Gilbert Perdez

Obligado nang magpa-swab test ang mga umuuwing residente ng Maynila na nagbakasyon sa labas ng lungsod nitong holiday season simula kahapon, Enero 2.

Batay sa memorandum na ipinalabas ng Manila Health Department (MHD), kinakailangang sumalang sa RT-PCR test bago tanggapin sa kanilang barangay ang mga Manileños upang maiwasan ang muling pagtaas ng kaso ng COVID-19 sa siyudad.

Ayon kay Manila Public Information officer Julius Leonen, lahat ng mga magbabalik na residente ay dapat magtungo para sa libreng swab test sa mga sumusunod na quarantine facilities:

*District 1 – T. Paez Quarantine Facility

*District 2 – Patricia Sports Complex Quarantine Facility

*District 3 – Arellano Quarantine Facility

*District 4 – Dapitan Sports Complex Quarantine Facility

*District 5 – San Andres Sports Complex Quarantine Facility

*District 6 – Bacood Quarantine Facility

Ang mga magpopositibo ay kailangang manatili sa quarantine facility habang iisyuhan naman ng medical certificate ang mga magnenegatibo bago payagang umuwi sa kanilang mga bahay.

Nagbabala sa publiko ang Philippine Statistics Authority (PSA) laban sa mga scammer na nagpapanggap na empleyado upang maayos ang kanilang registration para sa Philippine Identification System (PhilSys).

Batay sa abiso ng PSA, sinasabing nakakatanggap ito ng mga report ukol sa ilang indibidwal na nanloloko at sinasabing sila ay bahagi ng PhilSys team kung saan humihingi pa ito ng bayad para sa Philippine Identification card (PhilID).

Tinukoy ng ahensya ang Facebook account na ‘Philippine National ID (News & Information)’ at isang ‘Calvin Processings’ na nangongolekta ng pera para sa PhilID registration.

Bunga nito, muli ring nilinaw ng PSA na ang registration sa ilalim ng PhilSys ay libre o walang bayad.

Nilinaw ng Department of Health (DOH) na wala pang nade-detect ang Philippine Genome Center (PGC) sa bansa na bagong variant ng COVID-19 mula United Kingdom (UK).

Gayunman, nilinaw ng ahensya na lahat ng  positibong RT-PCR o swab test specimens mula sa mga bansang may UK Covid-19 variant ay sasailalim sa tinatawag na ‘genome sequencing’ simula ika-4 ng Enero.

Sisikapin din ng PGC na mailalabas agad ang resulta ng kanilang pagsusuri sa lalong madaling panahon.

Pasok ang isang Filipina nurse sa New Year honors list ni Queen Elizabeth II bunsod ng naging ambag nito sa coronavirus response ng United Kingdom (UK).

Sa isang tweet, binati ni UK Ambassador to the Philippines Daniel Pruce ang staff nurse na si Charito Romano matapos itong gawaran ng British Empire Medal dahil sa aniya’y “outstanding services” ng Pinay sa isang nursing care sa Surrey.

Ang British Empire Medal o BEM ay iginagawad sa mga indibidwal dahil sa natatangi nilang serbisyo sa lokal na komunidad.

Matatandaang pinagkalooban din ng BEM ang isa pang Filipina nurse na si Minnie Klepacz noong nakaraang taon.

Nadagdagan ng 47 ang bilang ng mga nakarekober mula sa coronavirus disease 2019 (COVID-19) sa Pilipinas.

Dahil dito, ayon sa Department of Health (DOH), sumampa na sa 439,942 ang total recoveries.

Batay sa pinakahuling case bulletin, nakapagtala ang DOH ng 1,097 na bagong kaso dahilan upang umakyat sa 476,916 ang total cases.

Sumirit naman sa 27,721 ang bilang ng mga aktibong kaso sa bansa.

Nanguna sa may pinakamaraming bagong kumpirmadong kaso ang Davao del Norte na 65 at sinundan ng Davao City (60), Laguna (53), Batangas (48), at Cavite (43).

Samantala, lima pang pasyente ang nasawi kaya’t pumalo na sa 9,253 ang death toll sa buong bansa.

Umakyat na sa 8,387 ang bilang ng mga Pilipinong gumaling mula sa COVID-19 sa labas ng bansa.

Ayon sa Department of Foreign Affairs (DFA), ito’y bunsod ng 45 na bagong recoveries.

Sinasabing nakapagtala rin ang DFA ng 63 na bagong kumpirmadong kaso.

Nasa 3,593 na lamang ang mga Pinoy na sumasailalim sa gamutan sa ibayong dagat habang sumampa naman sa 911 ang death toll.