Gilbert Perdez

Tinuligsa ng isang grupo ng mga guro ang ginawang pagkansela ni Pangulong Rodrigo Duterte sa planong pilot implementation ng face-to-face classes.

Giit ni ACT Secretary General Raymond Basilio, hindi dapat maging hadlang ang mga bagong strain sa pag-aaral ng mga estudyante.

Sa halip na umatras sa plano, binigyang diin ni Basilio na dapat tiyakin ng gobyerno na maipatutupad ang health and safety protocols sa mga paaralan at maglatag ng maayos na imprastraktura sa mga mahihirap na lugar sa bansa.

Magugunitang inaprubahan ni Pangulong Duterte ang rekomendasyon ng Department of Education (DepEd) na magsagawa ng pilot testing ng physical classes sa mga piling paaralan sa mga lugar na may mababang kaso ng COVID-19.

Gayunman, binawi ito ni Duterte sa pagsasabing hindi niya muna ito papayagan hangga’t hindi natatapos ang pandemya.

Lusot na sa Kongreso ang isang panukalang batas na naglalayong maibsan ang food waste ng bansa sa pamamagitan ng pag-donate at pag-recycle ng mga tira-tirang pagkain.

Saklaw ng House Bill 7956 o ang Food Surplus Reduction Act ang mga restoran, diners, culinary schools, supermarkets, fast food chains, hotels, at food manufacturers.

Sa ilalim ng bill ni Quezon City 1st District Rep. Anthony “Onyx” Crisologo, susuriin muna ng isang sanitary inspector ng lokal na pamahalaan ang pagkain bago payagang i-donate sa benepisyaryo tulad ng mga food banks na siyang mamamahagi nito katuwang ang social welfare department at local government units.

Papatawan ng kalahating milyong pisong multa ang establisimyento na mamamahagi ng panis o sirang food surplus habang P1 milyong multa naman ang ipapataw sa sinumang pipigil sa pamamahagi ng mga tirang pagkain.

Matatandaang lumabas sa Social Weather Stations survey noong Setyembre na mahigit 7 milyong Pilipino ang nagutom sa ikatlong bahagi ng taong kasalukuyan.

Ilang araw bago magpalit ang taon, nadagdagan pa ng 7,635 ang bilang ng mga gumaling mula sa coronavirus disease 2019 (COVID-19) sa Pilipinas.

Dahil dito, ayon sa Department of Health (DOH), sumirit na sa 438,678 ang total recoveries.

Nagkaroon naman ng 883 na bagong kaso dahilan upang umakyat sa 469,886 ang kabuuang bilang ng mga tinamaan ng COVID-19 sa bansa kung saan nasa 22,099 ang active cases.

Sa nabanggit na bilang, naitala ang pinakamaraming kaso sa Rizal na 66 na sinundan ng Quezon City (50), Benguet (47), Davao City (42), at Maynila (35).

Samantala, 42 pang pasyente ang pumanaw kaya’t pumalo na sa

9,109 ang death toll sa buong bansa.

JUST IN: Kaso ng COVID-19 sa bansa, nadagdagan pa ng 883 ngayong Linggo, Disyembre 27.

Pumalo na sa kabuuang 469,886 ang bilang ng kumpirmadong kaso ng COVID-19 sa bansa. Mayroon namang 22,099 naitalang active cases. | https://t.co/HHOy7zaafm pic.twitter.com/Yks3nB7AUX

— DWIZ Newscenter (@dwiz882) December 27, 2020

Patay ang 2 indibidwal sa magkahiwalay na aksidente sa Nueva Ecija.

Ayon kay Police Col. Marvin Joe Saro, direktor ng Nueva Ecija Police Provincial Office, nakilala ang mga nasawi na sina Emmanuel Santiago ng Barangay Pook Rizal, bayan ng Bongabon; at Mark Arvie Munda ng Barangay Cabawangan sa bayan ng Nampicuan.

Sa unang road accident, lumalabas na bumangga ang motorsiklo ni Santiago sa isang concrete wall na ikinasawi nito.

Samantala, sa isa pang aksidente, sumalpok naman ang motor ni Munda sa isang nakaparadang van sa Barangay Bentigan Cuyapo na naging sanhi rin ng kanyang pagpanaw.

Isa namang bawas-presyo ng mga produktong petrolyo ang namumuro ilang araw bago salubungin ang Bagong Taon.

Ayon sa mga source mula sa industriya, kasado na ang rollback sa Martes na mangyayari matapos ang 6 na sunod-sunod na linggong oil price hike.

Sinasabing maglalaro sa 30¢  hanggang 40¢  ang magiging bawas-presyo ng kerosene habang 10 hanggang 20¢ naman sa kada litro ng diesel.

Samantala, malaki naman ang posibilidad na mapako ang kasalukuyang presyo ng gasolina.

Dahan-dahan nang nililimitahan ng gobyerno ang deployment ng mga Filipino nurses sa Europa partikular sa United Kingdom at Germany dulot ng natuklasang bagong strain ng coronavirus disease 2019 (COVID-19).

Ayon kay Department of Labor and Employment (DOLE) Secretary Silvestre Bello III, sa halip na suspendihin ang pagpapadala ng mga medical workers doon, nagpasya silang limitahan na lamang ang bilang ng mga ito.

Paliwanag ng DOLE chief, kailangang lumagda ng isang overseas Filipino worker (OFWs) sa isang waiver kung saan nakasaad doon ang risk o maaaring panganib na idudulot ng kanyang pag-alis.

Sa pamamagitan nito, ayon kay Bello, hindi sila masisisi sa maaaring sapitin ng isang medical worker na magpupumilit na umalis ng bansa.