Gilbert Perdez

Nadagdagan ng 106 ang bilang ng mga gumaling mula sa COVID-19 sa Pilipinas.

Dahil dito, ayon sa Department of Health, umakyat na sa 439,895 ang total recoveries.

Nagkaroon naman ng 1,765 na bagong kaso dahilan upang pumalo na sa 475,820 ang mga kumpirmadong COVID-19 infections sa bansa.

Nakapagtala ng pinakamaraming kaso ang Davao City na 100 na sinundan ng Rizal na 99, Cavite na 71, Quezon City na 70 at Maynila na 69.

Samantala, sumirit na sa 9,248 ang death toll sa buong bansa bunsod ng pagpanaw ng 4 pang pasyente.

Mahigit P500K ng mga paputok ang nasabat ng mga awtoridad bago sumapit ang bagong taon sa Zamboanga City at Zamboanga Sibugay province.

Ayon kay Capt. Edwin Duco, information officer ng Police Regional Office-9 (PRO-9), unang nakumpiska ang tinatayang P500K halaga ng mga firecrackers sa isinagawang operasyon sa Freedom Stage, Barangay Poblacion, Ipil, Zamboanga Sibugay.

Samantala, mahigit P17K  halaga rin ng mga paputok at mga pyrotechnics ang nasabat ng mga pulis sa Brgy. Calarian at Brgy. Mampang sa lungsod ng Zamboanga.

Ang mga nabanggit na operasyon ay bahagi pa rin ng kampanya ng gobyerno laban sa mga paputok at pagpapatupad ng batas ukol dito.

Sugatan ang 3 indibidwal, kabilang ang 2 menor de edad, matapos umanong masabugan ng paputok sa magkahiwalay na insidente sa Nueva Ecija.

Ayon sa Nueva Ecija Police Provincial Office, nakilala ang isa sa mga biktima na si Jay Ar Anastacio, 28 taong gulang, ng Barangay Villamarina, San Jose City.

Hindi naman tinukoy ang pagkakakilanlan ng isang 8 taong gulang na batang lalaki mula sa Barangay Palomaria, bayan ng Bongabon na nabiktima rin ng paputok, gayundin ang isang 10 taong gulang na bata mula sa Barangay Abar Uno sa lungsod din ng San Jose.

Sinasabing ang mga biktima ay kapwa na naputukan ng “kwitis” na isa sa mga bawal na paputok.

Nagtamo si Anastacio ng 1^st degree burn nang sumabog ang paputok sa kanyang kamay habang natalsikan naman ng sumabog na bote na nilagyan ng “kwitis” ang 8 anyos na lalaki.

Samantala, ang isa pang biktima na 10 taong gulang ay naputukan naman sa kanyang kanang binti.

Marami nang sundalo ang naturukan ng Sinopharm COVID-19 vaccine.

Ito ang isiniwalat ni Pangulong Rodrigo Duterte bagama’t wala pang inaprubahang bakuna ang Food and Drug Administration (FDA) laban sa COVID-19.

Ipinahiwatig din ng Punong Ehekutibo na pili lamang ang mga nabakunahan lalo pa’t hindi pa naman ito aprubado sa ngayon.

Matatandaang inanunsiyo ng Malacañang na ipaproyaridad ng gobyerno sa COVID-19 vaccination program ang mahigit 1 milyong health workers sa bansa.

Nanawagan ang Department of Foreign Affairs (DFA) sa publiko na huwag magpatulong sa pagproseso ng appointment sa pagkuha ng pasaporte sa social media.

Ayon sa DFA, nakatanggap sila ng sumbong mula sa ilang passport applicants na nagpa-book ng passport appointment sa tulong ng kahina-kinalang third party o fixer pero mas malaki ang binayaran kumpara sa aktwal na sinisingil ng ahensya.

Kasabay nito, pinayuhan ng DFA ang mga aplikante na gumamit ng sariling email address at phone number upang matanggap ang tamang detalye ng kanilang appointment.

Hinikayat din ang publiko na isumbong ang mga nagpoproseso ng online appointment sa telepono bilang 82343488 upang maberipika ang pagkakakilanlan ng mga ito.