pa sa Eastern Samar Provincial Hospital si Police Staff Sgt. Luis Philip Azura Jr. at ang bata na si John Rick Larioma pero binawian din ng buhay.

Batay sa imbestigasyon, sakay si John Rick ng motorsiklong minamaneho ng kanyang ama na si Jonathan kasama ang ina nitong si Erica Gamayao nang mabangga ng motor ni Azura sa Barangay Alang-alang.

Sa lakas ng impact, tumilapon ang mga biktima na ikinasawi nina John Rick at Azura.

Samantala, kasalukuyan namang nilalapatan ng lunas sa ospital sina Jonathan at Gamayao.

Walang magaganap na putukan sa pagsalubong ng bagong taon sa Valenzuela City.

Ito’y makaraang aprubahan ng lokal na pamahalaan ang City Ordinance No. 833 na nagrerekomenda sa pagbabawal ng paggawa, pagbebenta, paggamit ng paputok at iba pang pyrotechnic devices sa lungsod.

Binanggit sa ordinansa na mananatili ang pagbabawal na ito hangga’t hindi natatapos ang krisis at ‘state of public health emergency’.

Maaari namang mapatawan ng P500 multa ang sinumang lalabag sa kautusan o kaya’y pagkakakulong ng hindi hihigit ng 30 araw.