Muling inilampaso ng Los Angeles Lakers ang San Antonio Spurs sa sarili nitong bakuran sa score na 109-103.
Humakot si Anthony Davis ng 34 points para sa Lakers habang nag-ambag naman si Lebron James ng 26 points.
Matatandaang pinadapa rin ng LA ang Spurs sa una nilang laro noong Miyerkules na score na 121-107 sa home court pa rin ng San Antonio.
Inaabangan na ng kanyang mga tagahanga ang bagong proyekto ng aktres na si Charlie Dizon ngayong taon.
Kasama ang aktor na si Fino Herrera, sinasabing gagampanan ni Dizon ang papel ng isang pulis sa “Virgo,” isang episode na ipapalabas sa iWant TFC original show na “Horrorscope” na ididirek ni Ato Bautista.
Matatandaang tumatak sa maraming Pinoy fans ang nakaraang pelikula ni Dizon na “Fan Girl” kung saan nasungkit pa niya ang best actress award sa 2020 Metro Manila Film Festival.
Umabot sa 75 indibidwal ang napatay umano ng Ethiopian security forces sa madugong ethnic violence noong Hunyo at Hulyo ng nakaraang taon matapos itumba ang sikat na singer na si Hachalu Hundessa.
Ito ang nabunyag sa inilabas na report ng Ethiopian Human Rights Commission kung saan bukod sa mga nasawi ay sinasabing mahigit 200 din ang nasugatan sa karahasan.
Itinuturing itong ‘crimes against humanity’ ng grupo dahil ilan umano sa mga napaslang ay pinugutan, tinortyur at kinaladkad sa kalsada ng mga salarin.
Matatandaang nag-aklas ang mga tao sa Ethiopia matapos mapatay sa pamamaril si Hachalu na bukod sa pagiging singer ay isa ring aktibista.
Magiging requirement na para sa mga manlalaro ng National Basketball Association (NBA) ang pagsusuot ng tracking devices sa lahat ng team buses at eroplano upang mapigilan ang pagkalat ng coronavirus.
Ayon sa ulat ng ESPN, ipatutupad na ang sensor program simula ika-7 ng Enero kung saan saklaw nito ang lahat ng mga atleta, team officials, at mga coaches.
Sinasabing layunin nitong matukoy ang mga club members na kailangang i-quarantine kapag may isang miyembro ng koponan na nagpositibo sa COVID-19.
Sa pamamagitan ng sensor na suot ng team members, malalaman kung nakalapit ito sa iba pang may sensor sa layong 6 na talampakan.
Samantala, hindi naman oobligahing magsuot ng sensor ang mga manlalaro kung nasa loob ito ng team hotel sa kanilang road games o kaya’y nasa mismong laro ng koponan.
Ibinunyag na ng aktor na si Diego Loyzaga ang tunay na relasyon nila ni “Bagong Umaga” star Barbie Imperial.
Ginawa ni Loyzaga ang pahayag matapos ang ilang buwang pagkaka-link nilang 2 sa isa’t isa.
Matatandaang sumabog ang tsismis na may relasyon sina Loyzada at Imperial noon pang Nobyembre dahil sa isang post ng dalaga sa Instagram kung saan nag-iwan din ng makahulugang comment ang aktor.
Samantala, namataan din umano ang 2 habang nagde-date sa isang museo sa Antipolo noong nakaraang buwan.
Tuluyan nang pinalawig ni Pangulong Rodrigo Duterte ang ipinatutupad na General Community Quarantine classification sa Metro Manila at sa 7 pang lugar hanggang sa katapusan ng Enero ng taong kasalukuyan.
Ayon kay Presidential Spokesperson Harry Roque, bukod sa NCR o National Capital Region, extended din ang GCQ sa Santiago City, Batangas, Tacloban City, Iligan City, Lanao del Sur, Davao City, at Davao del Norte.
Nasa ilalim naman ng Modified General Community Quarantine ang iba pang lugar sa bansa.
Sinasabing ang pagpapalawig ng quarantine qualifications sa ilang lugar sa bansa ay ginawa upang maiwasan ang pagkalat ng COVID-19.
Hinimok ng Department of Health (DOH) ang mga magulang na dalhin ang kanilang anak sa ospital at treatment center kahit minor injuries o galos lamang ang tinamo nito mula sa pagsabog ng paputok.
Sa isang press conference sa unang araw ng taong kasalukuyan, ibinabala ni Health Secretary Francisco Duque III na kahit nadaplisan lamang ang bata ay maaari itong mauwi sa malubhang komplikasyon tulad ng tetano.
Ang tetanus ay posibleng magdulot ng seryosong kondisyon na maaaring ikamatay ng tao kapag hindi nagamot lalo pa’t maaaring makapasok ang bakterya kahit sa maliit lamang na sugat ng pasyente.
Nakauwi na ng bansa ang 234 na mga Pilipino mula Gitnang Silangan na apektado ng COVID-19 pandemic.
Ayon kay Foreign Affairs Undersecretary Sarah Lou Arriola, ang mga Pinoy na galing Dubai, Abu Dhabi at Bahrain ay dumating sa Maynila sakay ng isang chartered flight ng Philippine Airlines.
Sinasabing pinondohan ang pagpapauwi sa mga Pinoy mula Middle East sa ilalim ng Assistance to Nationals o ATN Fund ng Department of Foreign Affairs (DFA).
Agad namang dinala sa ospital ang ilang repatriates na nangangailangan ng atensiyong medikal.
Bawal na ring pumasok sa bansa ang mga biyaherong manggagaling sa Estados Unidos bunsod ng natuklasang bagong variant ng coronavirus.
Ayon kay Presidential Spokesperson Harry Roque, ito ang napagpasyahan ni Pangulong Rodrigo Duterte kasunod na rin ng rekomendasyon ng health department at Department of Foreign Affairs (DFA).
Dahil dito, sinabi ni Roque na hindi na papayagang pumasok ng bansa ang mga pasaherong galing Amerika o nasa US sa loob ng 14 na araw bago dumating simula ika-3 hanggang ika-15 ng Enero ng taong kasalukuyan.
Samantala, papayagan namang umuwi ang mga Pilipino citizens mula US o namalagi roon ng 2 linggo bago dumating sa Pilipinas sa Enero 3, 2021.
Gayunman, sasailalim pa rin ang mga Pinoy sa 14 na araw na mandatory quarantine kahit pa magnegatibo ang mga ito sa RT-PCR test result.
Patuloy pa ring iniimbestigahan ng Department Of Health (DOH) ang paggamit ng hindi rehistradong bakuna kontra COVID-19 na pinangunahan ng Presidential Security Group (PSG) habang mino-monitor din ang posibleng side effects sa mga naturukan nito.
Ayon kay Health Secretary Francisco Duque III, inaalam pa rin ng Food and Drug Administration (FDA) kung sinu-sino ang mga nabakunahan upang makagawa agad sila ng assessment ukol dito.
Matatandaang inamin ng PSG na nakakuha sila ng bakuna laban sa coronavirus noon pang Setyembre ng nakaraang taon.