Umalis na sa YG Entertainment ang Korean pop star na si Sandara Park.
Ito’y makaraang mapaso ang kontrata ng singer sa nasabing kompanya.
Si Park ay labimpitong taon ding hawak ng YG matapos itong lumahok sa grupong 2NE1 na kalaunan ay nabuwag din.
Matatandaang sumali rin si Park sa “Star Circle Quest” sa Pilipinas noong 2004 pero nilisan din nito ang Philippine showbiz noong 2007 bago lumagda ng kontrata sa YG Entertainment.
Nasungkit ng Philadelphia 76ers ang no.1 seed sa Eastern Conference matapos padapain ang Orlando Magic sa score na 122-97.
Kumamada si Seth Curry ng 20 points habang nagdagdag si Shake Milton ng 15 points para sa Sixers.
Sa isa pang laro, inilampaso ng Utah Jazz ang Oklahoma City Thunder sa score na 109-93.
Patay ang 12 indibidwal habang sugatan naman ang maraming iba pa sa panibagong karahasan sa Kabul, Afghanistan.
Ayon sa pulisya, nangyari ang pagsabog sa loob mismo ng mosque sa Shakar Dara district habang nagdarasal ang mga afghan worshippers.
Naganap ang pagsabog kasabay ng Eid al-Fitr religious holiday at natapat pa sa ikalawang araw ng tigil-putukan sa pagitan ng Afghan government at grupong Taliban.
Walang umaakong grupo sa nasabing pag-atake.
Kanselado ang ilang biyahe ng Philippine Airlines patungong Tokyo.
Ito’y kasunod ng pagsasara ng Mactan-Cebu International Airport para sa mga international flights sa loob ng dalawang araw (Mayo 14 at 15, 2021).
Batay sa abiso ng PAL, kabilang sa mga apektadong flights ay ang PR 433 mula Tokyo patungong Cebu nitong Mayo 14.
Paliwanag namn ng flag carrier, maaaring i-convert ng mga biyahero ang kanilang ticket bilang travel voucher, magpa-rebook hanggang December 31, 2021, o kaya’y magpa-refund nang walang penalties.
Hindi kailangang patunayan ng biktima ng sekswal na pang-aabuso na pumalag siya sa ginawa ng salarin.
Ito ang binigyang diin ng Supreme Court sa ipinalabas nitong desisyon laban sa akusadong si Joselito Salazar na napatunayang gumasa sa isang 15 anyos na babae sa Barangay Kalawaan, Pasig City noong 2013.
Sa kanyang depensa, kinuwestiyon ni Salazar ang kredibilidad ng dalagita at ipinagdiinan na hindi man lang pumalag o sumigaw ang biktima sa kanyang ginawa.
Ngunit sa desisyon ng Korte Suprema, binanggit na hindi hinihingi ng korte sa mga biktima ng panggagahasa na patunayan na nagkaroon ng physical resistance lalo na kung may dalang armas o patalim ang salarin.
Dahil dito, sentensiyahan ng reclusion perpetua o 20 hanggang 40 taong pagkakabilanggo at inatasan itong bayaran ng danyos ang biktima na nagkakahalaga ng P225,000.
Hindi ititigil ng Department of Transportation (DOTr) ang pagbibigay ng libreng sakay para sa mga healthcare workers at iba pang essential workers.
Ito ang nilinaw ni DOTr Secretary Arthur Tugade makaraang isailalim sa general community quarantine (GCQ) ang National Capital Region at iba pang lugar sa bansa.
Ayon kay Tugade, magpapatuloy ang service contracting program ng LTFRB bilang tulong sa publiko sa gitna ng COVID-19 pandemic.
Sinabi pa ng kalihim na ang pamasaheng matitipid ng mga manggagawa mula sa programa ay maaari nilang magamit na pambili ng pagkain at iba pang importanteng pangangailangan ng kanilang pamilya at mahal sa buhay.
Magiging mabigat na naman ang daloy ng trapikong mararanasan ng mga motorista ngayong weekend sa ilang lugar sa Kalakhang Maynila.
Ito’y bunsod ng panibagong road re-blocking na gagawin ng Department of Public Works and Highways (DPWH).
Batay sa traffic advisory, pinaiiwas ang mga motorista sa Edsa northbound malapit sa kanto ng Kaingin Road sa Quezon City; Edsa southbound sa tapat ng Trinoma Mall, ang second lane mula sa sidewalk; Edsa Southbound, Cloverleaf, Edsa southbound patungong A. Bonifacio Avenue, ang first lane mula sa sidewalk; C5 Road, bago mag-M. G. Dizon (Cliff Drive) St., ang second lane mula sa sidewalk; at C5 Road, bago mag-Magsaysay, ang third lane mula sa sidewalk.
Magkakaroon din ng road works sa first lane mula sa sidewalk sa West Avenue, Times Street patungong Quezon Avenue.
Dahil dito, pinapayuhan ang mga motorista na dumaan na lamang sa del Monte Avenue bilang alternatibong ruta para hindi maabala sa pupuntahan.
Ayon sa Metropolitan Manila Development Authority (MMDA), aarangkada ang pagsasaayos ng kalsada bandang alas-11:00 ng gabi ngayong Biyernes at muling bubuksan ang mga kalsada bandang alas-5:00 ng umaga sa Lunes, Mayo 17.
Wala pang plano ang Department of Labor and Employment (DOLE) na i-repatriate ang mga Pilipino sa Israel.
Ayon kay labor attaché Rudy Gabasa, wala pa sa opsiyon nila ang paglikas sa mga Pinoy sa gitna ng tensiyon sa nasabing bansa.
Sinabi ni Gabasa na nasa Alert level 1 ang Israel kaya’t prayoridad nilang madala sa mas ligtas na lugar ang ating mga kababayan doon.
Nilinaw din ng opisyal na walang deployment ban dahil mababa pa naman ang alerto sa nabanggit na bansa.
Umusad na sa kongreso ang panukalang batas na magtatatag ng isang kawanihan na siyang mamamahala sa mga nakaimbak na gamot, bakuna at iba pang medical devices o equipment sa panahon ng public health emergencies.
Ito’y makaraang aprubahan ng House Committee on Appropriations ang funding provisions sa panukalang naglalayong bumuo ng ‘Health Procurement and Stockpiling Bureau’ sa ilalim ng Department of Health o DOH.
Batay pa rin sa bill, itinutulak ang paglalaan ng medical stockpiling fund na susuporta naman sa itatatag na national drug & device security program.
Plano ng Commission on Elections o Comelec na magdaos ng hybrid presidential debates para sa 2022 elections.
Ayon kay Commissioner Marlon Casquejo, isasagawa ang debate upang makasabay aniya ang komisyon sa bagong normal.
Sinabi ni Casquejo na posibleng gawin ito sa pamamagitan ng face-to-face o virtual debate o kumbinasyon ng dalawang uri ng debate.
Matatandaang bago ang halalang pampanguluhan noong 2016 ay nagtipon ang mga Presidential at Vice Presidential candidates sa isang serye ng debate na pinamagatang “Pilipinas Debates 2016″.