Gilbert Perdez

Nakapagtala ang Department of Health (DOH) ng 2,972 na bagong COVID-19 recoveries.

Dahil dito, umakyat na sa 1,053,523 ang bilang ng mga gumaling sa sakit o katumbas ng 93.1% ng lahat ng coronavirus infections sa Pilipinas.

Batay sa daily bulletin ng DOH, nakapagtala rin ito ng 6,784 na bagong kaso kaya’t pumalo na sa 1,131,467 ang total cases sa bansa.

Sa nabanggit na bilang, nasa 58,986 naman ang mga aktibong kaso.

Samantala, dahil naman sa pagpanaw ng 137 pang pasyente ay sumampa na sa 18,958 ang death toll sa buong kapuluanA

Hindi na obligado ang mga vaccination sites na kunan ng vital signs ang mga indibidwal bago bakunahan ang mga ito.

Ito ang inanunsiyo ni Department of Health o DOH Undersecretary Maria Rosario Vergeire kasunod ng rekomendasyon ng Philippine Society of Hypertension at the Philippine Heart Association.

Aniya, ang tanging gagawin na lamang ng mga health workers na magbibigay ng bakuna ay alamin kung dati nang nagkaroon ng hypertension o organ damage ang isang indibidwal bago turukan ng bakuna.

Magugunitang nagreklamo ang maraming vaccine beneficiaries dahil sa sobrang haba ng pila ng mga nagpapabakuna dulot ng vital signs screening.

Tutol ang Department of Health (DOH) sa mungkahing gawing requirement ang “vaccine passes” sa pagpasok sa mga indoor establishments.

Ito’y dahil ayon kay DOH Undersecretary Maria Rosario Vergeire, wala pa namang katiyakan na hindi makakahawa ng coronavirus disease 2019 (COVID19) ang mga nabakunahan nang indibidwal.

Base aniya sa mga inisyal na pag-aaral, wala pang kakayahan ang mga bakuna para sagkaan ang pagkalat ng virus.

Ayon kay Vergeire,, ang kayang gawin pa lamang sa ngayon ng mga available na COVID-19 vaccines ay pigilan mas malalang impeksiyon, gayundin ang pagkaka-ospital ng pasyente.

Matatandaang inihayag ni Department of Trade and Industry o DTI Secretary Ramon Lopez na nakikipag-ugnayan na sila sa restaurant sector para sa posibleng paglalatag ng vaccine pass system.

Sa halip na hulihin o ikulong, turuan na lamang kung anong tamang pagsusuot ng face mask.

Ito ang panawagan ni Vice President Leni Robredo sa mga awtoridad matapos ipag-utos ni Pangulong Rodrigo Duterte na arestuhin ang mga pasaway na Pinoy.

Giit ni Robredo, dapat turuan ang publiko kung papaano ang tamang paggamit ng mask.

Aniya, posibleng magdulot pa ng matinding problema kung ikukulong ang mga violators dahil sa tindi ng congestion ng mga piitan sa bansa.

Tinatayang P1 milyong halaga ng shabu ang nakumpiska ng mga awtoridad mula sa tatlong drug suspects sa ikinasang buy-bust operation sa Tondo, Maynila.

Kabilang sa mga natimbog ang mga suspek na 37 hanggang 38 taong gulang makaraang bentahan ng shabu ang isang pulis na poseur buyer sa Barangay 124.

Bukod sa shabu na umano’y nagkakahalaga ng P1 milyong, nasabat din sa operasyon ang isang baril.

Kasong paglabag sa Comprehensive Dangerous Drugs Act ang isasampa laban sa tatlong suspek.

Tapos na sa pamamahagi ng cash aid o ayuda ang halos 81% ng mga lokal na pamahalaan sa NCR Plus.

Ayon sa Department of the Interior and Local Government (DILG), naibigay na sa mga benepisyaryo ang tinatayang P18.6 bilyon mula sa 18 local governments.

Kabilang naman dito ang labintatlong lungsod at bayan sa Laguna, Guiguinto at Pandi sa Bulacan; at maging ang Tagaytay, Amadeo at Naic sa Cavite.

Samantala, nilinaw ng DILG na kaya hindi pa tapos sa pamamahagi ang ilang lokal na pamahalaan ay dahil sa dami ng mga cash aid beneficiaries sa kani-kanilang lugar.

Hindi palalawigin ang voter registration period.

Ito ang nilinaw ni Commission on Elections (Comelec) spokesperson James Jimenez kahit suspendido ang pagpaparehistro sa mga lugar na nasa ilalim ng mahigpit na community quarantine status.

Nabatid na target ng komisyon na magkaroon ng pitong milyong bagong rehistradong botante para sa 2022 elections.

Gayunman, nasa 2.8 milyon pa lamang ang bilang ng mga nagpaparehistro mula Abril 30.

Itinakda naman ang deadline para sa voter registration hanggang Setyembre 30 ngayong taon.

Inihayag ni Philippine National Police chief Gen. Guillermo Eleazar na hinihintay pa nila ang aaprubahang protocols ng Korte Suprema na magsisilbing gabay ng mga pulis ukol sa tamang paggamit ng body cameras sa kanilang operasyon.

Paliwanag ni Eleazar, oras na maglabas na ang Supreme Court ng alintuntunin ay saka pa lamang sila magpapatupad o magsisilbi ng mga search warrants.

Ayon sa bagong hepe ng Pambansang Pulisya, nararapat nang pagsuutin ng body camera ang mga alagad ng batas para hindi sila nasisisi kapag may kumukuwestiyon sa mga police operations.

Bukod dito, maililigtas din aniya nila ang sarili sa anumang kaso kaugnay sa mga operasyon laban sa mga suspek.

Dalawang masuwerteng mananaya ang nakasungkit ng P101 milyong jackpot sa Lotto 6/42.

Ayon kay Philippine Charity Sweepstakes Office (PCSO) general manager Royina Garma, natumbok ng dalawang bettors ang winning combination na 15-36-03-24-06-08.

Ang winning tickets ay sinasabing nabili sa Iriga City, Camarines Sur at Davao City, Davao del Sur.

Samantala, 24 bettors naman ang nakakuha ng second prize at kapwa makatatanggap ang mga ito ng P24,000 bawat isa matapos makuha ang lima sa anim na winning numbers.

Ang 6/42 lotto ay binobola tuwing Martes, Huwebes, at Sabado.